កម្ពុជា-គុយបា ចង់ឱ្យមានកិច្ចសហប្រតិបត្តិការរវាងប្រទេសទាំងពីរក្នុងវិស័យអធិការកិច្ច

ស្ថានទូតគុយបា នឹងធ្វើជាស្ពានភ្ជាប់ទំនាក់ទំនងរវាងក្រសួងអធិការកិច្ចកម្ពុជា និងស្ថាប័នមានសមត្ថកិច្ចប្រហាក់ប្រហែលរបស់គុយបា ដើម្បីចាប់ផ្ដើមកិច្ចសហប្រតិបត្តិការក្នុងវិស័យអធិការកិច្ចរវាងប្រទេសទាំងពីរ។ នេះជាការឯកភាពគ្នារវាងរដ្ឋមន្ត្រីក្រសួងអធិការកិច្ច និងឯកអគ្គរដ្ឋទូតគុយបាប្រចាំកម្ពុជា ក្នុងជំនួបទ្វេភាគី នាថ្ងៃទី៥ ខែធ្នូ ឆ្នាំ២០២៣។

នៅក្នុងជំនួបនេះ លោក ហួត ហាក់ រដ្ឋមន្ត្រីក្រសួងអធិការកិច្ច បានប្រាប់លោកស្រីឯកអគ្គរដ្ឋទូតនូវស្ថានភាពដ៏ល្អប្រសើររបស់កម្ពុជាលើគ្រប់ទិដ្ឋភាព ទាំងនយោបាយ សង្គម សេដ្ឋកិច្ច ដែលបានបង្កបរិយាកាសអនុគ្រោះ និងអំណោយផលដល់ការអភិវឌ្ឍសង្គមជាតិ ទេសចរណ៍ និងទាក់ទាញការវិនិយោគផ្ទាល់ពីបរទេស។ ទន្ទឹមនេះ លោករដ្ឋមន្ត្រី ក៏បានលើកឡើងអំពីបេសកកម្ម និងរចនាសម្ព័ន្ធរបស់ក្រសួង ជាពិសេសភាពចាំបាច់ក្នុងការប្តូរឈ្មោះពីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច ទៅជាក្រសួងអធិការកិច្ច ក្នុងនីតិកាលទី៧នេះ។

លោករដ្ឋមន្ត្រី ហួត ហាក់ បានបញ្ជាក់ថា ការប្ដូរឈ្មោះទៅជាក្រសួងអធិការកិច្ចនេះ គឺស្របតាមកម្មវិធីនយោបាយរបស់រាជរដ្ឋាភិបាល និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល ក្រោមការដឹកនាំរបស់សម្តេចធិបតី ហ៊ុន ម៉ាណែត ដែលស្នូលនៃយុទ្ធសាស្ត្របញ្ចកោណដំណាក់កាលទី១ គឺផ្តោតលើការកែទម្រង់ ការពង្រឹងអភិបាលកិច្ច និងការធ្វើទំនើបកម្មស្ថាប័នរដ្ឋឱ្យក្លាយជារដ្ឋបាលសាធារណៈប្រកបដោយសមត្ថភាពខ្ពស់ ខ្លាំង វៃឆ្លាត និងស្អាតស្អំ។

ស្ថិតក្នុងឱកាសនោះ លោករដ្ឋមន្ត្រី ក៏បានប្រាប់បង្ហាញនូវផែនការសកម្មភាពចំនួន៤ របស់ក្រសួងអធិការកិច្ច គឺការពង្រឹងសមត្ថភាពស្ថាប័ន ការកសាង និងអភិវឌ្ឍន៍មូលធនមនុស្ស ការរៀបចំច្បាប់ និងលិខិតបទដ្ឋានគតិយុត្តក្នុងសមត្ថកិច្ចក្រសួងដែលរាជរដ្ឋាភិបាលប្រគល់ឱ្យ និងការថែរក្សាបរិយាកាសសុខដុមនីយកម្មនៅក្នុងក្រសួង និងអង្គភាពចំណុះទាំងនៅថ្នាក់ជាតិ និងថ្នាក់ក្រោមជាតិ។

ដើម្បីឆ្លើយតបទៅនឹងភារកិច្ចចម្បងរបស់ក្រសួងអធិការកិច្ច ក៏ដូចជាការពង្រីកនូវវិស័យអធិការកិច្ចរវាងប្រទេសទាំងពីរ កម្ពុជា និងគុយបា លោករដ្ឋមន្រ្តី ហួត ហាក់ និងលោកស្រីឯកអគ្គរដ្ឋទូតគុយបាប្រចាំកម្ពុជា បានឯកភាពឱ្យស្ថានទូតគុយបា នឹងធ្វើជាស្ពានភ្ជាប់ទំនាក់ទំនងរវាងក្រសួងអធិការកិច្ច និងស្ថាប័នដែលមានសមត្ថកិច្ចប្រហាក់ប្រហែលនៅប្រទេសគុយបា ដើម្បីចាប់ផ្ដើមកិច្ចសហប្រតិបត្តិការនៅក្នុងវិស័យអធិការកិច្ច។

ជាមួយគ្នានេះ ភាគីទាំងពីរ ក៏បានឯកភាពពិនិត្យមើលលទ្ធភាពនៃការចុះអនុស្សរណៈនៃការយោគយល់នៅក្នុងវិស័យអធិការកិច្ច និងឯកភាពក្នុងការរៀបចំការផ្លាស់ប្តូរទស្សនកិច្ចរវាងប្រតិភូនៃប្រទេសទាំងពីរ ដើម្បីសិក្សាផ្លាស់ប្តូរបទពិសោធគ្នាទៅវិញទៅមកលើវិស័យអធិការកិច្ច ផងដែរ៕