ព័ត៌មានជាតិ

ក្រុមហ៊ុនអាកាសចរណ៍ថ្មី ៣ បន្ថែមទៀត នឹងតភ្ជាប់ជើងហោះហើរមកអាកាសយានដ្ឋានអន្តរជាតិតេជោ

បានផុស

១ year មុន

នៅ

ថ្ងៃពុធ ២៦ មីនា ២០២៥

ដោយ

បើតាមការឱ្យដឹងពីអ្នកឧកញ៉ា ឆារស៍ វ៉ាន់ អភិបាលក្រុមហ៊ុន Cambodia Airport Investment និងជាអភិបាលក្រុមហ៊ុនកាណាឌីយ៉ាគ្រុប នឹងមានក្រុមហ៊ុនអាកាសចរណ៍ថ្មីចំនួន ៣ បន្ថែមទៀត នឹងតភ្ជាប់ជើងហោះហើរមកអាកាសយានដ្ឋានអន្តរជាតិតេជោ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកឧកញ៉ា ឆារស៍ វ៉ាន់ បានមានប្រសាសន៍ថា ជើងហោះហើរដែលប្រតិបត្តិការនៅពោធិចិនតុង នឹងត្រូវប្ដូរមកអាកាសយានដ្ឋានថ្មីទាំងអស់ ក្រោយពេលអាកាសយានដ្ឋានថ្មីបញ្ចប់ការសាងសង់នៅក្នុងដំណាក់កាលទី១ ដែលនឹងដាក់ឱ្យប្រើប្រាស់នាខែកក្តដាខាងមុខនេះ។

ទន្ទឹមការដាក់ឲ្យដំណើរការអាកាសយានដ្ឋានអន្តរជាតិតេជោ ក្រុមហ៊ុនអាកាសចរណ៍ចំនួន ៣ ទៀត ដែលជាក្រុមហ៊ុនថ្មីស្រឡាង នឹងតភ្ជាប់ការហោះហើរមកកាន់អាកាសយានដ្ឋានអន្តរជាតិតេជោ។ នេះបើតាម អ្នកឧកញ៉ា ឆារស៍ វ៉ាន់។

ប្រលានយន្តហោះអន្តរជាតិតេជោ ត្រូវបានអភិវឌ្ឍឡើងមានគោលដៅចម្បងចំនួន ២ ទី១ ក្លាយទៅជា Passenger hub (មជ្ឍមណ្ឌលដឹកអ្នកដំណើរ) ទី២ ច្រកដឹកជញ្ជូនទំនិញទៅកាន់ពិភពលោក Cargo Hub។

ពាក់ព័ន្ធក្រុមហ៊ុនអាកាសចរណ៍ដែលនឹងបើកតភ្ជាប់ជើងហោះហើរមកប្រទេសកម្ពុជា ក្រុមហ៊ុនអាកាសចរណ៍ Turkish Airlines បានចេញសេចក្តីប្រកាសព័ត៌មានពីគម្រោងបើកជើងហោះហើរពីទីក្រុងអ៊ីស្តង់ប៊ុល ប្រទេសតួគី មកទីក្រុងភ្នំពេញនៅអំឡុងខែធ្នូ ឆ្នាំ២០២៥ ដោយនឹងប្រើប្រាស់យន្តហោះខ្នាតធំប្រភេទ Airbus A330 ឬ Boeing 777។

ក្នុងសេចក្តីប្រកាសព័ត៌មានរបស់ក្រុមហ៊ុនបានបញ្ជាក់ថា កម្ពុជាជាប្រទេសទី ៧ នៅតំបន់អាស៊ីអាគ្នេយ៍ ដែលក្រុបហ៊ុនបើកប្រតិបត្តិការភ្ជាប់ការហោះហើរដោយផ្ទាល់ ខណៈក្រុមហ៊ុនមានបណ្តាញដឹកជញ្ជូនគ្របដណ្តប់ ២១ ប្រទេស និង ២០ ទីក្រុងនៅជុំវិញពិភពលោក៕