ព្រះរាជាណាចក្រកម្ពុជាបន្តធ្លាក់ភ្លៀង ៣ ថ្ងៃដោយសារឥទ្ធិពលព្យុះត្រូពិក

​ក្រសួងធនធានទឹក និងឧតុនិយមបានប្រកាសនៅថ្ងៃច័ន្ទនេះថា ​កម្ពុជានឹងបន្តធ្លាក់ភ្លៀង​ដោយសារ​ឥទ្ធិពល​ព្យុះត្រូវពិក និងខ្យល់មូសុងនិរតីនៅលើសមុទ្រអាដាំមែន (Andaman Sea)។

​យោងតាមសេចក្ដីជូនដំណឹងរបស់ក្រសួងធនធានទឹក ប្រព័ន្ធសម្ពាធទាប ដែលកំពុងមាននៅលើ​ឈូង​សមុទ្របេងកាល (Bay of Bengal) គេរំពឹងថានឹងវិវត្តទៅជាព្យុះត្រូពិក និងខ្យល់មូសុងនិរតី​នៅ​លើ​សមុទ្រអាដាំមែន (Andaman Sea) នឹងគ្របដណ្តប់លើឈូងសមុទ្រថៃ និងវិវត្តទៅជាប្រព័ន្ធ​សម្ពាធទាប។ ខណៈនេះ ខ្យល់មូសុងភាគខាងត្បូង និងខាងកើត បក់នាំសំណើមក្នុងកម្រិតមធ្យម​មកលើ​តំបន់ខ្ពង់រាប តំបន់ទំនាបកណ្តាល និងតំបន់មាត់សមុទ្រនៃព្រះរាជា​ណាចក្រកម្ពុជា។

​បាតុភូតនេះ នឹងធ្វើឱ្យព្រះរាជាណាចក្របន្តធ្លាក់ភ្លៀងក្នុងកម្រិតខ្សោយទៅមធ្យម គ្រប​ដណ្តប់​លើ​ផ្ទៃ​ដីពី ៣០% ទៅ ៥០% ចាប់ពីថ្ងៃទី ២៣ ដល់ថ្ងៃទី ២៦ ខែតុលា​នៅតាមបណ្ដាខេត្ត​តំបន់ខ្ពង់​រាប​មួយ​ចំនួនដូចជា ខេត្តស្ទឹងត្រែង ព្រះវិហារ រតនគិរី និងខេត្តមណ្ឌលគិរី។​

ចំណែកឯរាជធានីភ្នំពេញ តំបន់មាត់សមុទ្រ និងតំបន់ទំនាបកណ្តាល នឹងមានភ្លៀងធ្លាក់​នៅក្នុង​កម្រិតបង្គួរ ជាមួយនឹងទំហំទឹកភ្លៀងធ្លាក់គ្របដណ្តប់លើផ្ទៃដីពី ៥០% ទៅ ៦០%។

ជាមួយគ្នានេះ ក្រសួងក៏អំពាវនាវឱ្យប្រជាពលរដ្ឋត្រូវប្រុងប្រយ័ត្នខ្ពស់ចំពោះស្ថានភាពនេះ ដែលអាចបង្កជាជំនន់ទឹកភ្លៀង៕