ឆេះក្លឹបរាត្រីនៅ ថៃ ស្លាប់មនុស្ស ១៣នាក់ របួស ៤០នាក់

អគ្គិភ័យបានឆាបឆេះក្លឹបរាត្រីមួយក្នុងប្រទេសថៃ នៅថ្ងៃសុក្រទី៥ ខែសីហានេះ ដោយបានសម្លាប់មនុស្សយ៉ាងតិច១៣ នាក់ និងរបួស ៤០ នាក់។

មន្ត្រីម្នាក់មកពីមូលនិធិសង្គ្រោះ Sawang Rojanathammasathan បានប្រាប់ AFP ថា អគ្គិភ័យបានឆាបឆេះក្លឹប Mountain B នៅម៉ោងប្រហែល ១:០០ រំលងអធ្រាត្រក្នុងស្រុក Sattahip ខេត្ត Chonburi មានចម្ងាយប្រហែល ១៥០ គីឡូម៉ែត្រភាគខាងត្បូងទីក្រុង បាងកក។

ក្រុមពន្លត់អគ្គិភ័យ ត្រូវចំណាយពេលជាង ៣ម៉ោងដើម្បីពន្លត់ភ្លើង។ ភ្លាមៗមិនទាន់មាន ការបញ្ជាក់ពីមូលហេតុបង្កឲ្យអគ្គិភ័យនេះនៅឡើយទេ។

អ្នកស្លាប់ ដែលមានស្ត្រី ៤នាក់ និងបុរស៩នាក់ ភាគច្រើនត្រូវបានគេរកឃើញនៅច្រកចូល និងក្នុងបន្ទប់ទឹក។ ជន​រង​គ្រោះ​ទាំង​អស់គឺ​ជា​ជនជាតិ​ថៃ។

មានការព្រួយបារម្ភជាយូរមកហើយ អំពីវិធីសាស្រ្តដ៏ធូររលុងរបស់ប្រទេសថៃ ចំពោះបទប្បញ្ញត្តិសុខភាព និងសុវត្ថិភាព ជាពិសេសនៅក្នុងបារ និងក្លឹបរាត្រីរាប់មិនអស់របស់ខ្លួន។

អគ្គិភ័យដ៏ធំមួយ បានផ្ទុះឡើងក្នុងពិធីជប់លៀងឆ្លងឆ្នាំសកលនៅក្លឹប Santika របស់ទីក្រុងបាងកកកាលពីឆ្នាំ២០០៩ ដោយបានសម្លាប់មនុស្សចំនួន ៦៧នាក់ និងជាង ២០០ នាក់រងរបួស។

ហេតុការណ៍ចុងក្រោយមួយទៀត មនុស្ស​បួន​នាក់​បាន​ស្លាប់​ក្នុង​អគ្គិភ័យ ​ដែល​បង្ក​ឡើង​ដោយការ​ទុស្សេ​ខ្សែភ្លើងនៅ​ក្លឹប​កម្សាន្ត​មួយ​ក្នុងខេត្ត​ភូកេតកាល​ពី​ឆ្នាំ ២០១២៕

ប្រែសម្រួល៖ Vann Vann

ប្រភព៖ CNA

ចុចអាន៖ ថៃ រកឃើញករណីទី៣ នៃជំងឺអុតស្វា