រោងមហោស្រពច្រើនទសវត្សរ៍មុន ក្នុងក្រុងបាត់ដំបង ត្រូវគេរៀបចំជាទីតាំងថតភាពយន្តថ្មី​ ខ​ណៈរក្សាសំណង់ដើម មិនកែកុនឡើយ

រោងមហោស្រពចាស់ល្បីល្បាញច្រើនទសវត្សរ៍មុន ក្នុងក្រុងបាត់ដំបង កំពុងរៀបចំទីតាំងសម្រាប់ថតភាពយន្តថ្មី​ បន្ទាប់ពីអាក់ខានដំណើរការបម្រើក្នុងវិស័យភាពយន្តជាច្រើនឆ្នាំ។ ខណៈចំពោះការរៀបចំទីតាំងនេះ ដោយមិនធ្វើការជួសជុលឡើយ ពោលគឺថែរក្សា ​និងអភិរក្សសំណង់ចាស់ៗទាំងអស់ ដើម្បីផលិតរឿងឆ្លុះបញ្ចាំងពីសង្គមជីវភាពរបស់ប្រជាពលរដ្ឋតាមសម័យកាលប៉ុណ្ណោះ។

បើតាមការជូនដំណឹងនៅលើផេកផ្លូវការ របស់ក្រុមអ្នកស្រាវជ្រាវ “ក្រុមព្រះសុរិយា” បានឱ្យដឹងដូច្នេះថា រោងមហោស្រពប្រាសាទមាស ផ្លូវលេខ២ ក្រុងបាត់ដំបង​ កំពុងរៀបចំទីតាំងសម្រាប់ថតភាពយន្តថ្មី​។ មិនជួសជុល ប៉ុន្តែថែរក្សា ​និងអភិរក្សសំណង់ចាស់ៗទាំងអស់ មានប្រយោជន៍ណាស់ក្នុងវិស័យថតភាពយន្តក្នុងប្រទេស​។

ប្រភពបានបន្តថា វាបានផ្តល់ភាពងាយស្រួលចំណេញប្រាក់ពេលវេលា​ក្នុងរចនាទីតាំងទៅតាមពេលវេលាណាមួយដែលអ្នកនិពន្ធបាននិពន្ធសាច់រឿងទៅ តាមសម័យកាលណានៃសង្គមជីវភាពរបស់ប្រជាពលរដ្ឋដែលរស់នៅតាមសម័យកាលនីមួយៗបានដោយងាយស្រួល​ ។

សូមបញ្ជាក់ថា យោងតាមប្រភពព័ត៌មានបានឱ្យដឹងដែរថា រោងភាពយន្តប្រាសាទមាសក្រុងបាត់ដំបង ដែលជារបស់អតីតចាងហ្វាងផលិតកម្មប្រាសាទមាសភាពយន្ត លោកកា ឆាយ លាង ហៅសារ៉ាវុធ ជាបុគ្គលដ៏ល្បីល្បាញរបស់កម្ពុជា (មុនឆ្នាំ១៩៧៥) ៕ អត្ថបទ៖ ចាន់រ៉ា