សមិទ្ធផលរបស់លោក Mano Polking ក្រោយដឹកនាំថៃជាង២ឆ្នាំ

ក្រោយចាប់ផ្តើម​បាន២ប្រកួត ក្នុងវគ្គជ្រមុះជុំទី២ ជើងឯកពិភពលោក World Cup ឆ្នាំ២០២៦ ក្នុងតំបន់អាស៊ី សហព័ន្ធបាល់ទាត់ថៃ បានប្រកាសជាផ្លូវការក្នុងការបញ្ចប់កុងត្រាជាមួយលោក Mano Polking គ្រូបង្វឹកក្រុមជម្រើសជាតិ​ថៃ។

លោក Mano Polking បានចំណាយពេល២​ឆ្នាំ​ និង៥៦​ថ្ងៃ ក្នុងការដឹកនាំក្រុមជម្រើសជាតិថៃ។ ក្នុង​រយៈ​ពេល​នេះ លោក​ដឹកនាំក្រុមជម្រើសជាតិថៃបាន៣៧ប្រកួត ឈ្នះ២១លើក ស្មើ៨លើក និងចាញ់៨លើក រកគ្រាប់បាល់សរុបបាន៦៩គ្រាប់ របូតគ្រាប់បាល់៣៧គ្រាប់។ លោក​បាន​ជួយ​ថៃ​ឲ្យ​ឈ្នះ​ជើងឯកលំដាប់ទី១អាស៊ាន​ AFF Championship ២លើក (ឆ្នាំ ២០២០ និង២០២២), ឈ្នះ​មេដាយ​ប្រាក់​ស៊ីហ្គេម ឆ្នាំ​២០២១, ទទួល​បាន​ជើង​ឯក​រង​ពាន King Cup, ឆ្លងផុតទៅកាន់ជុំចុងក្រោយ Asian Cup ឆ្នាំ២០២៣។

ការប្រកួតចុងក្រោយរបស់លោក​គឺ​បាន​យក​ឈ្នះ​សិង្ហបុរី ៣-១​ វគ្គជម្រុះជុំទី២ World Cup ឆ្នាំ២០២៦ ក្នុងតំបន់អាស៊ី កាល​ពី​ថ្ងៃទី២១ ខែ​វិច្ឆិកា និង​បញ្ចប់​កុងត្រា​នៅ​ថ្ងៃ​ទី​២២ ខែ​វិច្ឆិកា។

ក្រុមជម្រើសជាតិថៃក៏ជាប់កាតព្វកិច្ចក្នុងការប្រកួតវគ្គសំន្សពិន្ទុក្នុងពូលពានរង្វាន់ AFC Asian Cup ឆ្នាំ២០២៣ នាពេលខាងមុខ​ដែល​ស្ថិតក្នុងពូល F រួមមាន​អារ៉ាប៊ីសាអ៊ូឌីត​ កៀហ្ស៊ីស៊ីស្ថាន និងអូម៉ង់ គ្រោង​ចាប់ផ្ដើម​នៅ​ថ្ងៃទី១៦ ខែមករា ឆ្នាំ២០២៤។ ឆ្នាំ២០២៤ ថៃ​ក៏ត្រូវបន្តភារកចិ្ចរបស់ខ្លួនក្នុងវគ្គជម្រុះ World Cup ឆ្នាំ២០២៦ ​ដែល​​ស្ថិតក្នុងពូល C​ មាន​កូរ៉េខាងត្បូង ចិន និង​ សិង្ហបុរី៕

អត្ថបទ៖ ផា រតនា