អភិបាលខេត្តកែប ណែនាំឲ្យអាជីវករឈប់ដេញតាមបក់ដៃហៅភ្ញៀវ

លោក សោម ពិសិដ្ឋ អភិបាលខេត្តកែប បានណែនាំឲ្យអាជីវករលក់ដូរម្ហូបអាហារនៅតាមតំបន់ទេសចរណ៍មួយចំនួន ត្រូវបញ្ឈប់សកម្មភាពដេញតាមបក់ដៃហៅភ្ញៀវ ព្រោះមើលទៅដូចជារញ៉េរញ៉ៃ។

លោកអភិបាលខេត្តកែប បានលើកឡើងនៅក្នុងពិធីសម្ពោធជាផ្លូវការនូវរូបសំណាកព្រះគណេសកាលពីថ្ងៃទី៣១ ខែសីហា កន្លងមកនេះថា រហូតដល់ថ្ងៃទី៥ ខែកញា ឆ្នាំ២០២៣នេះ អាជ្ញាធរបានព្យាយាមកែលម្អលើកកម្ពស់សោភ័ណភាពឆ្នេរលេងទឹកកែបដែលធ្វើឱ្យទាក់ទាញភ្ញៀវទេសចរជាតិនិងអន្តរជាតិចូលចិត្តមកលេងកម្សាន្តជាច្រើនហើយ​ទទួលបានលទ្ធផលល្អច្រើន ប៉ុន្តែអ្វីដែលនៅមិនទាន់កែបាន គឺអាជីវករមួយចំនួននៅមិនទាន់កែទម្លាប់មិនល្អរបស់ខ្លួន ជាពិសេសនោះអាជីវករនៅម្ដុំប៉ូយព្រះរាជដំណាក់នោះតែម្ដង នៅតែបន្តចេញមកបក់ដៃហៅភ្ញៀវ និងដេញតាមហៅរថយន្តភ្ញៀវទេសចរណ៍ដោយមិនកែទម្លាប់ដដែល។

លោក សោម ពិសិដ្ឋ បានសំណូមពរ ឱ្យអាជីវករឈប់ហៅភ្ញៀវនៅម្តុំឆ្នេរលេងទឹកកែប ដូចនៅមិនទាន់ផ្លាស់ប្តូរការចេញមកបក់ដៃហៅភ្ញៀវនៅឡើយ សកម្មភាពដេញតាមឡានរបស់អ្នកទេសចរនៅឡើយនោះទេ។ អាជីវករទាំងនេះជាទម្លាប់មិនល្អទាល់តែសោះ ហើយប្រែទៅជាការធុញទ្រាន់សម្រាប់ភ្ញៀវទេសចរទៅវិញ។

ទោះជាយ៉ាងណាក៏ដោយ អភិបាលខេត្តកែប បានបន្តទទួចឲ្យអាជីវករទាំងនោះ ត្រូវបញ្ឈប់ទង្វើរទាំងនេះ សូមងាកមកពង្រឹងដើម្បីទាក់ទាញ៣ចំណុចលើចិត្តភ្ញៀវអ្នកទេសចរវិញ។លោកអភិបាលខេត្តកែបបានសំណូមពរឲ្យអាជីវករទាំងនេះ ត្រូវបញ្ឈប់សកម្មភាពទាំងនោះដើម្បីចេញមកពង្រឹងចំណុចទាំង៣ នេះវិញ ដើម្បីទាក់ទាញយកចិត្តភ្ញៀវទេសចរ ទី១. ត្រូវរៀបចំម្ហូបអាហារឲ្យមានអនាម័យបានល្អ។ ទី២ ត្រូវមានកម្រិតតម្លៃឲ្យម្ហូបមានភាពសមរម្យ។ និងទី៣ ត្រូវរៀបចំខ្លួនឲ្យមានរបៀបមានពាក្យសម្តីសំដៅ ល្អនិងការស្លៀកពាក់។

ជាមួយសកម្មភាពអសកម្មរបស់អាជីវករទាំងនេះ ប្រជាពលរដ្ឋបានសម្តែងមតិក្នុងទំព័រហ្វេសប៊ុកព័ត៌មានខេត្តកែបថា ទៅលេងឆ្នេរកែបដើម្បីបន្ធូរអារម្មណ៍ស្មុកស្មាញ ពេលមកដល់បែរជារឹតតែមួម៉ៅទៅវិញ។ បក់ក៏បក់ចុះតែសុំកុំមកបក់ឈរនៅមុខឡាន ហើយនៅកណ្តាលផ្លូវ ឬក៏ចាប់ដៃចង្កូតម៉ូតូគេបន្តឈប់ និងឈរមុខឡានអ្នកទេសចរណ៍បន្តទៀត។

បើតាមអាជីវករមួយរូបដែលកំពុងដេញចាប់ភ្ញៀវនៅក្បែរឆ្នេរលេងទឹកកែបបានលើកឡើងថា តាមពិតទៅបើមិនបក់ដៃ ភ្ញៀវគាត់មិនចូលនោះទេ ហើយយើងក៏មិនបានទៅប៉ះពារយានយន្តអ្វីនោះដែរ។ ស្រ្តីជាអាជីវកររូបនោះបន្ថែមថា មិនបានបារម្ភពីគ្រោះថ្នាក់អ្វីនោះទេ ព្រោះភ្ញៀវមិនបុកនោះឡើយ។

ទោះជាយ៉ាងណាប្រជាពលរដ្ឋ ជាពិសេសអ្នកដែលនិយមមកលេងកម្សាន្តនៅខេត្តកែប បានសម្តែងការសាទរចំពោះការលើកឡើងពីសំណាក់អភិបាលខេត្តកែប បានសំណូមពរឲ្យប្រើវិធានការក្តៅប្រសើរជាជាងការបន្តសំណូមពររបស់អាជីវករ៕

អត្ថបទ៖ សឹង រ៉ាត់