មេទ័ពអ៊ីរ៉ង់ ប្តេជ្ញាធ្វើគ្រប់យ៉ាង ឲ្យតែក្រុមហាម៉ាស ឈ្នះសង្គ្រាមលើ អ៊ីស្រាអែល

ប្រមុខកងកម្លាំង Quds របស់អ៊ីរ៉ង់ បានប្តេជ្ញាធ្វើគ្រប់បែបយ៉ាង ដើម្បីគាំទ្រក្រុមហាម៉ាសនៅក្នុងសង្គ្រាមជាមួយអ៊ីស្រាអែល ហើយអះអាងថា ចលនាសកម្មប្រយុទ្ធប៉ាឡេស្ទីន កំពុងឆ្ពោះទៅរកជ័យជម្នះដ៏គួរឲ្យចាប់អារម្មណ៍នៅក្នុងតំបន់ហ្គាហ្សា។

នៅក្នុងលិខិតមួយផ្ញើទៅកាន់មេបញ្ជាការកងពលតូច Ezzedine al-Qassam ដែលជាសម្ព័ន្ធក្រុមប្រដាប់អាវុធហាម៉ាស, មេទ័ព Quds លោក Esmail Qaani ប្រកាសថា “ទីក្រុងតេហេរ៉ង់និងសម្ព័ន្ធមិត្តរបស់ខ្លួន មិនអនុញ្ញាតឲ្យសត្រូវសាហាវឃោរឃៅនេះ និងអ្នកដែលឈរនៅពីក្រោយពួកគេ ដណ្តើមយកតំបន់ហ្គាហ្សានិងប្រជាជនវីរភាពរបស់ខ្លួនបានឡើយ។ យើងនឹងធ្វើអ្វីគ្រប់យ៉ាងដែលចាំបាច់នៅក្នុងសមរភូមិជាប្រវត្តិសាស្ត្រនេះ”។ 

លិខិតនេះ ចេញផ្សាយកាលពីថ្ងៃព្រហស្បតិ៍ទី១៦ខែវិច្ឆិកា ដោយទីភ្នាក់ងារព័ត៌មានសាធារណរដ្ឋឥស្លាម (IRNA) ពោលគឺមួយថ្ងៃបន្ទាប់ពី Reuters រាយការណ៍ថា មេដឹកនាំកំពូលរបស់អ៊ីរ៉ង់ លោក Ayatollah Ali Khamenei បានជូនដំណឹងដល់ក្រុមហាម៉ាសថា ប្រទេសរបស់លោកនឹងមិនចូលរួមដោយផ្ទាល់នៅក្នុងសង្គ្រាមហ្គាហ្សាឡើយ។

ទោះបីជាយ៉ាងណាក៏ដោយ មន្ត្រីអ៊ីរ៉ង់ មិនទាន់ធ្វើអត្ថាធិប្បាយលើរបាយការណ៍របស់ Reuters ទេ។

សូមបញ្ជាក់ កងកម្លាំង Quds គឺជាដៃប្រតិបត្តិការបរទេស របស់កងឆ្មាំបដិវត្តន៍ឥស្លាមអ៊ីរ៉ង់ (IRGC) ដែលទទួលខុសត្រូវចំពោះបេសកកម្មយោធា និងចារកម្មហួសព្រំដែនអ៊ីរ៉ង់។

លោក Qaani បានចូលកាន់អំណាចជាមេទ័ពក្នុងឆ្នាំ២០២០ បន្ទាប់ពីអ្នកស្នងតំណែងមុនគឺលោក Qasem Soleimani ត្រូវបានសម្លាប់ក្នុងការវាយប្រហារដោយយន្តហោះគ្មានមនុស្សបើករបស់សហរដ្ឋអាមេរិក នៅជិតទីក្រុងបាកដាដ នៃប្រទេសអ៊ីរ៉ាក់៕

ប្រែសម្រួល៖ Vann Vann

ប្រភព៖ RT

ចុចអាន៖ លោក Netanyahu៖ គ្មានអ្នកណាបានសុខឡើយ បើតំបន់មជ្ឈិមបូព៌ាធ្លាក់ក្នុងដៃ អ៊ីរ៉ង់