ព័ត៌មានជាតិ

ត្រឹម ១៦ ថ្ងៃ ពន្ធដារខេត្តព្រះសីហនុ រកឃើញយានយន្តជិត ៧០០ គ្រឿង មិនបង់ពន្ធប្រចាំឆ្នាំ ២០២២

បានផុស

២ years មុន

នៅ

ថ្ងៃព្រហស្បតិ៍ ២ កុម្ភៈ ២០២៣

ដោយ

ប្រធានសាខាពន្ធដារខេត្តព្រះសីហនុ លោក សន ស៊ីផល បានឲ្យដឹងថា គិតត្រឹមរយៈពេល ១៦ ថ្ងៃ (ថ្ងៃទី ១៥ -៣១ ខែមករា ឆ្នាំ ២០២៣) សាខាពន្ធដារខេត្តព្រះសីហនុ សហការជាមួយកម្លាំងចម្រុះ ចុះត្រួតពិនិត្យលើមធ្យោបាយ ដឹកជញ្ជូន និងយានជំនិះនៅលើដងផ្លូវ ក្នុងក្រុងព្រះសីហនុ រកឃើញរថយន្តគ្រប់ប្រភេទមិនបានបង់ពន្ធផ្លូវសម្រាប់ឆ្នាំ ២០២២ មាន ៦៩១ គ្រឿង ក្នុងចំនួននេះ មន្ត្រីសាខាពន្ធដារ ធ្វើការផាកពិន័យប្រាក់ចូលថវិកាជាតិសរុប ៦១២ លាន ៥ សែន ៤ ម៉ឺនរៀល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សន ស៊ីផល បានឲ្យដឹងទៀតថា ការចុះត្រួតពិនិត្យយានជំនិះគ្រប់ប្រភេទដែលធ្វើចរាចរណ៍លើដងផ្លូវក្នុងក្រុងព្រះសីហនុ មន្ត្រីសាខាពន្ធដារខេត្តព្រះសីហនុ សហការជាមួយមន្ត្រីនគរបាលចរាចរណ៍ផ្លូវគោក និងមន្ត្រីកងរាជអាវុធហត្ថ បានដាក់ប៉ុស្តិ៍ត្រួតពិនិត្យចល័តលើមធ្យោបាយមិនបានចូលបង់ពន្ធប្រចាំឆ្នាំ ២០២២ និងតម្រូវឲ្យបង់ពន្ធ។

លោកប្រធានសាខាពន្ធដារខេត្តបានបន្ថែមថា ការចុះអនុវត្តត្រួតពិនិត្យប្រចាំឆ្នាំលើមធ្យោបាយដឹកជញ្ជូន និងយានជំនិះគ្រប់ប្រភេទសម្រាប់ឆ្នាំ ២០២២ គឺអនុវត្តតាមសេចក្ដីជូនដំណឹងរបស់ក្រសួងសេដ្ឋកិច្ច និងហិរញ្ញវត្ថុ ស្ដីពីការចុះត្រួតពិនិត្យការប្រកាសបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទប្រចាំឆ្នាំ ២០២២។ ចំពោះការចុះអនុវត្តត្រួតពិនិត្យលើមធ្យោបាយដឹកជញ្ជូន និងយានជំនិះគ្រប់ប្រភេទ ដើម្បីឲ្យម្ចាស់យានយន្តគ្រប់ប្រភេទចូលមកបង់ពន្ធ និងធ្វើការផាកពិន័យតាមផ្លូវច្បាប់ និងដើម្បីឲ្យពួកគាត់ចូលរួមបំពេញកាតព្វកិច្ចសារពើពន្ធលើមធ្យោបាយដឹកជញ្ជូនរបស់ខ្លួនទៅតាមឆ្នាំនិមួយៗ ដែលសាខាពន្ធដារបានប្រកាសបង់ពន្ធ។

ក្រុមការងារចម្រុះ នឹងបន្តចុះត្រួតពិនិត្យលើមធ្យោបាយយានជំនិះគ្រប់ប្រភេទលើដងផ្លូវសាធារណៈ នៅភូមិសាស្ត្រខេត្តព្រះសីហនុ សម្រាប់ឆ្នាំ ២០២២ តាមគោលដៅក្រុង ស្រុក ក្នុងភូមិសាស្ត្រខេត្តព្រះសីហនុ។

លោកប្រធានសាខាពន្ធដារខេត្ត បានឲ្យដឹងបន្ថែមទៀតថា ការប្រមូលពន្ធលើមធ្យោបាយ ដឹកជញ្ជូន និងយានជំនិះគ្រប់ប្រភេទសម្រាប់ឆ្នាំ ២០២២ នេះ បានចំនួនជាង ២១ ម៉ឺនគ្រឿង ហើយកាលពីឆ្នាំ ២០២១ ការប្រមូលពន្ធលើមធ្យោបាយដឹកជញ្ជូនគ្រប់ប្រភេទដែលបានចូលមកបង់ពន្ធប្រចាំឆ្នាំមានជាង ២០ ម៉ឺនគ្រឿងតែប៉ុណ្ណោះ។ ហើយឆ្នាំ ២០២២ យានយន្តចូលមកបង់ពន្ធមានការកើនឡើង។

លោក សន ស៊ីផល បានឲ្យដឹងថា នៅពាក់កណ្ដាលខែមករា និងនៅខែកុម្ភៈ ឆ្នាំ ២០២៣ នេះ សាខាពន្ធដារខេត្ត សហការជាមួយកម្លាំងចម្រុះ បន្តចុះត្រួតពិនិត្យពន្ធលើមធ្យោបាយប្រចាំឆ្នាំ ២០២២ លើយានជំនិះគ្រប់ប្រភេទ យើងសង្កេតឃើញថា មានរថយន្តមួយចំនួនបានបង់ពន្ធផ្លូវរួចរាល់ ក៏ប៉ុន្តែពួកគាត់មិនបានយកមកបិទលើកញ្ចក់រថយន្តរបស់ខ្លួន ជាហេតុបង្កឲ្យមានការរំខានដល់ការធ្វើដំណើររបស់ពួកគាត់តាមចំណុចគោលដៅថែមទៀតផង។ ជាមួយគ្នានេះ មន្ត្រីសាខាពន្ធដារ ដែលចុះតាមគោលដៅ ក៏បានស្នើសុំឲ្យម្ចាស់យានជំនិះគ្រប់ប្រភេទ ពេលបង់ពន្ធផ្លូវប្រចាំឆ្នាំរួចរាល់ សូមបិទពន្ធប្រចាំឆ្នាំលើកញ្ចក់រថយន្តឲ្យបានត្រឹមត្រូវ ដើម្បីឲ្យភ្នាក់ងាររបស់យើងមានការងាយស្រួលក្នុងការត្រួតពិនិត្យពន្ធប្រចាំឆ្នាំ ដើម្បីបង្កលក្ខណៈងាយស្រួលដល់មន្ត្រីអ្នកចុះអនុវត្តច្បាប់ ក៏ដូចជាម្ចាស់រថយន្ត និងអ្នកបើកបរផងដែរ។ ម្យ៉ាងទៀត វាមិនរំខានដល់ការធ្វើដំណើររបស់ពលរដ្ឋនៅតាមចំណុចគោលដៅត្រួតពិនិត្យថែមទៀតផង៕

អត្ថបទ ៖ ស៊ុយ ចាន់ធា