ព័ត៌មានជាតិ

សូមប្រុងប្រយ័ត្ន!! ឆ្លៀតក្នុងផ្ទះមានតែមនុស្សស្រី ជនសង្ស័យម្នាក់ផ្លោះរបងចូលវាយប្លន់យកទ្រព្យសម្បត្តិ

បានផុស

៥ years មុន

នៅ

ថ្ងៃពុធ ៣ កុម្ភៈ ២០២១

ដោយ

សៀមរាប ៖ ជនសង្ស័យម្នាក់ឆ្លៀតឱកាសក្នុងផ្ទះមានតែមនុស្សស្រី បានលួចផ្លោះរបងចូលវាយប្លន់យកទ្រព្យសម្បត្តិ រួចរត់គេចខ្លួន ក្រោយមកក៏ត្រូវបានសមត្ថកិច្ចស្រាវជ្រាវឃាត់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍ចូលប្លន់ដល់ក្នុងផ្ទះនេះ កើតឡើងនៅវេលាម៉ោង១៥និង២០នាទី ថ្ងៃទី០២ ខែកុម្ភៈ ឆ្នាំ២០២១ ស្ថិតក្នុងភូមិកន្ត្រក សង្កាត់ស្វាយដង្គំ ក្រុងសៀមរាប និងស្រាវជ្រាវឃាត់ខ្លួនបាននៅម៉ោង២១និង០០នាទីថ្ងៃដដែល ស្ថិតនៅផ្ទះជនសង្ស័យក្នុងភូមិសំបួរ សង្កាត់សំបួរ ក្រុងសៀមរាប។

សេចក្តីរាយការណ៍បានឲ្យដឹងថា ជនសង្ស័យដែលចូលវាយប្លន់យកទ្រព្យសម្បត្តិនោះ មានឈ្មោះ នឿន សម្បត្តិ អាយុ២៨ឆ្នាំមុខរបរមិនពិតប្រាកដ ។ ចំណែកជនរងគ្រោះមានឈ្មោះ ឈ្មោះអុក ស្រីដែន ភេទស្រីអាយុ២១ឆ្នាំ រស់នៅភូមិឃុំខាងលើ។

សេចក្តីរាយការណ៍ដដែលបានឲ្យដឹងថា បន្ទាប់ពីនគរបាលខេត្តសៀមរាប បានទទួលបណ្តឹងរបស់ជនរងគ្រោះ និង ទទួលបានការណែនាំពីលោកឧត្តមសេនីយ៍ទោ ទិត្យ ណារ៉ុង ស្នងការដ្ឋាននគរបាលខេត្តសៀមរាប និងបញ្ជាផ្ទាល់ពីលោក ឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនព្រហ្មទណ្ឌ និងលោកវរសេនីយ៍ឯក ណុប សារ៉ាក់ ស្នងការរង ជំនួយការដឹកនាំការងារព្រហ្មទណ្ឌកម្រិតធ្ងន់ ដែលដឹកនាំការបង្ក្រាបដោយលោកវរសេនីយ៍ទោសុខ ម៉េងអៀង នាយការិយាល័យនគរបាលព្រហ្មទណ្ឌកម្រិតធ្ងន់ ដឹកនាំកម្លាំងក្រោមឱវាទ សហការជាមួយអាជ្ញាធរមូលដ្ឋាននៃក្រុងសៀមរាប តាមចាប់ជនសង្ស័យរហូតបានជាក់ស្តែងនៅក្នុងផ្ទះតែម្តង។

បច្ចុប្បន្នកម្លាំងនគរបាលព្រហ្មទណ្ឌកម្រិតធ្ងន់ កំពុងសួរនាំដើម្បីចាត់ការតាមនីតិវិធីផ្លូវច្បាប់៕

ដោយ ៖ កុសល