ព័ត៌មានជាតិ
កម្ពុជា-ជប៉ុន ចង់រៀបចំព្រឹត្តិការណ៍រំលឹកខួបទំនាក់ទំនង៧០ឆ្នាំ ធំបំផុតមិនធ្លាប់មាននៅឆ្នាំក្រោយ
នៅឆ្នាំ២០២៣ខាងមុខនេះ គឺជាខួបលើកទី៧០ឆ្នាំនៃទំនាក់ទំនងរវាងជប៉ុន-កម្ពុជា។ ភាគីទាំងពីរ បានបង្កើតគណៈកម្មាធិការរៀបចំសម្រាប់ខួបលើកទី៧០ឆ្នាំនេះ ហើយបានបើកកិច្ចប្រជុំពិភាក្សាមួយកាលពីសប្តាហ៍មុនក្នុងគោលបំណងរៀបចំពិធីប្រារព្ធខួបនៅឆ្នាំក្រោយឲ្យបានធំជាងពេលមុនៗ។ កិច្ចប្រជុំនេះ មានការចូលរួមពីឯកអគ្គរដ្ឋទូតជប៉ុន លោក ម៉ាសាហ៊ីរូ មីកាមិ និងលោកស្រី ជា គឹមថា អនុរដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិកម្ពុជា។
ឯកអគ្គរដ្ឋទូតជប៉ុន លោក មីកាមិ បានថ្លែងឲ្យដឹងយ៉ាងមុតមាំអំពីវឌ្ឍនភាពក្នុងទំនាក់ទំនងទ្វេភាគីរយៈពេលជិតមួយសតវត្សរ៍កន្លងមកនេះ ដោយផ្តោតលើជំនួយអភិវឌ្ឍន៍ផ្លូវការ (ODA) ដល់ការវិនិយោគឯកជន ដើម្បីផលប្រយោជន៍ទៅវិញទៅមករវាងជប៉ុន-កម្ពុជា។ លោកក៏បានសម្តែងនូវក្តីរំពឹងថា ពិធីខួបលើកទី៧០ឆ្នាំនេះ នឹងបន្តផ្តល់នូវឱកាសកាន់តែច្រើនបន្ថែមទៀត។ ចំណែក លោកស្រី ជា គឹមថា អនុរដ្ឋលេខាធិការនៃក្រសួងការបរទេស ក៏បានកោតសរសើរក្រៃលែងពីការផ្លាស់ប្តូរអន្តរជាតិទៅវិញទៅមករវាង កម្ពុជា-ជប៉ុន ជាពិសេស គឺការចូលរួមចំណែករបស់ជប៉ុនក្នុងការដោះស្រាយវិបត្តិកូវីដ-១៩នៅកម្ពុជា។
តាមរយៈសារព័ត៌មាន«កម្ពុជាថ្មី» ស្ថានទូតជប៉ុនប្រចាំកម្ពុជា បានលើកឡើងថា ពិធីគម្រប់ខួបលើកទី៧០ឆ្នាំ រវាងប្រទេសទាំងពីរ នឹងមានការប្រារព្ធឡើងធំជាងឆ្នាំកន្លងមក ដែលមិនធ្លាប់មានពីមុន។ អ្វីដែលសំខាន់ គឺមានការសម្តែងមហោស្រពភាពយន្តជប៉ុនក្នុងខែមករា ពិធីគីហ្សូណាក្នុងខែកុម្ភះ និងពិធីបុណ្យផ្កាយ ឬហៅថាបុណ្យ Tanabata ក្នុងខែកក្កដា ដែលនឹងបើកឲ្យមានការចូលរួមពីប្រជាជនកម្ពុជា ដើម្បីឲ្យបានយល់ និងផ្លាស់ប្តូរវប្បធម៌គ្នាជាមួយជប៉ុន។
ការរចនាឡូហ្គោខួប៧០ឆ្នាំនៃទំនាក់ទំនងទ្វេភាគីរវាងកម្ពុជា និងជប៉ុន ដែលបើកទទួលពីសាធារណជន ត្រូវបានបិទរួចហើយ ប៉ុន្តែ ស្ថានទូតជប៉ុនបានបញ្ជាក់ថា ខ្លួនទទួលបានគំរូឡូហ្គោច្រើនទ្វេដង បើប្រៀបធៀបកាលពីប្រារព្ធខួបលើក៦៥ឆ្នាំកន្លងទៅ ហើយភាគច្រើននៃគំរូឡូហ្គោទាំងនោះ គឺបានមកពីប្រជាជនកម្ពុជា។ ដូច្នេះហើយ គណៈកម្មាធិការប្រតិបត្ត បានធ្វើការថ្លែងអំណរគុណយ៉ាងជ្រាលជ្រៅចំពោះការឆ្លើយតបដ៏ខ្លាំងក្លាពីភាគីកម្ពុជានេះ។ ការជ្រើសរើសគំរូឡូហ្គោនេះ កំពុងតែធ្វើឡើង ហើយការប្រកាសផ្លូវការនឹងធ្វើឡើងនៅក្នុងខែវិច្ឆិកា ខាងមុខ។
ឆ្លៀតក្នុងឱកាសខួបលើកទី៧០ឆ្នាំនេះ គណៈកម្មាធិការប្រតិបត្តិកំពុងស្វែងរកគម្រោងទាក់ទងនឹងខួបលើកទី៧០ឆ្នាំពីក្រុមហ៊ុន អង្គការ និងស្ថាប័នអប់រំនៅកម្ពុជា។ ការប្រកាសបើកទទួលពាក្យចូលរួម នឹងចាប់ផ្តើមប្រកាសនៅលើគេហទំព័ររបស់ស្ថានទូតជប៉ុន នៅថ្ងៃទី១ ខែតុលា។ សំណើសុំនេះ នឹងត្រូវបានជ្រើសរើសដោយគណៈកម្មាធិការប្រតិបត្តិ។
មូលនិធិជប៉ុន នឹងដឹកនាំកម្មវិធីមហោស្រពភាពយន្តជប៉ុន នៅទីក្រុងភ្នំពេញ នៅថ្ងៃទី១៤ ខែមករា ឆ្នាំ២០២៣។ បន្ថែមពីនេះ ការរំលឹកខួបលើកទី៧០ឆ្នាំ ក៏នឹងមានបា្ររព្ធកម្មវិធីក្នុងខេត្តបាត់ដំបង សៀមរាប និងខេត្តកំពង់ចាមផងដែរ។ នៅក្នុងពិធីមហោស្រពភាពយន្តជប៉ុន ក៏មានការចាក់បញ្ចាំងពីគំនូរជីចលជប៉ុន ដែលពេញនិយមបំផុតពីសំណាក់យុវវ័យកម្ពុជា។ មិនតែប៉ុណ្ណោះ មហោស្រពភាពយន្តជប៉ុន នឹងបើកឲ្យមានការចូលទស្សនាដោយសេរី ពុំមានការបង់ប្រាក់ឡើយ៕
ដោយ៖ អុន ស្រីមាន
-
ព័ត៌មានជាតិ១៧ ម៉ោង ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ១ សប្តាហ៍ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ៤ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានអន្ដរជាតិ១ សប្តាហ៍ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
កីឡា៤ ថ្ងៃ ago
ជើងឯកម៉ុងហ្គោលី Erdene អរគុណបុរសធ្លាប់ដឹកដៃ ឈឿង ល្វៃ ធ្វើឲ្យក្តីស្រមៃក្លាយជាការពិត
-
ជីវិតកម្សាន្ដ៣ ថ្ងៃ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»
-
ព័ត៌មានជាតិ១ សប្តាហ៍ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?
-
សន្តិសុខសង្គម៦ ថ្ងៃ ago
បឋម៖ អគ្គិភ័យកំពុងឆេះរោងចក្រជិតផ្សារបែកចាន (មានវីដេអូ)