អ៊ីរ៉ង់ អះអាង​ថា វាយប្រហារ​ចំ​មូលដ្ឋានទ័ព​អាមេរិក នៅ​គូវ៉ែត បង្កជា​ភ្លើង​ឆេះយ៉ាង​សន្ធោសន្ធៅ

កងកម្លាំងឆ្មាំបដិវត្តន៍អ៊ីស្លាមអ៊ីរ៉ង់ (IRGC) បានប្រកាសនា​ថ្ងៃសុក្រ ទី​១៧ ខែ​កក្កដា ឆ្នាំ២០២៦ នេះ ថា កម្លាំងទ័ពអាកាសរបស់ខ្លួន បានបើកការវាយប្រហារទៅលើមូលដ្ឋានទ័ពអាមេរិក​មួយកន្លែង នៅក្នុងប្រទេសគូវ៉ែត ដែល​នេះ​គឺជា​ប្រតិបត្តិការសងសឹក​លើក​ទី​១២ ប្រឆាំង​នឹង​​សហរដ្ឋ​អាមេរិក។ នេះ​បើយោងតាម​សេចក្ដីរាយការណ៍​ពី​ទីភ្នាក់ងារ​ Anadolu ដោយ​ដកស្រង់ប្រភព​​ចេញ​ពី​​សារព័ត៌មានរដ្ឋ​អ៊ីរ៉ង់ Mehr។

យោងតាមសេចក្តីថ្លែងការណ៍របស់ IRGC គោលដៅដែលត្រូវបានវាយប្រហារ រួមមាន ប្រព័ន្ធរ៉ាដាត្រួតពិនិត្យ និងសម្គាល់​មីស៊ីល, ឃ្លាំងអាវុធមួយចំនួន, ប្រព័ន្ធបាញ់មីស៊ីល HIMARS ចំនួនពីរគ្រឿង និងមីស៊ីលជាច្រើន​គ្រាប់ ដែលស្តុកទុកនៅក្នុងប្រព័ន្ធនោះ។ IRGC បានអះអាងថា ការវាយប្រហារនេះ បានបង្កឱ្យមានអគ្គិភ័យដ៏ធំមួយ នៅក្នុងមូលដ្ឋានទ័ពនោះ។ ភាគីអ៊ីរ៉ង់ បានបញ្ជាក់ថា ប្រតិបត្តិការនេះ គឺជាការឆ្លើយតបទៅនឹងការវាយប្រហាររបស់សហរដ្ឋអាមេរិក ដែលខ្លួនអះអាងថាបានកំណត់គោលដៅលើហេដ្ឋារចនាសម្ព័ន្ធស៊ីវិល ប្រព័ន្ធទូរគមនាគមន៍ និងផ្លូវដែក ដែលបណ្តាលឱ្យមានមនុស្សស្លាប់ និងរងរបួស។

ការវាយប្រហារនេះ កើតឡើងស្របពេលដែលបញ្ជាការដ្ឋានកណ្តាលសហរដ្ឋអាមេរិក (CENTCOM) ទើប​បានប្រកាសកាលពីថ្ងៃព្រហស្បតិ៍ថា ខ្លួនបានបញ្ចប់ប្រតិបត្តិការវាយប្រហារថ្មីមួយទៀតប្រឆាំងនឹងអ៊ីរ៉ង់ ដែលជាការវាយប្រហារយោធាលើកទី៦ ជាប់ៗគ្នាក្នុងរយៈពេល ៦យប់កន្លងមកនេះ។

គួររំលឹកថា តំបន់មជ្ឈិមបូព៌ាមានភាពតានតឹងខ្លាំង ចាប់តាំងពីខែកុម្ភៈមក នៅពេលដែលសហរដ្ឋអាមេរិក និងអ៊ីស្រាអែល បានបើកប្រតិបត្តិការរួមគ្នា ក្នុងការវាយប្រហារលើអ៊ីរ៉ង់ ខណៈដែលទីក្រុងតេហេរ៉ង់ ក៏​បានឆ្លើយតបវិញ ដោយការប្រើប្រាស់មីស៊ីល និងដ្រូន វាយប្រហារទៅលើបណ្ដា​ប្រទេសក្នុងតំបន់ឈូងសមុទ្រ ដែលជាកន្លែងដាក់ពង្រាយមូលដ្ឋានទ័ពអាមេរិក។ ទោះបីជាកាលពីខែ​មិថុនា អ៊ីរ៉ង់ និងសហរដ្ឋអាមេរិក បានចុះហត្ថលេខាលើអនុស្សរណៈនៃការយោគយល់គ្នា ដែលសម្របសម្រួលដោយប្រទេសប៉ាគីស្ថាន ដើម្បីឈានទៅរកសន្តិភាពក៏ដោយ ក៏ជម្លោះនៅតែបន្តផ្ទុះឡើងជាថ្មី ជាពិសេសជុំវិញបញ្ហានៅច្រកសមុទ្រហ័រមូស ដែលភាគីទាំងពីរបានវាយបក​គ្នា​ទៅ​វិញ​ទៅ​មក​​យ៉ាងក្តៅគគុក៕

ប្រែសម្រួល៖ ឈាង