៤ ឆ្នាំមុន លោក Prigozhin ក៏ត្រូវគេប្រកាសថាធ្លាក់យន្តហោះស្លាប់ដែរ ស្រាប់តែ ៣ ថ្ងៃក្រោយ បង្ហាញខ្លួនវិញ

លោក Yevgeny Prigozhin មេទាហានស៊ីឈ្នួលរុស្ស៊ី Wagner ត្រូវបានគេជឿថា ស្លាប់ក្នុងហេតុការណ៍ធ្លាក់យន្តហោះ Embraer Legacy 600 មានលេខកន្ទុយ RA-02795 នៅក្នុងប្រទេសរុស្ស៊ី កាលពីថ្ងៃពុធ ទី២៣ ខែសីហា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទីភ្នាក់ងារដឹកជញ្ជូនផ្លូវអាកាសសហព័ន្ធរបស់ប្រទេសរុស្ស៊ី Rosaviatsiya, ក្នុងយន្តហោះនោះមានផ្ទុកមនុស្ស១០នាក់ ពោលគឺអាកាសយានិក៣នាក់ និងអ្នកដំណើរ៧នាក់ ហើយពេលនេះ សាកសពត្រូវបានរកឃើញអស់ហើយ។

ទន្ទឹមនោះ ក្រៅពីលោក Prigozhin, មេបញ្ជាការជាន់ខ្ពស់ក្រុមហ៊ុនទាហានស៊ីឈ្នួល Wagner ឈ្មោះ Dmitry Utkin និងបុគ្គលសំខាន់ផ្សេងទៀត ក៏មានឈ្មោះក្នុងបញ្ជីអ្នកដែលជិះយន្តហោះនោះផងដែរ។ 

ក្រោយហេតុការណ៍នេះកើតឡើងភ្លាមៗ ឆានែល Telegram ដែលមានទំនាក់ទំនងជាមួយលោក Prigozhin បានប្រកាសពីការស្លាប់របស់គាត់ ហើយឆានែលខាងលើអះអាងថា រឿងនេះគឺបណ្តាលមកពីជនក្បត់នៅក្នុងប្រទេសរុស្ស៊ី។

លើសពីនេះ អ្នកប្រយុទ្ធ Wagner បានបង្ហោះវីដេអូគំរាមមួយ នៅលើប្រព័ន្ធផ្សព្វផ្សាយសង្គមដោយប្តេជ្ញាថា ពួកគេនឹងសងសឹកប្រសិនបើមេដឹកនាំរបស់ពួកគេ ត្រូវបានបញ្ជាក់ថាស្លាប់មែន។

ទោះបីជាយ៉ាងណាក៏ដោយ នេះមិនមែនជាលើកទីមួយឡើយ ដែលមេក្រុមទាហានស៊ីឈ្នួល Wagner រូបនេះ ត្រូវបានគេប្រកាសថា ស្លាប់នៅក្នុងគ្រោះថ្នាក់អាកាសចរណ៍បែបនេះនោះ ។

កាលពីខែតុលា ឆ្នាំ២០១៩ យន្តហោះយោធា An-27 បានធ្លាក់នៅសាធារណរដ្ឋប្រជាធិបតេយ្យកុងហ្គោ ដោយលោក Prigozhin ត្រូវបានគេជឿថាក៏ជិះក្នុងនោះដែរ ប៉ុន្តែ ៣ ថ្ងៃក្រោយមក គាត់ស្រាប់តែបង្ហាញខ្លួនគួរឲ្យភ្ញាក់ផ្អើលទាំងមិនមានរបួសអ្វីទាំងអស់ ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ទាហានស៊ីឈ្នួលរុស្ស៊ី គំរាមសម្រុកចូល មូស្គូ ដើម្បីសងសឹក បើមេពួកគេ ពិតជាស្លាប់មែន