មហាជនហួសចិត្តនឹងអ្នកលក់ផលិតផលម្នាក់ ក្រោយដេញពេទ្យឯកទេសរោគស្ត្រីទៅរៀនឡើងវិញ

មហាជនមានការហួសចិត្តជាខ្លាំង ក្រោយម្ចាស់គណនីហ្វេសប៊ុក Zellinich Oung បានដេញពេទ្យឯកទេសរោគស្ត្រីមួយរូប ដែលតែងចែករំលែកចំណេះដឹងសុខភាពជូនសាធារណជន ឱ្យទៅរៀនឡើងវិញ បន្ទាប់ពីវេជ្ជបណ្ឌិតឯកទេសរូបនេះ បានលើកឡើងពីចំណុចខុសឆ្គងរបស់អ្នកលក់ផលិតផលសម្រស់រូបនោះ ទាក់ទងនឹង HPV ។

តាមរយៈវីដេអូជាង ៣នាទី វេជ្ជបណ្ឌិត ឯក ម៉េងលី ឯកទេសសម្ភពនិងរោគស្ត្រី បានធ្វើសេចក្តីកែតម្រូវលើវីដេអូដែល ម្ចាស់គណនីខាងលើ ពីបញ្ហានៃការឆ្លងមេរោគ HPV (human papilloma virus) ដែលអាចបណ្តាលឱ្យស្ត្រីកើតជំងឺមហារីកមាត់ស្បូន ជាហេតុដែលធ្វើឱ្យសាមុីខ្លួនមិនពេញចិត្តជាខ្លាំង។

បើតាមហ្វេសប៊ុកផេកអ្នកលក់ផលិតផលតាមអនឡាញរូបនោះ ( Oung Zellinich X Snow Blanc )បានបញ្ជាក់ពីការមិនពេញចិត្តរបស់ខ្លួន ដោយរៀបរាប់ដូច្នេះថា “វីដេអូដែលខ្ញុំលើកឡើងក៏និយាយឲ្យបងប្អូនប្រុងប្រយ័ត្ន ជំងឺឆ្លង ការមានដៃគូឲ្យចេះការពារបង គាត់បានយកតែក្បាលវីដេអូ ដែលពួក TikTok កាត់ original video ពេញខ្ញុំទៅ react គាត់ជាពេទ្យគាត់ត្រូវតែមានសីលធម៌ យកវីដេអូទាំងមូលទៅ react មិនមែនយកវីដេអូបាត់ក្បាល បាត់កន្ទុយទេបង“។

យ៉ាងណាមិញ ជុំវិញរឿងរ៉ាវនេះ មហាជនបានសម្តែងការហួសចិត្តចំពោះអ្នកលក់ផលិតផលរូបនោះ ដែលមិនត្រឹមតែមិនទទួលយកការកែតម្រូវពីពេទ្យឯកទេសប៉ុណ្ណោះទេ ថែមទាំងប្រើពាក្យមិនគប្បី និងដេញឱ្យអ្នកជំនាញទៅរៀនថែមទៀត។

ជុំវិញរឿងរ៉ាវនេះ អតីតប្រធានសិល្បករខ្មែរ អ្នកនាង ចន ចន្ទលក្ខិណា ក៏បានប្រតិកម្មហួសចិត្តនឹងនារីរូបនោះផងដែរ និងស្នើដល់ក្រសួងសុខាភិបាល ឱ្យវិធានការលើបុគ្គលដែលជាអ្នករកសុីលក់ផលិតផល Online មួយចំនួនតូច ដែលនិយមចេញវីដេអូបកស្រាយទាក់ទងនឹងបញ្ហាសុខភាព ទាំងគ្មានចំណេះនិងជំនាញ ឬឯកសារយោងបែបវិទ្យាសាស្ត្រច្បាស់លាស់។ លើសពីនេះ ថែមទាំងមាក់ងាយដល់វេជ្ជបណ្ឌិតដែលជាអ្នកជំនាញពេទ្យពិតប្រាកដថែមទៀត៕