អាកាសយានដ្ឋានអន្តរជាតិតេជោ សម្រេចបានការសាងសង់ជាង ៩០% ចំណាយអស់ $១,៣ ពាន់លាន

គិតត្រឹមថ្ងៃទី ០៥ ខែវិច្ឆិកា ឆ្នាំ ២០២៤ អាកាសយានដ្ឋានអន្តរជាតិតេជោ សម្រេចការសាងសង់​បាន​ជាង ៩០ ភាគរយ ចំណាយថវិកាជាង ១ ពាន់ ៣០០ លានដុល្លារ។ នេះបើយោងតាមរដ្ឋ​លេ​ខាធិការដ្ឋានអាកាស​ចរណ៍ស៊ីវិល។

លោក ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋាន​អាកាសចរណ៍​ស៊ីវិល បានបញ្ជាក់ឱ្យដឹងថា ការសាងសង់សំណង់ធំៗ និងសំខាន់ៗ នឹងបញ្ចប់នៅដំណាច់ឆ្នាំ ២០២៤ ហើយបើគ្មានអ្វីប្រែប្រួលនោះទេ អាកាស​យានដ្ឋាន​អន្តរជាតិតេជោ នឹងដាក់សម្ពោធ​ជាផ្លូវ​​ការនៅពាក់កណ្ដាលឆ្នាំ ២០២៥។

គម្រោង​វិនិយោគអាកាសយានដ្ឋានអន្តរជាតិតេជោ ក្រុង​តាខ្មៅ មាន​ទុន​វិ​និ​យោគ​ប្រមាណ ១ ៥០០​ លាន​ដុល្លារ​ពី​ការវិនិយោគ​រួមគ្នា​រវាង​ក្រុមហ៊ុន​វិនិយោគទុន​អា​ណិ​ក​​ជនកម្ពុជា ​(OCIC) និង​រដ្ឋា​ភិ​បាល​កម្ពុជា​។

គម្រោងព្រលានយន្តហោះអន្តរជាតិភ្នំពេញថ្មីដំណាក់កាលទី១ កំពុងសាងសង់ស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល និងមួយផ្នែកស្ថិតនៅស្រុកបាទី ខេត្តតាកែវ។

អាកាសយានដ្ឋានអន្តរជាតិភ្នំពេញថ្មី មាន៣ដំណាក់កាល គឺដំណាក់កាលទី១ សាងសង់រួចរាល់នៅឆ្នាំ ២០២៤ ខាងមុខអាចទទួលអ្នកដំណើរបានប្រមាណ ១៣ លាននាក់ក្នុងមួយឆ្នាំ ដំណាក់កាលទី២ នឹងបញ្ចប់នៅឆ្នាំ ២០៣០ ដែលអាចទទួលបានអ្នកដំណើរប្រមាណជា ៣០ លាននាក់ក្នុងមួយឆ្នាំ និងដំណាក់កាលចុងក្រោយ នឹងបញ្ចប់នៅឆ្នាំ ២០៥០ អាចនឹងទទួលបានអ្នកដំណើររហូតដល់ ៥០ លាននាក់ក្នុងមួយឆ្នាំ។

បើយោងតាមរដ្ឋលេខាធិការដ្ឋានអាកាស​ចរណ៍ស៊ីវិល គិតចាប់ពីខែមករា ដល់ខែតុលា ឆ្នាំ ២០២៤ កម្ពុជា ទទួលបានអ្នកដំណើរតាមជើងហោះហើរជិត ៥ លាននាក់ (៤ ៩៧៨ ៦៦៣) មានការកើនឡើង ២១ ភាគរយ បើធៀបនឹងរយៈពេលដូចគ្នានៅឆ្នាំ ២០២៣៕

អត្ថបទ៖ ឡេង ដេត