បច្ចុប្បន្ន App ក្រសួង និងស្ថាប័ន្ថរដ្ឋណាខ្លះ បានដាក់ដំណើរការ ឱ្យសាធារណជនប្រើប្រាស់? ដើម្បីអ្វី?

កម្មវិធី (App) របស់ក្រសួង និងស្ថាប័នរដ្ឋមួយចំនួន បានដាក់ដំណើរការឱ្យប្រើប្រាស់ជាសាធារណៈ ដើម្បីជាប្រយោជន៍សម្រាប់ប្រជាពលរដ្ឋ ងាយស្រួលក្នុងការស្វែងឯកសារផ្សេងៗ ព័ត៌មានទូទៅ ចុះបញ្ជី​ រាយការណ៍​ សាកសួរព័ត៌មាន និងតាមដានឯកសារស្នើសុំរបស់ខ្លួនជាដើម។ល។ ដោយពុំចាំបាច់ត្រូវចុះឡើងក្រសួង-ស្ថាប័នច្រើនដង។

កម្ពុជាថ្មី សូមណែនាំកម្មវិធីមួយចំនួន ដែលជាតម្រូវការនៃការប្រើប្រាស់ទូទៅបំផុត

១. ក្រសួងអប់រំយុវជន និង កីឡា
ក្រសួងអប់រំយុវជន និង កីឡា មានកម្មវិធី (App) ដែលសហការបង្កើតច្រើន ដោយផ្តោតលើគោលដៅអប់រំ និងអត្ថប្រយោជន៍ដល់សិស្សានុសិស្ស។ តែក្នុងនោះ កម្ពុជាថ្មី សូមលើកយកតែកម្មវិធី ៣ ប៉ុណ្ណោះ ដែលដាក់ឱ្យដំណើរការប្រើប្រាស់ជាសាធារណ គឺ MoEy E-Learning; TreyVisay និង អានលម្អិត

២. ក្រសួងសាធារណការ និងដឹកជញ្ជូន
ដើម្បីសម្រួលដល់សាធារណជន ក្នុងការស្វែងយល់កាន់តែច្បាស់ពីច្បាប់ចរាចរណ៍ផ្លូវគោក ក៏ដូចជាងាយស្រួលក្នុងការចុះបញ្ជីយានយន្ត និងសេវាផ្សេងៗជាដើមនោះ ក្រសួងសាធារណការ និងដឹកជញ្ជូន បានបញ្ចេញកម្មវិធី (App) ៣ រួមមាន ROAD CARE; GDLT, MPWT Service Tracking និង Cambodia Driving Rules ។ អានលម្អិត

៣. អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ
ដើម្បីធ្វើឱ្យបេសកម្មក្នុងការផ្តល់សេវារបស់ខ្លួន មានគុណភាព អគ្គនាយកដ្ឋានពន្ធដារ បានបង្កើតកម្មវិធី (App) មួយចំនួន ដោយមានបែងចែកមានមុខងារផ្សេងៗគ្នា សម្រាប់ពលរដ្ឋកម្ពុជា ងាយស្រួលក្នុងការទទួលបានព័ត៌មានពន្ធ គណនាពន្ធ និងប្រកាសពន្ធជាដើម។ល។ អានលម្អិត

៤. ក្រសួងការងារ និងបណ្តុះបណ្តាលវិជ្ជាជីវៈ
ក្រសួងការងារ និងបណ្តុះបណ្តាលវិជ្ជាជីវៈ បានបង្កើតកម្មវិធី ២ គឺ TVET 1.5M និង TVET E-Learning សម្រាប់កម្មវិធីបណ្តុះបណ្តាលបច្ចេកទេស និងវិជ្ជាជីវៈ ​ដែល​ផ្តោតលើយុវជនមកពីគ្រួសារក្រីក្រ និងគ្រួសារងាយរង​ហានិភ័យ ដើម្បីមានឱកាសការងារកាន់តែល្អប្រសើរ ក្នុងការបង្កើនប្រាក់ចំណូល និងជីវភាពរស់នៅ។ អានលម្អិត

៥. ក្រសួងព័ត៌មាន
ជាកម្មវិធីដែលប្រមូលផ្តុំដោយព័ត៌មាននៅក្នុងប្រទេស ពាក់ព័ន្ធនឹងព្រឹត្តិការណ៍ជាតិ ទូទៅ និងដំណឹងផ្សេងៗ ដែលអាចជឿទុកចិត្តបាន និងច្បាស់ការណ៍។

៦. អាជ្ញាធរជាតិប្រយុទ្ធប្រឆាំងគ្រឿងញៀន
NoDrug ជាកម្មវិធីថ្មីមួយ ដែលទើបដាក់ឱ្យដំណើរការជាផ្លូវការ កាលពីខែមេសាកន្លងទៅ ដើម្បីអនុញ្ញាតឱ្យប្រជាពលរដ្ឋ អាចចូលរួមរាយការណ៍ពីករណីគ្រឿងញៀន ទៅអាជ្ញាធរបានដោយសេរី និងសម្ងាត់។ អានលម្អិត

៧. អគ្គនាយកដ្ឋានអត្តសញ្ញាណកម្ម
អគ្គនាយកដ្ឋានអត្តសញ្ញាណកម្ម បានដាក់ដំណើរការកម្មវិធី ២ រួមមាន GDI Info និង GDI eServices ដើម្បីងាយស្រួលដល់ពលរដ្ឋកម្ពុជា មិនពិបាកទៅមកសង្កាត់-ខណ្ឌច្រើនដង ដើម្បីគ្រាន់តែសួរពីចម្ងល់ខ្លះៗ ទាក់ទងនឹងសេវាកម្មអត្តសញ្ញាណកម្មគ្រប់ប្រភេទ នូវលក្ខខណ្ឌស្នើសុំ ឬកែតម្រូវ។ អានលម្អិត

៨. អគ្គនាយកដ្ឋានអន្តោប្រវេសន៍
ដើម្បីធ្វើឱ្យដំណើរការនៃការមកការកាន់ព្រះរាជាណាចក្រកម្ពុជា កាន់តែងាយស្រួល និងលឿនរហ័ស អគ្គនាយកដ្ឋានអន្តោប្រវេសន៍ បានបង្កើតប្រព័ន្ធកម្មវិធីមួយនេះឡើង សម្រាប់អ្នកដំណើរទាំងអស់ក្នុងការរៀបចំ និងបញ្ជូនឯកសារចាំបាច់ទាំងអស់ជាមុន។ ទម្រង់ឌីជីថលថ្មីរួមមាន ទិដ្ឋាការអេឡិចត្រូនិកពេលមកដល់ ទម្រង់បែបបទអន្តោប្រវេសន៍ សេចក្តីប្រកាសសុខភាព និងសេចក្តីប្រកាសផ្ទាល់ខ្លួន។