ប្រមុខណាតូ ថា ការវាយលុកថ្មីរបស់រុស្ស៊ី ចាប់ផ្តើមហើយ (មានវីដេអូ)

អគ្គលេខាធិការអង្គការណាតូនិយាយថា ការវាយលុកថ្មីដ៏គួរឲ្យភ័យខ្លាច របស់រុស្ស៊ីនៅអ៊ុយក្រែន បានចាប់ផ្តើមរួចទៅហើយ។

លោក Jens Stoltenberg បានប្រាប់អ្នកយកព័ត៌មានក្នុងសន្និសីទកាសែត នៅទីក្រុងព្រុចសែល នៃប្រទេស បែលហ្ស៊ិក កាលពីថ្ងៃចន្ទទី១៣ខែកុម្ភៈថា “យើង​មិន​ឃើញ​មាន​សញ្ញា​អ្វី​ដែល​ថា ​ប្រធានាធិបតីរុស្ស៊ី លោក វ្ល៉ាឌីមៀរ ពូទីន កំពុង​រៀបចំ​សម្រាប់​សន្តិភាពនោះទេ។ អ្វី​ដែល​យើង​ឃើញ​គឺ លោក​ប្រធានាធិបតី ​ពូទីន និង​រុស្ស៊ី​ នៅ​តែ​ចង់​គ្រប់​គ្រង​អ៊ុយក្រែន”។

លោក​ Stoltenberg ​និយាយ​ថា “​យើង​មើល​ឃើញ​ពី​របៀប​ដែល​ពួកគេ​កំពុង​បញ្ជូន​ទាហាន​បន្ថែម​ទៀត អាវុធ​កាន់​តែ​ច្រើន បង្កើនសមត្ថភាព​កាន់​តែ​ខ្លាំង។ ការពិតគឺថា យើងកំពុងមើលឃើញការចាប់ផ្តើមនៃការវាយលុកថ្មីរួចទៅហើយ”។

លោក Stoltenberg ក៏បាននិយាយដែរថា លោករំពឹងថា បញ្ហានៃយន្តហោះចម្បាំងនឹងត្រូវលើកយកពិភាក្សានៅក្នុងកិច្ចប្រជុំរយៈពេលពីរថ្ងៃ នៃរដ្ឋមន្ត្រីការពារជាតិអង្គការណាតូដែលចាប់ផ្តើមនៅថ្ងៃអង្គារ។

លោក​សង្កត់​ធ្ងន់​ថា ប្រទេសជាសមាជិកអង្គការ​ណាតូ​ដែល​ផ្គត់ផ្គង់​យន្តហោះ​ចម្បាំង​ដល់​អ៊ុយក្រែន ​នឹង​មិន​ធ្វើ​ឲ្យ​សម្ព័ន្ធមិត្ត​ក្លាយ​ជា​ផ្នែក​នៃ​ជម្លោះ​ឡើយ។

គួរបញ្ជាក់ជាថ្មី បន្ទាប់ពីរុស្ស៊ីចាប់ផ្តើមប្រតិបត្តិការពិសេសរបស់ខ្លួនក្នុងប្រទេសអ៊ុយក្រែន នៅថ្ងៃទី២៤ខែកុម្ភៈឆ្នាំ២០២២មក សហរដ្ឋអាមេរិកនិងសម្ព័ន្ធមិត្ត បានបង្កើនជំនួយយោធារបស់ពួកគេដល់ទីក្រុងកៀវ ដោយផ្គត់ផ្គង់សព្វាវុធមានតម្លៃរាប់ពាន់លានដុល្លារ។ ទីក្រុងមូស្គូបានព្រមានម្តងហើយម្តងទៀតថា ជំនួយបែបនេះនឹងធ្វើឲ្យជម្លោះអ៊ុយក្រែនអូសបន្លាយពេល៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Aljazeera

ចុចអាន៖ ណាតូ គ្រោងស្នើ ឲ្យប្រទេស ជាសមាជិក ពង្រីក ឃ្លាំង អាវុធ