សេចក្ដីជូនដំណឹង

អភិបាលរាជធានីភ្នំពេញ ផ្ញើសាររំលែកទុក្ខចំពោះការយាងចូលទិវង្គតរបស់ សម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស

បានផុស

២ years មុន

នៅ

ថ្ងៃអង្គារ ២៧ កុម្ភៈ ២០២៤

ដោយ

ក្នុងនាមក្រុមប្រឹក្សា គណៈអភិបាល មន្ត្រីរាជការ កងកម្លាំង ប្រជាពលរដ្ឋ ពុទ្ធបរិស័ទទាំងអស់ ក្នុងរាជធានីភ្នំពេញ និង ក្នុងនាមខ្ញុំព្រះករុណា ពិតជាមានសេចក្ដីរន្ធត់ចិត្តឥតឧបមា និងមានសេចក្ដីក្រៀមក្រំបំផុត ដោយបានទទួលដំណឹងអំពីការយាងចូលទិវង្គតរបស់ សម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជ នៃព្រះរាជាណាចក្រកម្ពុជា ក្នុងសាយណ្ហសម័យ នាថ្ងៃចន្ទ ២ រោច ខែមាឃ ឆ្នាំថោន បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី ២៦ ខែកុម្ភៈ ឆ្នាំ ២០២៤ វេលាម៉ោង ១៧ និង ៤០ នាទី នៅវត្តឧណ្ណាលោម រាជធានីភ្នំពេញ ក្នុងព្រះជន្ម ៩៣ ព្រះវស្សា ដោយព្រះជរាពាធ។

ស្ថិតក្នុងសមាន មានទុក្ខ វិយោគសោកស្ដាយ ស្រណោះអាឡោះអាល័យជាពន់ពេក រកអ្វីប្រៀបផ្ទឹមពុំបាននេះ ខ្ញុំព្រះករុណា សូមចូលរួមរំលែកទុក្ខ ប្រកបដោយសេចក្ដីក្ដុកក្ដួលជាទីបំផុត ចំពោះការបាត់បង់នូវមហាវីរសង្ឃកំពូល នៃព្រះរាជាណាចក្រកម្ពុជា ដែលពេញមួយព្រះជន្មរបស់ សម្តេច បានលះបង់អស់ព្រះកាយពល សាងព្រះផ្នួស បូជា ក្នុងវិស័យព្រះពុទ្ធ ពុទ្ធសាសនា និងចូលរួមលើកកម្ពស់ការរស់ឡើងវិញ នៃព្រះពុទ្ធសាសនាក្នុងប្រទេសកម្ពុជា ចាប់តាំងពីថ្ងៃជ័យជម្នះ ៧ មករា ឆ្នាំ ១៩៧៩ ជាពិសេសព្រះអង្គបានធ្វើពលិកម្មដ៏ខ្ពង់ខ្ពស់ ធ្វើពលិកម្មដ៏ខ្ពង់ខ្ពស់បំផុត បូជាថ្វាយ ជាតិ សាសនា ព្រះមហាក្សត្រ ដោយបានបង្កើតគណៈសង្ឃកម្ពុជាឡើងវិញ រហូតដល់ពេលបច្ចុប្បន្ននេះ៕