កម្ពុជា​លើក​យុទ្ធសាស្រ្ត​គន្លឹះ ៧ ចំណុច​ដាក់ជូនសន្និសីទពិភពលោក​ពីការប្រែប្រួល​អាកាសធាតុ

នៅសន្និសីទកំពូលបណ្តាភាគីនៃអនុសញ្ញាក្របខ័ណ្ឌ សហប្រជាជាតិស្តីពីការប្រែប្រួលអាកាសធាតុលើកទី២៨ (COP28) និងកិច្ចប្រជុំកំពូលពាក់ព័ន្ធ នៅទីក្រុងឌូបៃ ប្រទេសអេមីរ៉ាតអារ៉ាប់រួម តំណាង​កម្ពុជាបាន​ថ្លែងសន្ទរកថាគន្លឹះ​និង​គោលនយោបាយរបស់កម្ពុជាលើឆាកអន្តរជាតិស្តីពីការប្រែប្រួលអាកាសធាតុ។

លោក អ៊ាង សុផល្លែត រដ្ឋមន្រ្តី​ក្រសួង​បរិស្ថាននៅក្នុងដំណើរទៅចូលរួមសន្និសីទបាន​ថ្លែង​ថា កម្ពុជា​បានធ្វើការប្តេជ្ញាចិត្តដើម្បីចូលរួមចំណែកក្នុងការទប់ស្កាត់ និងកាត់បន្ថយការប្រែប្រួលអាកាសធាតុ។ លោករដ្ឋមន្រ្តី​បានលើក​យក​យន្តការនិងយុទ្ធសាស្រ្តសំខាន់ចំនួន ៧ របស់រដ្ឋាភិបាល​កម្ពុជា​ដាក់ជូននិងពិភាក្សាក្នុងសន្និសីទពិភពលោកនេះរួមមាន៖

ទី១៖ កម្ពុជាបានធ្វើការប្តេជ្ញាចិត្ត លុបចោលគម្រោងរោងចក្រអគ្គិសនីដើរដោយធ្យូងថ្ម ៧០០MW ជំនួសមកវិញដោយ រោងចក្រអគ្គិសនី ដើរដោយឧស្ម័ន LPG វិញ។
ទី២៖ ប្រទេសកម្ពុជាអភិវឌ្ឍថ្មីនៃទំនប់ស្តុកទឹក ដើម្បីផលិតថាមពលអគ្គិសនីស្អាត ១០០០ មេហ្គាវ៉ាត់​ឱ្យបានមុនឆ្នាំ​២០២៨។
ទី៣៖ រាជរដ្ឋាភិបាលកម្ពុជា តាមរយៈ​ក្រសួងបរិស្ថាន បង្កើនថាមពលកកើតឡើងវិញដែលភាគច្រើនជាថាមពលពន្លឺព្រះអាទិត្យ ថាមពលវារីអគ្គិសនី និងថាមពលខ្យល់ឲ្យបានដល់កម្រិត ៧០%។
ទី៤៖ យុទ្ធសាស្ត្រកម្ពុជាស្អាត តាមរយៈការកាត់បន្ថយការបំពុលបរិស្ថានដោយថង់ប្លាស្ទិក និងសំណល់រឹងនិងរាវ ដែលមានការចូលរួមពីប្រជាពលរដ្ឋកម្ពុជាជាង ៣ លាននាក់ និងកំពុងកើនឡើងបន្តបន្ទាប់។
ទី៥៖ យុទ្ធសាស្ត្រកម្ពុជាបៃតងតាមរយៈការដាំដើមឈើទាំងតាមទីវាលនិងតំបន់ការពារយ៉ាងតិចចំនួន ១ លានដើម ក្នុងមួយឆ្នាំពង្រីកគម្របព្រៃឈើបាន ៦០%នៅឆ្នាំ២០៥០។
ទី៦៖ កម្ពុជាបន្តមិនអនុញ្ញាតឱ្យបង្កើតរោងចក្រផលិតអគិ្គសនីដោយប្រើធ្យូងថ្មនៅកម្ពុជា។
ទី៧៖ បន្តមិនអនុញ្ញាតឲ្យសង់វារីអគ្គិសនីកាត់ទន្លេមេគង្គឡើយ។

សន្និសីទកំពូលបណ្តាភាគីនៃអនុសញ្ញាក្របខ័ណ្ឌសហប្រជាជាតិស្តីពីការប្រែប្រួលអាកាសធាតុលើកទី២៨ (COP28) ចាប់ផ្តើមបើកជាផ្លូវការនៅថ្ងៃទី៣០ ខែវិច្ឆិកា ឆ្នាំ២០២៣ ដោយមានមេដឹកនាំរដ្ឋភាគីចំនួន ១៩៦ ប្រទេស បុគ្គលល្បីៗ អ្នកវិទ្យាសាស្រ្ត តំណាងអង្គការសហប្រជាជាតិ ដៃគូអភិវឌ្ឍន៍ អង្គការសង្គមស៊ីវិល ប្រទេសអ្នកសង្កេតការណ៍ អ្នកសារព័ត៌មានចូលរួមសរុបចំនួនជិត ៧ ម៉ឺននាក់។

បន្ទាប់មកសេចក្តីប្រកាសរួមស្តីពីប្រព័ន្ធស្បៀងដែលមានភាពធន់និរន្តរភាពកសិកម្ម និងសកម្មភាពអាកាសធាតុត្រូវបាន​ប្រកាសជាផ្លូវនៅ COP28 នាទីក្រុងឌុយបៃ។

តំណាង​កម្ពុជា​ដែលមាន​លោក អ៊ាង សុផល្លែត បានលើកឡើងពីការចូលរួមនិងគាំទ្រយ៉ាងពេញទំហឹងជាមួយការប្ដេជ្ញាចិត្តរបស់កម្ពុជាលើសេចក្ដីប្រកាសជាសកលស្ដីពីនិរន្តភាពប្រព័ន្ធស្បៀងវិស័យកសិកម្ម និងសកម្មភាពឆ្លើយតបនឹងការប្រែប្រួលអាកាសធាតុ ដែលបានផ្ដោតលើអាទិភាពចំនួន ៣ រួមមាន៖

ទី១៖ ការលើកកម្ពស់ជីវភាពរស់នៅរបស់សហគមន៍មូលដ្ឋាន ដែលងាយរងគ្រោះដោយសារផលប៉ះពាល់នៃការប្រែប្រួលអាកាសធាតុ។
ទី២៖ ការតស៊ូមតិសម្រាប់សន្តិសុខស្បៀង និងសុខុមាលភាពអាហារូបត្ថម្ភ សម្រាប់អ្នកដែលត្រូវការជំនួយជាពិសេស អ្នកដែលជួបប្រទះការខាតបង់ និងការខូចខាតពីគ្រោះមហន្តរាយធម្មជាតិ ដែលទាក់ទងនឹងការប្រែប្រួលអាកាសធាតុ។
និងទី៣៖ ពង្រីកការអនុវត្តកសិកម្មឆ្លាតវៃ និងយុទ្ធសាស្ត្របញ្ចេញកាបូនទាប ជាធាតុផ្សំសំខាន់នៃការសម្របខ្លួន និងកិច្ចខិតខំប្រឹងប្រែងកាត់បន្ថយអាកាសធាតុ»។

បណ្តាប្រមុខដឹកនាំប្រទេសជាង ១២០ ក្នុងនោះកម្ពុជាដែលតំណាងដោយ​លោក អ៊ាង សុផល្លែត បានអនុម័ត​សេចក្តីប្រកាស​រួមជាផ្លូវការស្តីពីប្រព័ន្ធស្បៀង ដែលមានភាពធន់និរន្តរភាពកសិកម្មនិងសកម្មភាពអាកាសធាតុ នៅក្នុងក្របខ័ណ្ឌនៃសន្និសីទ COP28។ សារៈសំខាន់នៃប្រកាសរួមនេះមានខ្លឹមសារស្របទៅនឹងការតាំងចិត្តរបស់រាជរដ្ឋាភិបាល ស្តីពីកសិកម្មវៃឆ្លាត ការកាត់បន្ថយការបញ្ចេញកាបូន និងការអភិវឌ្ឍដោយចីរភាព។

នៅក្នុងដំណើរបេសកកម្ម តំណាងកម្ពុជាក៏​​បាន​ចូលរួមកិច្ចប្រជុំពហុភាគី ទ្វេភាគី ជាច្រើនផ្សេងទៀត។ ក្នុងជំនួបនីមួយៗ កម្ពុជា​បានលើកឡើងអំពីវិស័យអាទិភាព និងការវិនិយោគបៃតងនៅកម្ពុជា ការបង្កើនគម្របព្រៃឈើឲ្យបាន ៦០% ការលើកកម្ពស់ជីវភាពសហគមន៍ តាមរយៈការដាំឈើ ឬស្សីជាដើម និងការជំរុញកម្ពុជាស្អាត តាមរយៈយុទ្ធនាការមិនប្រើថង់ប្លាស្ទិក ស្របតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា និងជាពិសេសគាំទ្រ ចំពោះយុទ្ធសាស្ត្រចក្រាវិស័យបរិស្ថាន ដែលបានផ្តល់អាទិភាពទៅ លើ ភាពស្អាត ភាពបៃតង និង ចីរភាព៕