ព័ត៌មានជាតិ

ក្រសួងវប្បធម៌៖ យកវត្ថុបុរាណខ្មែរផ្សព្វផ្សាយទាញប្រយោជន៍ផ្ទាល់ខ្លួន ប៉ះពាល់ការទាមទារវត្ថុបុរាណខ្មែរពីបរទេសមកស្រុកកំណើតវិញ

បានផុស

២ years មុន

នៅ

ថ្ងៃពុធ ៦ កញ្ញា ២០២៣

ដោយ

ក្រសួងវប្បធម៌ និងវិចិត្រសិល្បៈ បានលើកឡើងថា កាលដែរអាជីវករ អ្នកលក់អនឡាញ និងសាធារណជន បានប្រើប្រាស់រូបថតវត្ថុបុរាណខ្មែរ ដើម្បីផ្សព្វផ្សាយលក់វត្ថុសិល្បៈផ្ទាល់ខ្លួនតាមបណ្ដាញសង្គម ធ្វើឲ្យប៉ះពាល់យ៉ាងធ្ងន់ធ្ងរមុខមាត់រាជរដ្ឋាភិបាលកម្ពុជា ដែលបានខិតខំប្រឹងប្រែងកន្លងមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការគូសបញ្ជាក់របស់ក្រសួងវប្បធម៌ មួយរយៈកន្លងមកនេះមន្ត្រីជំនាញបានសង្កេតឃើញថា មានអាជីវករនិងអ្នកលក់អនឡាញមួយចំនួន បានផ្សព្វផ្សាយលក់វត្ថុសិល្បៈតាមប្រព័ន្ធបណ្ដាញសង្គមហ្វេសប៊ុក និងតិកតុក ដោយប្រើប្រាស់រូបថតវត្ថុបុរាណខ្មែរដែលក្រសួងបានបង្ហោះកន្លងមក ដើម្បីយកធ្វើជារូបភាពទាក់ទាញ សម្រាប់លក់ដូរវត្ថុសិល្បៈឯកជនរបស់ខ្លួនឯង។

ក្រសួងវប្បធម៌បានសង្កត់ធ្ងន់ថា «ការយករូបថតវត្ថុបុរាណមកប្រើប្រាស់បែបនេះ គឺជាសកម្មភាពខុសឆ្គង និងជារូបភាពបោកប្រាស់ ដែលនាំឲ្យសាធារណជនមានការភាន់ច្រឡំ និងធ្វើឲ្យសមត្ថកិច្ចបរទេសនិងអ្នកកាន់កាប់សមុច្ច័យឯកជននានា យល់ច្រឡំវត្ថុបុរាណខ្មែរដែលគេបានប្រគល់មកកម្ពុជាវិញ ត្រូវបានចរាចរលក់ដូរក្នុងទីផ្សារដោយខ្វះការគ្រប់គ្រង ការពារពីសំណាក់រាជរដ្ឋាភិបាលកម្ពុជា»។

ទៀតសោត ការធ្វើបែបនេះគឺនាំឲ្យប៉ះពាល់យ៉ាងធ្ងន់ធ្ងរដល់ដំណើរការ នៃការទាមទារវត្ថុបុរាណខ្មែរមកវិញ និងបាត់បង់ទំនុកចិត្តមកលើរាជរដ្ឋាភិបាលកម្ពុជា ដែលបានខិតខំប្រឹងប្រែងកន្លងមកក្នុងការស្វែងរក និងនាំយកមកវិញនូវសម្បត្តិវប្បធម៌ខ្មែរ ដែលត្រូវបានលួចនាំចេញដោយខុសច្បាប់ទៅក្រៅប្រទេស។

ដូច្នេះ ក្រសួងវប្បធម៌ ឲ្យអាជីវករ និងអ្នកលក់អនឡាញនានា ដែលប្រកបមុខរបរនេះ ត្រូវបញ្ឈប់ជាបន្ទាន់នូវការប្រើប្រាស់រូបភាពវត្ថុបុរាណខ្មែរ ដើម្បីផ្សព្វផ្សាយលក់ ដូរវត្ថុសិល្បៈរបស់ខ្លួន។ ហើយក្នុងករណី អាជីវករ ឬ អ្នកលក់អនឡាញណា ដែលមិនបញ្ឈប់នូវទង្វើមិនស្របច្បាប់នេះ ក្រសួង វប្បធម៌ និងវិចិត្រសិល្បៈ នឹងចាត់វិធានការចាំបាច់តាមច្បាប់ជាធរមាន។

ជាមួយគ្នានេះ ក្រសួងវប្បធម៌ក៏អំពាវនាវដល់សាធារណជនត្រូវរួមគ្នាក្នុងការថែរក្សាការពារ និងលើកតម្លៃកេរដំណែល ដូនតា ដែលជាសម្បត្តិបេតិកភណ្ឌវប្បធម៌ និងអត្តសញ្ញាណជាតិ ដើម្បីជាឧត្ដមប្រយោជន៍សម្រាប់កូនខ្មែរជំនាន់ក្រោយៗទៀត៕