អ្នកចិញ្ចឹមក្រពើ រំពឹងថានឹងមានទីផ្សារឡើងវិញ ខណៈចិនគ្រោងបើកឱ្យមានការនាំចេញ

ម្ចាស់កសិដ្ឋានចិញ្ចឹមក្រពើ ក្នុងខេត្តសៀមរាប រំពឹងថាទីផ្សារក្រពើនឹងអាចងើបឡើងវិញ ខណៈដែលភាគីចិនគ្រោងបើកឱ្យនាំចេញក្រពើរស់ទៅកាន់ទីផ្សារប្រទេសចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ញ៉ែម បូរាណ អ្នកចិញ្ចឹមក្រពើ នៅខេត្តសៀមរាប បានប្រាប់ កម្ពុជាថ្មី ថា រយៈពេល​ចុងក្រោយនេះ លោកបានឃើញមន្រ្ដីជំនាញចុះមកធ្វើសំណាកក្រពើ ពិនិត្យមើលមេរោគ ងាយស្រួលក្នុងការនាំចេញស្របតាមស្ដង់ដារបស់ចិន។ លោកបន្តថា ប្រសិនបើការធ្វើតេស្ដសាកល្បងនេះ ទទួលបានជោគជ័យ ការចិញ្ចឹមក្រពើនឹងមានទីផ្សារឡើងវិញ ហើយកសិដ្ឋានផ្សេងៗទៀតក៏អាចនឹងបន្ថែម និងពង្រីកការចិញ្ចឹមក្រពើឡើងវិញបានប្រសើរជាងមុនផងដែរ។

លោក ញ៉ែម បូរាណ បានប្រាប់ឱ្យដឹងទៀតថា សម្រាប់កសិដ្ឋានរបស់លោកនាពេលបច្ចុប្បន្នមានក្រពើនៅសល់ចំនួនប្រហែល២០០ក្បាល តែ​ប្រសិនបើទីផ្សារក្រពើនៅតែបន្តធ្លាក់ចុះទៀត លោកក៏អាចនឹងសម្រេចចិត្តលក់ចេញឱ្យអស់ដែរ នេះក៏ដោយសារតែចំណីក្រពើត្រូវចំណាយដើមទុនច្រើន មិនការចិញ្ចឹមសត្វគោ និងក្របី នោះឡើយ។

ដោយឡែក លោក គង់ ម៉ី អ្នកចិញ្ចឹមក្រពើ នៅខេត្តសៀមរាបដូចគ្នា ក៏បានបង្ហើបប្រាប់ កម្ពុជាថ្មី ថា បច្ចុប្បន្នលោកបានចង់គ្នាជាសហគមន៍ ជាមួយនឹងអ្នកចិញ្ចឹមក្រពើផ្សេងៗទៀតនៅសៀមរាប គ្រាន់តែថាការចិញ្ចឹមមាននៅតាមផ្ទះ ឬតាមអាង រៀងៗខ្លួន។ លោក បន្តថា នៅពេលដែលមានក្រុមហ៊ុនចិនត្រូវការទិញ សមាជិកទាំងអស់បាននាំគ្នាដើរប្រមូលក្រពើពីអាងនីមួយៗ ស្របតាមស្ដង់ដាដែលខាងភាគីចិនត្រូវការមកឱ្យអ្នកតំណាងសហគមន៍ជួយរកទីផ្សារឱ្យ។

លោក គង់ ម៉ី បានប្រាប់ទៀតដែរថា ថ្មីៗនេះ សហគមន៍បានធ្វើចត្តាឡីស័កក្រពើ ដោយសាកល្បងនាំចេញក្រពើទៅកាន់ទីផ្សារចិនចំនួន ១១០០ក្បាល ប៉ុន្ដែត្រូវឆ្លងកាត់ការយកសំណាក ដើម្បីបញ្ជាក់ថា ក្រពើដែលត្រូវនាំចេញមានសុខភាពល្អ ស្របតាមស្ដង់ដារបស់ប្រទេសចិន ជាមុនសិន។

យ៉ាងណាមិញ អ្នកនាំពាក្យក្រសួងកសិកម្ម លោក ឃឹម ហ្វីណង់ បានឱ្យកម្ពុជាថ្មី នៅថ្ងៃទី១៤ ខែមករា ឆ្នាំ២០២៥នេះ ថា ការនាំចេញក្រពើរស់ទៅកាន់ទីផ្សារចិននេះ ពុំទាន់ច្បាស់ការនៅឡើយទេ ដោយសារពេលវេលាលឿនពេក ហេតុនេះហើយក្រសួងមិនហ៊ាននិយាយ ឬផ្ដល់ក្ដីសង្ឃឹមអ្វី ដល់អ្នកចិញ្ចឹមក្រពើទាំងនោះទេ។

ទោះជាយ៉ាងណាក៏ដោយ លោក ឃឹម ហ្វីណង់ បញ្ជាក់ទៀតដែរថា  ប្រសិនបើការចរចានាពេលខាងមុខនេះ ទទួលបានជោគជ័យមែន ការចិញ្ចឹមក្រពើនឹងមានភាពល្អប្រសើរជាងមុន នឹងអាចដំណើរការឡើងវិញបានផងដែរ៕

អត្ថបទ ៖ សួស សិត