លោក Netanyahu សម្រេចបើកប្រតិបត្តិការជើងគោកលើតំបន់ហ្គាហ្សា​ជាឯកច្ឆ័ន្ទ

នាយករដ្ឋមន្ត្រី​អ៊ីស្រាអែលលោក Benjamin Netanyahu បាន​និយាយ​កាលពី​ថ្ងៃ​សៅរ៍​ថា ការសម្រេចចិត្ត​ពង្រីក និងប្រកាសបើកប្រតិបត្តិការ​ជើងគោក​នៅ​តំបន់ហ្គាហ្សាស្ទ្រីបត្រូវបាន​អនុម័ត​ជា​ឯកច្ឆ័ន្ទ​ពីសំណាក់​សមាជិក​គណៈរដ្ឋមន្ត្រី​សង្រ្គាមរបស់ប្រទេស ។

ថ្លែងក្នុងសន្និសីទសារព័ត៌មានរួមមួយជាមួយរដ្ឋមន្ត្រីការពារជាតិលោក Yoav Galant និងរដ្ឋមន្ត្រីសង្គ្រោះបន្ទាន់ Benny Gantz, លោក Netanyahu បានកត់សម្គាល់ថា “បច្ចុប្បន្នយើងទើបតែចាប់ផ្ដើមដំណើរធ្វើសង្គ្រាមប៉ុណ្ណោះ ។ ទោះយ៉ាងណា ការ​ប្រយុទ្ធ​នៅ​តំបន់ហ្គាហ្សា​ស្ទ្រីប​នឹង​មាន​ភាព​តានតឹង និង​អូសបន្លាយពេល ប៉ុន្តែ​យើង​បាន​រៀបជើងព្រួលសម្រាប់​រឿងនេះរួចទៅហើយ” ។

ស្របពេលជាមួយគ្នានេះ លោកនាយករដ្ឋមន្ត្រីបានពណ៌នាអំពីសង្រ្គាមដែលកំពុងបន្តនៅលើតំបន់ហ្គាហ្សាថាជា “ការសាកល្បងអត្ថិភាពសម្រាប់អ៊ីស្រាអែល ហើយនេះគឺជាសង្រ្គាមឯករាជ្យលើកទី ២ របស់យើង ។ នៅក្នុងសប្តាហ៍ដំបូងនៃសង្រ្គាម យើងបានកម្ទេចខ្មាំងសត្រូវយ៉ាងច្រើន ដើម្បីជួយដល់កងកម្លាំងរបស់យើងងាយស្រួលចូលទៅក្នុងដែនដីទាំងនោះកាន់តែមានសុវត្ថិភាព ជាពិសេសសង្រ្គាមនេះនឹងជាបេសកកម្មនៃជីវិតរបស់យើង” ។

ដោយឡែកទាក់ទិននឹងសំណើរបស់ក្រុមហាម៉ាស់សម្រាប់កិច្ចព្រមព្រៀងដោះដូរអ្នកទោសវិញ, លោក Netanyahu បាននិយាយថា “គណៈរដ្ឋមន្ត្រីសង្គ្រាមរបស់ប្រទេសបានពិភាក្សាលើសំណើនេះរួចហើយ ប៉ុន្តែកិច្ចពិភាក្សាបច្ចុប្បន្ននឹងមិនអាចជួយអ្វីបាននោះឡើយ” ។

ចំណែកចំពោះសំណួរអំពីថាតើអ្នកណាជាអ្នកទទួលខុសត្រូវលើការបរាជ័យផ្នែកយោធា និងការស៊ើបការណ៍ហេតុការណ៍វាយប្រហារកាលពីថ្ងៃទី៧ ខែតុលា, លោក Netanyahu បាននិយាយថា “បន្ទាប់ពីសង្រ្គាមនេះ យើងទាំងអស់គ្នាត្រូវតែផ្តល់ចម្លើយចំពោះសំណួរពិបាកៗ ។ ទោះយ៉ាងណា យើងមាន​ការ​ធ្វេសប្រហែស​យ៉ាង​ខ្លាំង ហើយ​រឿង​នេះ​នឹង​ត្រូវ​ស៊ើបអង្កេត​យ៉ាង​ហ្មត់ចត់ ។

គួរបញ្ជាក់ថា ភាពតានតឹងថ្មីដែលបានផ្ទុះឡើងនៅមជ្ឈិមបូព៌ាបានអូសបន្លាយពេលដល់សប្ដាហ៍ទី ៣ ហើយ បន្ទាប់ពីក្រុមហាម៉ាស់បានបើកការវាយប្រហារមកលើទឹកដីអ៊ីស្រាអែលចេញពីតំបន់ហ្គាហ្សាស្ទ្រីបកាលពីព្រឹកព្រលឹមថ្ងៃទី៧ ខែតុលា ដោយបានសម្លាប់មនុស្សជាង ១,៤០០ នាក់ ដែលភាគច្រើនជាជនស៊ីវិល ។

ចំណែកនៅតំបន់ហ្គាហ្សាវិញ ក្រសួងសុខាភិបាលដែលគ្រប់គ្រងដោយក្រុមហាម៉ាស់បាននិយាយថា ការឆ្លើយតបរបស់អ៊ីស្រាអែលបានសម្លាប់មនុស្សជាង ៧,៧០០ នាក់ ហើយក្នុងនោះមានក្រុមសកម្មប្រយុទ្ធហាម៉ាស់ជាង ១,៥០០ នាក់នៅក្នុងទឹកដីអ៊ីស្រាអែល ខណៈប្រជាជន ២.៣ លាននាក់កំពុងខ្វះជំនួយមនុស្សធម៌ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ប្រធានរដ្ឋសភាថ្មី អាមេរិក ដាក់ចេញការងារដំបូងផ្ដោតសំខាន់ជួយដល់ អ៊ីស្រាអែល