សេដ្ឋកិច្ច

ថៃគ្រោងចេញច្បាប់ ដើម្បីប្រមូលពន្ធអប្បបរមាក្នុងអត្រាជាសកល ពីក្រុមហ៊ុនពហុជាតិ

បានផុស

២ years មុន

នៅ

ថ្ងៃពុធ ៥ មិថុនា ២០២៤

ដោយ

អនុរដ្ឋមន្ត្រីក្រសួងហិរញ្ញវត្ថុថៃ លោក Julapun Amornvivat បាននិយាយកាលពីថ្ងៃអង្គារថា ក្រសួងកំពុងត្រៀមច្បាប់ស្ដីពីការប្រមូលពន្ធអប្បបរមាក្នុងអត្រាសកលពីគ្រប់ក្រុមហ៊ុនពហុជាតិ ដើម្បីដាក់ឱ្យគណៈរដ្ឋមន្ត្រីអនុម័តក្នុងរយៈពេល២សប្ដាហ៍ខាងមុខ។ នេះបើតាមការចុះផ្សាយរបស់សារព័ត៌មានក្នុងស្រុក The Nation។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Julapun បានបន្ថែមថា នៅពេលដែលអនុម័តរួច ច្បាប់នេះនឹងជួយនាយកដ្ឋានចំណូលថៃ ប្រមូលប្រាក់បានរហូតដល់ ២០ ប៊ីលានបាតបន្ថែម ពីក្រុមហ៊ុនពហុជាតិជារៀងរាល់ឆ្នាំ។ លោកបានគូសបញ្ជាក់ថា ថៃបានប្តេជ្ញាចិត្តក្នុងការអនុម័តច្បាប់នេះ ស្របតាមកិច្ចព្រមព្រៀងរបស់ប្រទេសជាមួយអង្គការសម្រាប់កិច្ចសហប្រតិបត្តិការសេដ្ឋកិច្ច និងអភិវឌ្ឍន៍ (OECD)។

បើតាមលោកអនុរដ្ឋមន្រ្តីដដែល បញ្ហាពន្ធសកលត្រូវបានពិភាក្សាក្នុងកិច្ចប្រជុំក្រុមប្រឹក្សារដ្ឋមន្ត្រីសេដ្ឋកិច្ចកាលពីថ្ងៃទី ២៧ ខែឧសភា ហើយក្រុមប្រឹក្សាភិបាលនៃការវិនិយោគបានបង្ហាញពីការព្រួយបារម្ភ អំពីការពន្យារពេលក្នុងការអនុម័តច្បាប់នេះ។

លោកបន្តថា ច្បាប់ដដែលអាចនឹងត្រូវអនុវត្តចូលជាធរមាននៅឆ្នាំ ២០២៥ ដូចបានព្រមព្រៀងគ្នាដំបូង ខណៈការអនុម័ត និងវិសោធនកម្មច្បាប់ពាក់ព័ន្ធផ្សេងៗ គួរតែបញ្ចប់នៅចុងឆ្នាំនេះ។

គួរគូសបញ្ជាក់ថា អង្គការ OECD បានផ្តួចផ្តើមគំនិតនៃការយកពន្ធអប្បបរមាជាសកល ដើម្បីបញ្ឈប់ក្រុមហ៊ុនពហុជាតិ ពីការផ្លាស់ទីទៅប្រទេសដែលយកពន្ធទាប។ OECD តម្រូវឱ្យប្រទេសសមាជិកទាំងអស់ កំណត់អត្រាពន្ធលើប្រាក់ចំណូលសាជីវកម្មជាអប្បបរមា ១៥ ភាគរយ ដើម្បីកុំឱ្យប្រទេសផ្សេងទៀតយកពន្ធទាបក្នុងគោលបំណងទាក់ទាញការវិនិយោគ។ ប្រសិនបើក្រុមហ៊ុនបុត្រសម្ព័ន្ធណាមួយ បង់ពន្ធតិចជាង ១៥ ភាគរយក្នុងប្រទេសណាមួយ នោះប្រទេសដែលមានក្រុមហ៊ុនមេតាំងទី អាចប្រមូលពន្ធលើសពីនោះ៕

Related Topics: