កម្ពុជា​​គ្រោងសាកល្បង​ដោះលែង​អ្នកទោស​ឱ្យនៅក្រៅឃុំ​កាត់បន្ថយ​ការចង្អៀត​ណែនក្នុងពន្ធនាគារ

សម្ដេចក្រឡាហោម ស ខេង ​ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានប្រាប់​លោកស្រី Roueida Hl Hange ប្រធានឧត្តមស្នងការសិទ្ធិមនុស្សអង្គការសហប្រជាជាតិ ប្រចាំនៅកម្ពុជាថា​ កម្ពុជានឹង​សាកល្បង​អនុវត្តការដោះលែងអ្នកទោស ប្រភេទបទល្មើសស្រាលៗ​ឱ្យនៅក្រៅឃុំបណ្តោះ​អាសន្ន​ និងដោយផ្អែកលើលក្ខខណ្ឌកំណត់មួយចំនួនដើម្បីជួយ​សម្រួលដល់ការចង្អៀតណែនក្នុងពន្ធនាគារ។

​នៅក្នុងជំនួបជាមួយលោកស្រី Roueida Hl Hange​កាលពីរសៀលថ្ងៃទី ២៧ កក្កដា​ សម្ដេច ស ខេងបានមានប្រសាសន៍ថា ​ក្រសួងមហាផ្ទៃ និងក្រសួងយុត្តិធម៌​ កំពុងពិភាក្សា​អំពីដំ​ណើរការ​អនុវត្តទោសក្នុងសហគមន៍ ដើម្បីជួយ​សម្រួលដល់ការចង្អៀតណែនក្នុងពន្ធនាគារ ក៏ដូច​ជាការសាកល្បងអនុវត្តការដោះលែងឲ្យនៅក្រៅឃុំ សម្រាប់ប្រភេទបទល្មើសស្រាលៗ និងដោយ​ផ្អែកលើលក្ខខណ្ឌកំណត់មួយចំនួន។

​ចំពោះអ្នកពាក់ព័ន្ធទៅនឹងបទល្មើសគ្រឿងញៀននេះ សម្ដេច ស ខេង បន្ថែមថា​ រាជរដ្ឋា​ភិបាលកម្ពុជា និងក្រសួងមហាផ្ទៃ​ ក៏កំពុងតែខិតខំដោះស្រាយបញ្ហានេះ​តាមរយៈការបន្ត​កសាង​ហេដ្ឋារចនាសម្ព័ន្ធពន្ធនាគារបន្ថែមនៅតាមបណ្ដារាជធានី ខេត្ត ព្រមទាំងសាងសង់មជ្ឈមណ្ឌល​ស្ដារនីតិសម្បទា និងបន្សាបគ្រឿងញៀន។

ជាការឆ្លើយតប លោកស្រី Roueida Hl Hange បានថ្លែងអំណរគុណ ជូនសម្ដេចក្រឡាហោម ដែលបានផ្តល់ជូនព័ត៌មានមួយចំនួនពាក់ព័ន្ធទៅនឹងការងារគ្រប់គ្រងពន្ធនាគារហើយលោកស្រីក៏ត្រៀមខ្លួនជានិច្ចក្នុងការធ្វើកិច្ចសហការជាមួយក្រសួងមហាផ្ទៃ ទៅលើការងារដែលនៅក្នុង​អាណត្តិ​របស់​លោកស្រីនៅកម្ពុជា។

ជាមួយគ្នានវដែរ លោកស្រី បានថ្លែងអំណរគុណចំពោះ សម្តេចក្រឡាហោម ដែលបានផ្តល់នូវ​ការគាំ​ទ្រដល់បេសកកម្មការងាររបស់ការិយាល័យ ជាពិសេសគឺការគាំទ្រ​ការចុះធ្វើទស្សនកិច្ច​តាមបណ្ដាពន្ធនាគារ ដើម្បីផ្ដល់ការគាំទ្រចាំបាច់នានាដល់ការងារពន្ធនាគារ។

លោកស្រីក៏ថ្លែងអំណរ​គុណចំពោះកិច្ចសហប្រតិបត្តិការដ៏ល្អផងដែរ រវាងការិយាល័យជាមួយថ្នាក់ដឹក​នាំនៃអគ្គនាយ​កដ្ឋានពន្ធនាគារ ចំពោះការចែករំលែកនូវព័ត៌មាន ក៏ដូចជាទិន្នន័យដ៏ចាំបាច់នានាបម្រើដល់ការងាររបស់ការិយាល័យឧត្តមស្នងការប្រកបដោយប្រសិទ្ធភាព។

ក្នុងនាឱកាសនោះដែរ​ សម្ដេចក្រឡាហោម ស​ ខេង​ បានស្វាគមន៍ចំពោះលោកស្រី​ ដែលទទួលការតែង​តាំងជាប្រធានថ្មីនៃការិយាល័យឧត្តមស្នងការ​សិទ្ធិមនុស្សអង្គការសហប្រជាជាតិប្រចាំកម្ពុជា និងបានវាយតម្លៃខ្ពស់ និងមានសេចក្ដីពេញចិត្តចំពោះកិច្ចសហប្រតិបត្តិការរវាងក្រសួងមហាផ្ទៃ ជាមួយនឹងឧត្តមស្នងការការិយាល័យឧត្តមស្នងការសិទ្ធិមនុស្សប្រចាំកម្ពុជា។

សម្ដេចសខេងសង្ឃឹមថា វត្តមានរបស់លោកស្រីនឹងបន្តជំរុញ និងលើកកម្ពស់ទំនាក់ទំនង និងកិច្ចសហប្រតិបត្តិការរវាងភាគីទាំងពីរឱ្យកាន់តែរីកចម្រើន៕

អត្ថបទ៖ សំអឿន