ក្រសួងសុខាភិបាលអំពាវនាវឲ្យពលរដ្ឋទទួលទានបន្លែ និងផ្លែឈើស្រស់ឲ្យបានច្រើនដើម្បីបង្ការជំងឺមិនឆ្លង

ក្រសួងសុខាភិបាលបានធ្វើការអំពាវនាវដល់ប្រជាពលរដ្ឋទទួលទានបន្លែ និងផ្លែឈើស្រស់ឱ្យបានច្រើនព្រមទាំងកាត់បន្ថយការទទួលទានអំបិលដើម្បីបង្ការជំងឺមិនឆ្លងនានា ពិសេសជំងឺលើសសម្ពាធឈាម និងជំងឺបេះដូងសរសៃឈាម។

ក្រសួងសុខាភិបាលបានបន្តថា ដើម្បីបង្ការជំងឺលើសសម្ពាធឈាម ជំងឺបេះដូងសរសៃឈាម ប្រជាពលរដ្ឋត្រូវកាត់បន្ថយការដាក់ អំបិល ទឹកស៊ីអ៉ីវ ទឹកត្រី ប៊ីចេង ម្សៅស៊ុប ប្រេងខ្យង ទៅក្នុងអាហារពេលដាំស្ល កាត់បន្ថយការទទួលទានអាហារទាន់ចិត្ត និងអាហារកែឆ្នៃ កាត់បន្ថយការថែមគ្រឿងផ្សំ ទឹកជ្រលក់ទៅក្នុងអាហារពេលបរិភោគ និងទទួលទានបន្លែឱ្យបានច្រើន និងផ្លែឈើស្រស់។

ជាមួយគ្នានេះដែរ លោកសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាលបានណែនាំដល់មជ្ឈមណ្ឌលជាតិលើកកម្ពស់សុខភាពត្រូវ រៀបចំផែនការបន្ថែមក្នុងការផលិតសារអប់រំ និងស្ប៉តវីដេអូជុំវិញនឹងសុខភាព ការរស់នៅប្រជាពលរដ្ឋ លើកកម្ពស់សុខភាពស្រ្តី កុមារ ទារក ជាពិសេសបញ្ហាជំងឺទឹកនោមផ្អែម និងជំងឺផ្សេងៗ ដែលបណ្តាលមកពីការពិសាផ្អែម គ្រឿងស្រវឹង និងការជក់បារី។ លើសពីនេះ ធ្វើការតាមដាន វាស់វែងប្រសិទ្ធភាពសកម្មភាពអប់រំសុខភាព ដើម្បីកំណត់នូវលទ្ធផលដូចជាលទ្ធផលរយៈពេលវែងដែលនាំឱ្យមានការកាត់បន្ថយ អត្រាឈឺ អត្រាស្លាប់ និង
លទ្ធផលរយៈពេលខ្លីដូចជាការផ្លាស់ប្តូរឥរិយាបថ ជំរុញការដាក់គោលដៅប្រចាំឆ្នាំ និងធ្វើការអប់រំសុខភាព ដែលមានលក្ខណៈផ្អែកលើឯកសារភស្តុតាង និងគិតគូរធ្វើការផលិត បែបនវានុវត្តន៍ថ្មីៗ ទំរង់ថ្មីៗ ប្លែកៗ ប្រើប្រាស់តួថ្មីៗ
ដើម្បីបង្កើនភាពចម្រុះនៃការអប់រំ និងប្រសិទ្ធភាពនៃការអប់រំដើម្បីអភិវឌ្ឍវិស័យសុខាភិបាលឱ្យកាន់តែល្អប្រសើរថែមទៀតសំដៅឈានទៅសម្រេចបាននូវការគ្របដណ្តប់សុខភាពជាសកល៕

អត្ថបទ៖ សំអឿន