ត្រាំ ចេញបញ្ជា ហាម អត្តពលិកកែភេទ ចូលរួមប្រកួតក្នុងកីឡាផ្នែកនារីដាច់ខាត

តាមការចុះផ្សាយរបស់ AP នៅថ្ងៃព្រហស្បតិ៍ទី៦ខែកុម្ភៈឆ្នាំ២០២៥, ប្រធានាធិបតីអាមេរិក ដូណាល់ ត្រាំ បានចុះហត្ថលេខាលើបញ្ជាប្រតិបត្តិថ្មីមួយទៀត ដោយហាមឃាត់អត្តពលិកកែភេទ ពីការចូលរួមប្រកួតក្នុងកីឡាផ្នែកនារីដាច់ខាត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ច្បាស់ណាស់ វិធានការនេះនឹងប៉ះពាល់ដល់ការប្រកួតកម្រិតសាលាឬអាជីពទូទាំងប្រទេសតែម្តង ព្រោះថាមិនត្រឹមហាមចូលរួមប្រកួតទេ លោកត្រាំ ថែមទាំងគំរាមដកមូលនិធិពីសាលាឬស្ថាប័នណា ដែលមិនគោរពតាមបទបញ្ជានេះទៀតផង។

មុនស៊ីញេលើបញ្ជា «កុំឲ្យបុរសពាក់ព័ន្ធក្នុងកីឡានារី», ប្រធានាធិបតីអាមេរិក បញ្ជាក់ថា «ចាប់ពីឥឡូវទៅ កីឡាផ្នែកនារី គឺឲ្យតែនារីលេងប៉ុណ្ណោះ»។

មិនត្រឹមប៉ុណ្ណឹង លោក ត្រាំ ក៏ប្រកាសដែរថា រដ្ឋបាលរបស់លោកនឹងរារាំងអត្តពលិកកែភេទ ពីការចូលរួមក្នុងព្រឹត្តិការណ៍អន្តរជាតិដែលរៀបចំដោយសហរដ្ឋអាមេរិក រួមទាំងកីឡាអូឡាំពិកនៅទីក្រុង Los Angeles ឆ្នាំ ២០២៨ និងការប្រកួតបាល់ទាត់ពិភពលោកផងដែរ។

តាមពិតទៅ ការចូលប្រកួតរបស់អត្តពលិកកែភេទក្នុងកីឡាផ្នែកនារី បានបង្កភាពចម្រូងចម្រាស់រួចទៅហើយ ដោយអ្នកខ្លះតវ៉ាថា វាជារឿងអយុត្តិធម៌សម្រាប់ស្រ្តី ព្រោះដ្បិតថា ទោះអ្នកទាំងនោះកែភេទក៏ដោយ ប៉ុន្តែពីកំណើតមកពួកគេគឺជាមនុស្សប្រុស ហើយមានធម្មជាតិខ្លាំងជាងមនុស្សស្រី។

ជាក់ស្តែងរឿងថ្មីបំផុតគឺកើតឡើងក្នុងព្រិត្តិការណ៍កីឡាអូឡាំពិករដូវក្តៅទីក្រុងប៉ារីសឆ្នាំ២០២៤ ដែលអ្នកប្រដាល់សញ្ជាតិអាល់ហ្សេរីកែភេទឈ្មោះ Imane Khelif យកឈ្នះកីឡាការិនីតៃវ៉ាន់ Lin Yu-ting។

ភ្លាមៗមានប្រតិកម្មនិងមតិរិះគន់ដូចទឹកបាក់ទំនប់ទៅលើគណៈកម្មការអូឡាំពិកអន្តរជាតិ (IOC) ជុំវិញការដែលអនុញ្ញាតឲ្យរឿងអយុត្តិធម៌បែបនេះកើតឡើង ប៉ុន្តែទោះយ៉ាងណា IOC បាននិយាយការពារខ្លួន ហើយនៅតែរក្សាលទ្ធផលដដែល៕

អត្ថបទ៖ សុខ សុវណ្ណ

ចុចអាន៖ ម៉ិកស៊ិក ដាក់ពង្រាយ​ទ័ព ១ម៉ឺន​នាក់នៅព្រំដែន ក្រោយ​ការ​គំរាម​ដាក់​ពន្ធ​របស់ ត្រាំ