បង្កើតកម្មវិធីប្រឹក្សាតាមប្រព័ន្ធអេឡិចត្រូនិក​បង្ហាញជំនាញនិងអាជីពដល់សិស្សរៀបចំផែនការ​ទៅថ្ងៃអនាគត

ក្រសួងអប់រំយុវជននិងកីឡាបានបង្កើតកម្មវិធីប្រឹក្សាតាមប្រព័ន្ធអេឡិចត្រូនិក “ត្រីវិស័យ (TreyVisay)” ដើម្បីបង្ហាញជំនាញសិក្សា អាជីពនិងព័ត៍មានទីផ្សារការងារដល់សិស្សសម្រាប់រៀបចំផែនការទៅថ្ងៃអនាគត។

លោកស្រី ឃួន វិច្ឆិកា អ្នកនាំពាក្យក្រសួងអប់រំយុវជននិងកីឡាបានមានប្រសាសន៍នៅព្រឹកថ្ងៃទី ០៩ ធ្នូនេះដោយបានធ្វើការណែនាំដល់គ្រឹះស្ថានមធ្យមសិក្សាទាំងអស់ ចូលរួមផ្សព្វផ្សាយកម្មវិធីប្រឹក្សាតាមប្រព័ន្ធអេឡិចត្រូនិក “ត្រីវិស័យ (TreyVisay)” (កំណែថ្មី 2.0.0) ដែលជាកម្មវិធីទូរសព្ទ សម្រាប់ឱ្យសិស្សធ្វើស្វ័យវាយតម្លៃអំពីបុគ្គលិកលក្ខណៈ មុខរបរ ឈ្វេងយល់ព័ត៌មានអំពីមុខជំនាញសិក្សា ព័ត៌មានអាជីព គ្រឹះស្ថានឧត្ដមសិក្សា និងព័ត៌មានទីផ្សារការងារ ដើម្បីជួយដល់ការរៀបចំផែនការសិក្សា និងអាជីពការងារនាថ្ងៃអនាគតរបស់សិស្ស បានល្អប្រសើរ។

លោកស្រីបានពន្យល់បន្ថែមថា «កម្មវិធីនេះដើម្បីតម្រង់ទិសដល់ប្អូនៗដើម្បីឱ្យគាត់បានដឹងពីអាជីពនិងវិជ្ជាជីវៈនានាដែលគាត់អាចចាប់យកអនុវត្តបានព្រោះក្នុងអត្ថបទឬវីដេអូដែលបង្ហាញនៅក្នុងកម្មវិធីថាតើអាជីពនីមួយៗជាអ្វីនិងគាត់ត្រូវប្រឈម​នឹងបញ្ហាអ្វីខ្លះ និងមានការងារអ្វីខ្លះដែលគាត់ត្រូវធ្វើប្រចាំថ្ងៃហើយអំពីមនុស្សអនុវត្តអាជីពជាដើមដើម្បីប្រកបអាជីពនឹងបាននិងត្រូវធ្វើម៉ិចខ្លះ»។

លោកស្រីបានបន្តទៀតថា កម្មវិធីនេះពិតជាមានសារសំខាន់ណាស់សម្រាប់សិស្ស ដោយសារតែទាក់ទិននឹងអនាគតរបស់សិស្ស បើកាលណាសិស្សអត់បានដឹងពីព័ត៍មានអាជីព និងវិជ្ជាជីវៈផ្សេងៗនិងវិធីក្នុងការចាប់យកអាជីព​បានទេជូនកាល អាចនឹងបាត់បង់ឱកាសអត់ដឹងថាតើអាចធ្វើអីបានអ្វីនៅពេលគាត់ចូលចិត្តបំណិនអ្វីមួយដែលមានទេពកោសល្យ។

លោកស្រីបានចាត់ទុកកម្មវិធីនេះគឺជាត្រីវិស័យមួយជួយចង្អុលផ្លូវនិងតម្រង់ទិសប្អូនៗ ដើម្បីចាប់យកអាជីពត្រឹមត្រូវហើយឆ្លើយតបទៅនឹងខ្លួនគាត់ក៏ដូចជានៅក្នុងទីផ្សារការងារផងដែរ៕

អត្ថបទ៖ សំអឿន