មន្ទីរកសិកម្មខេត្តកំពត ដឹកនាំប្រជាសហគមន៍ទស្សនកិច្ចសហគមន៍កសិកម្មទំនើបផ្ទះសំណាញ់ត្រាំកក់ដើម្បីស្វែងយល់បន្ថែម

កាលពីថ្ងៃទី១២ ខែមករា ឆ្នាំ២០២៥ លោក តេង វ៉ាន់ធឿន អនុប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពតបានប្រាប់ឱ្យដឹងថា ដោយមានការណែនាំពីលោកប្រធានមន្ទីរដោយមានការឆ្លើយតបទៅវក្ខុវិស័យរបស់ក្រសួង ជាមួយ​គោលនយោបាយអាទិភាពរបស់រាជរដ្ឋាភិបាល មន្ទីរបានដឹកនាំប្រជាសហគមន៍ចំនួន១៥រូប ដែលមកពីសហគមន៍កសិកម្មសាមគ្គីកូនសត្វ ស្ថិតនៅស្រុកទឹកឈូ និងសហគមន៍កសិកម្មបន្លែសុវត្ថិភាពព្រៃឈើនៀង ស្រុកឈូក មកចូលរួមធ្វើទស្សនកិច្ចសិក្សានៅសហគមន៍កសិកម្មទំនើបបន្លែផ្ទះសំណាញ់ត្រាំកក់ ក្នុងខេត្តតាកែវ។

ក្នុងដំណើរទស្សនកិច្ចនេះ អ្នកជំនាញស្នើឱ្យប្រជាពលរដ្ឋចូលរួមបង្កើតសហគមន៍កសិកម្មទំនើប ខណៈពលរដ្ឋថា នឹងខិតខំប្រែក្លាយសហគមន៍របស់ខ្លួនជាសហគមន៍កសិកម្មទំនើបដែរ។

នាយកប្រតិបត្តិសហគមន៍កសិកម្មទំនើបបន្លែផ្ទះសំណាញ់ត្រាំកក់ លោក ទូច សុភាព បានឲ្យដឹងថា សហគមន៍ទើបបង្កើតបាន៦ខែ មានសមាជិកសរុប៣៣គ្រួសារ ហើយមានផ្ទះសំណាញ់សរុបចំនួន៧០ ដោយបែងចែក ២ផ្ទះសំណាញ់សម្រាប់ផ្សាំកូន ៨ផ្ទះសំណាញ់ដាំប៉េងប៉ោះឆើរី ហើយផ្សេងទៀតដាំបន្លែស្ពៃក្រញាញ់ ស្ពៃតឿ សាឡាតចម្រុះ និងដំណាំបន្ទាប់បន្សំផ្សេងៗទៀត។

លោកបានប្រាប់ឱ្យដឹងថា ក្នុង១ខែសហគមន៍បានផលិតបន្លែរង្វង់៥០តោន ដើម្បីផ្គល់ផ្គងឲ្យក្រុមហ៊ុនឯកជនចំនួន៤ ហើយក្នុង១រោងផ្ទះសំណាញ់ ចំណេញបាន១០០ដុល្លា ជាធម្យមក្នុងពេលប្រមូលផលម្តង។

ប្រជាសហគមន៍បានថ្លែងអំណរគុណដល់រាជរដ្ឋាភិបាល ក្រសួង ពិសេសមន្ទីរកសិកម្មដែលតែងតែបានយកចិត្តទុកដាក់ និងបានដឹកនាំពួកគាត់ ឲ្យមកសិក្សាស្វែងយល់ពីសហគមន៍កសិកម្មទំនើបនាពេលនេះ។

គួររំលឹកថា ក្រសួងកសិកម្មរុក្ខាប្រមាញ់ និងនេសាទ ក្រោមការដឹកនាំរបស់លោករដ្ឋមន្ត្រី ឌិត ទីណា ក៏បានដាក់ចេញនូវចក្ខុវិស័យធ្វើយ៉ាងណាធានាសន្តិសុខស្បៀងប្រកបដោយនិរន្តរភាព សេដ្ឋកិច្ច និងបរិស្ថាន ហើយធ្វើឲ្យវិស័យកសិកម្ម នៅតែរួមចំណែកសំខាន់នៅក្នុងកំណើនសេដ្ឋកិច្ចជាតិ៕

អត្ថបទ៖ សឹង រ៉ាត់