ក្រុងកំពត និងស្រុកទឹកឈូមានតំបន់មួយចំនួនកំពុងរងការជន់លិចដោយជំនន់ទឹកភ្លៀង

បន្ទាប់ពីភ្លៀងធ្លាក់មួយមេធំតាំងពីយប់រហូតដល់ព្រឹកបណ្តាលឲ្យក្រុងកំពត និងស្រុកទឹកឈូ ក្នុងតំបន់មួយចំនួនបានរងការជន់លិច។

អាជ្ញាធរមូលដ្ឋាន និងមន្ត្រីជំនាញបានកំពុងមមាញឹកក្នុងការកាយប្រឡាយរំដោះទឹកចេញពីតំបន់ជន់លិចទាំងនោះ។ជំនន់នេះមិនប៉ះពាល់ដល់ការរស់នៅរបស់ពលរដ្ឋទេ ដោយសារចំណាត់ការអាជ្ញាធរទាន់ពេលវេលា។ 

អាជ្ញាធរមូលដ្ឋានបានឲ្យដឹងថា ជាង១សប្តាហ៍មកហើយ អាកាសធាតុនៅខេត្តកំពតអាប់អួរ មានភ្លៀងរលឹមមិនដាច់  រហូតមកដល់ល្ងាចថ្ងៃទី ២៩ ខែកក្កដានេះ ភ្លៀងបានធ្លាក់ខ្លាំងបន្តរហូតដល់ព្រឹកថ្ងៃទី ៣០ ខែកក្កដានេះ បណ្តាលឲ្យតំបន់មួយចំនួនក្នុងក្រុងកំពតរង់ការជន់លិច មានដូចជាតំបន់ផ្លូវមាត់ព្រែកខាងមុខមន្ទីរពេទ្យបង្អែក តំបន់ព្រះអង្គឌួង បេនឡានចាស់ តំបន់ផ្លូវបេតុងក្នុងសង្គាត់កំពង់បាយ តំបន់ផ្លូវឆ្នេរកោះស្មៅ និងតំបន់មួយចំនួននៅសង្គាត់អណ្តូងខ្មែរ និងតំបន់មួយចំនួនក្នុងឃុំពង់គ្រែង និងឃុំត្រពាំងធំ ស្រុកទឹកឈូ។

អាជ្ញាធរមូលដ្ឋានបានធ្វើការកាយប្រឡាយបង្ហូរទឹកចូលព្រែកនៅទីតាំងជនលិចសំខាន់ៗមួយចំនួន មានតំបន់មាត់ព្រែកមុខមន្ទីរពេទ្យបង្អែកខេត្តកំពត និងនៅតំបន់កោះស្មៅ និងតំបន់ឆ្នេរព្រែកកំពុងបាយ និងតំបន់ព្រែកជីកផងដែរ។

មន្ត្រីគ្រប់គ្រងគ្រោះមហន្តរាយខេត្តកំពត លោក ម៉ី សាវុធ បានប្រាប់ឲ្យដឹងថា មកដល់ពេលនេះ ខេត្តកំពតបានរងការជន់លិចនៅចំបន់មួយចំនួននៅក្រុងកំពត និងស្រុកទឹកឈូ។

ជំនន់ទឹកភ្លៀងបានជន់លិចបណ្តាលមកពីការស្ទះប្រពន្ធលូដោយសារសំរាម និងការចាក់ដីបិទផ្លូវទឹក។

បន្ទាប់ពីមានអន្តរគមន៍ពីអាជ្ញាធរ ស្ថានភាពការជន់លិចបានល្អប្រសើរឡើងវិញជាបណ្តើរៗហើយ។ ចំណែកនៅតាមបណ្តាលស្រុកផ្សេងៗ លោកមិនទាន់ទទួលបានរបាយការណ៍នៅឡើយទេ។

ទោះជាយ៉ាងណាក៏ដោយការជនលិចដោយជំនន់ទឹកភ្លៀងនេះ មិនបានធ្វើប៉ះពាល់ដល់ការរស់នៅ និងការធ្វើដំណើររបស់ប្រជាពលរដ្ឋនោះទេ ហើយមកដល់ម៉ោង១១ព្រឹកនេះ ស្ថានភាពនៃការជំនន់ទឹកភ្លៀងជនលិចនេះកំពុងមានភាពល្អប្រសើរឡើងវិញបន្តិចម្ដងៗវិញហើយ បន្ទាប់ពីមានចំណាត់ការរបស់លោកអភិបាលខេត្តកំពត ក៏ដូចជាអាជ្ញាធរមូលដ្ឋាន ប៉ុន្តែតំបន់មួយចំនួននឹងបន្តលិចប្រសិនបើ មេឃនៅតែបន្តធ្លាក់ភ្លៀងខ្លាំង ខណៈដល់ពេលនេះផ្ទៃមេឃកំពុងមានសភាពអួរអាប់នៅឡើយ៕

អត្ថបទ៖ សឹង រ៉ាត់