សាយ ប្រកាសត្រៀមព្រឹត្តិការណ៍ “រត់ដោយបេះដូង លើកទី២” រៃអង្គាសថវិកាជួយសាលារៀនទន្សាយ

លោក អួន បឋម ហៅ សាយ ដែលបច្ចុប្បន្នកំពុងលេចធ្លោលើការងារជួយសង្គម និងទទួលការគាំច្រើនពីមហាជនគ្រប់មជ្ឈដ្ឋាន បានប្រកាសត្រៀមកម្មវិធីរត់ដោយបេះដូងជាលើកទី២ ដើម្បីរៃអង្គាសថវិកាជួយសាលារៀនទន្សាយ (កុមារអូទីហ្សឹម) ។

លោក សាយបានឱ្យដឹងថា ព្រឹត្តិការណ៍ “រត់ដោយបេះ ដូងលើកទី២ ឆ្នាំ២០២៥” រៀបចំឡើងក្នុងគោលបំណងរៃអង្គាសថវិកាសប្បុរសធម៌សម្រាប់អង្គការសាលារៀនទន្សាយ ក្នុងបេសកម្មថែទាំ និងបង្ហាត់បង្រៀនទៅដល់កុមារអូទីហ្សឹម (Autism) និងលើកកម្ពស់ការថែទាំសុខភាពតាមរយ:ការរត់។

តារាចម្រៀង សាយ បាននិយាយទៀតថាកម្មវិធី រត់ពីចម្ងាយចាប់ពីថ្ងៃទី១ ខែឧសភា ឆ្នាំ២០២៥ រហូតដល់ថ្ងៃទី៣១ខែឧសភាឆ្នាំ២០២៥ ។ កម្មវិធីពិសេសរត់ដោយបេះដូងជាមួយកុមារអូទីហ្សឹមថ្ងៃទី ៣១ ខែឧសភា ឆ្នាំ២០២៥ នៅពហុកីឡដ្ឋានជាតិអូឡាំពិក។

បន្ថែមពីនេះលោក សាយ លើកឡើងដោយអំពាវនាវដែរថា ពួកយើងចូលរួមទាំងអស់គ្នាបរិច្ចាគទៅកាន់អង្គការសាលារៀនទន្សាយដើម្បីអនាគតកុមារអូទីហ្សឹម។ ការចូលរួមសហការនេះ គឺជំរុញឱ្យមានការយល់ដឹងបន្ថែមពីស្ថានភាព អូទីហ្សឹម ដែលកំពុងកើតមាននៅក្នុងព្រះរាជាណាចក្រកម្ពុជាហើយនឹងបានស្វែងយល់ពីភាពលះបង់របស់អ្នកគ្រូ លោកគ្រូ ដែលបានតស៊ូព្យាយាម ក្នុងការថែទាំ និងបង្ហាត់បង្រៀនកុមារអូទីហ្សឹម ជាពិសេសឪពុកម្តាយរបស់កុមារអូទីហ្សឹម ផ្ទាល់ ដែលជាកត្តាជំរុញទឹកចិត្តទៅដល់មហាជនឱ្យមានការគាំទ្រ។

គួរបញ្ជាក់ថាតារាប្រុសលោក សាយ ត្រូវបានមហាជនអ្នកគាំទ្រចាត់ទុកថា លោកជាសិល្បករខ្មែរមួយរូបដែលលេចធ្លោតាមរយ:កិច្ចកាងារចូលរួមសង្គម ពិសេសកន្លងមកសាយ បានបង្កើតកម្មវិធីរត់ដើម្បីប្រមូលថវិកាជួនដល់មន្ទីពេទ្យគន្ធបុប្ផានិងមន្ទីពេទ្យកុមារអ ង្គរជាដើម។គិតមកដល់ពេលនេះ សាយ បានបង្កើតកម្មវិធីរត់មានរយៈពេលប្រមាណ ៥ឆ្នាំមកហើយដែរ៕ អត្ថបទ៖ ចាន់រ៉ា