សន្តិសុខសង្គម

ជនជាតិចិន លួចផលិតគ្រឿងញៀនក្នុងឃ្លាំងធំមួយ ត្រូវសមត្ថកិច្ចឡោមព័ទ្ធរឹបអូសជាង១តោន

បានផុស

៤ years មុន

នៅ

ថ្ងៃពុធ ១៣ កក្កដា ២០២២

ដោយ

(ស្វាយរៀង)៖ កម្លាំងសមត្ថកិច្ចចម្រុះ ចុះបង្ក្រាបបានក្រុមឧក្រិដ្ឋជនផលិត និងជួញដូរគ្រឿងញៀនដ៏ធំមួយកន្លែង នៅក្នុងក្រុងស្វាយរៀង និងរឹបអូសវត្ថុតាងសង្ស័យគ្រឿងញៀន បានជាង១តោន នៅក្នុងឃ្លាំងផលិតគ្រឿងញៀន ១កន្លែង ។ ករណីនេះ សមត្ថកិច្ចមន្ទីរប្រឆាំងគ្រឿងញៀន និងកងកម្លាំងចម្រុះ បានសហការឡោមព័ទ្ធ និងបង្ក្រាបតាំងពីថ្ងៃទី៤ ខែកក្កដា ឆ្នាំ២០២២។ កិច្ចប្រតិបត្តិការខាងលើនេះ ដឹកនាំដោយកម្លាំងនគរបាលមន្ទីរប្រឆាំងគ្រឿងញៀនក្រសួងមហាផ្ទៃ សម្របសម្រួលដោយលោកព្រះរាជអាជ្ញារង នៃអយ្យការអមសាលាដំបូងខេត្តស្វាយរៀង ជាម្ចាស់ទឹកដី ចុះពិនិត្យឃ្លាំងមួយកន្លែង ដែលមានស្លាកយីហោ «ម៉ាស៊ីនកិនស្រូវតូចតែពេជ្រ» ដែលមានទីតាំងជាប់ផ្លូវជាតិលេខ១ ស្ថិតនៅភូមិស្វាយ សង្កាត់ចេក ក្រុងស្វាយរៀង និងបានរកឃើញគ្រឿងញៀន ដែលផលិតសម្រេចជាង១តោន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងប្រតិបត្តិការនេះ សមត្ថកិច្ចឃាត់ខ្លួនជនសង្ស័យបានចំនួន៧នាក់ ជាជនជាតិចិន។ ក្រោយពីធ្វើការសាកសួរចម្លើយលើជនសង្ស័យ ទើបឈានដល់កំណត់ទីតាំងឃ្លាំងផលិតគ្រឿងញៀនដ៏ធំមួយកន្លែងទៀត នៅជិតចំណតកាណូតចាស់ ស្ថិតនៅភូមិចុងព្រែក សង្កាត់ស្វាយរៀង លទ្ធផលរកឃើញវត្ថុតាង ម៉ាស៊ីនគ្រឿងចក្រស្វ័យប្រវត្តិ សម្រាប់ផលិតគ្រឿងញៀនដ៏ធំ កំពុងដំណើរការយ៉ាងសកម្មផលិតគ្រឿងញៀន និងបុគ្គលិក វិស្វករផលិតគ្រឿងញៀន ជនជាតិចិនចំនួន៧នាក់ និងបុគ្គលិកជនជាតិខ្មែរចំនួន៥នាក់ ។

ចំពោះករណីនេះដែរ លោក តូច ប៉ូលីវ៉ា អភិបាលរងខេត្តស្វាយរៀង និងជាប្រធានលេខាធិការដ្ឋានត្រួតពិនិត្យគ្រឿងញៀនខេត្ត បានប្រាប់ឱ្យភ្នាក់ងារយកព័ត៌មានថា ករណីនេះ នគរបាលមន្ទីរប្រឆាំងគ្រឿងញៀនក្រសួងមហាផ្ទៃ ជាអ្នកគ្រប់គ្រង ដូច្នេះត្រូវរង់ចាំខាងក្រសួងផ្តល់ព័ត៌មាន និងរបាយការណ៍លទ្ធផលលម្អិត នៅពេលក្រោយ។

សូមបញ្ជាក់ថា ចាប់តាំងពីថ្ងៃទី៥ ខែកក្កដា ឆ្នាំ២០២២ រហូតមកដល់ថ្ងៃទី១២ ខែកក្កដា សមត្ថកិច្ច នៅមិនទាន់លម្អិតអំពីលទ្ធផលការបង្ក្រាបបទល្មើសគ្រឿងញៀននេះនៅឡើយ ដោយសមត្ថកិច្ចបានដាក់កម្លាំងយាមកាមទីតាំងទាំងពីរខាងលើយ៉ាងយកចិត្តទុកដាក់បំផុត។ ទោះយ៉ាងណា មានការបង្ហើបឱ្យថា ក្រុមការងារសមត្ថកិច្ចកំពុងស្រាវជ្រាវ តាមប្រមាញ់មេក្លោង និងបក្សពួកក្រុមឧក្រិដ្ឋជនផលិត និងជួញដូរសារធាតុញៀន ដោយខុសច្បាប់នេះ៕ ដោយ:ភក្ដី