ការ​ចំណាយ​លើ​វិស័យ​យោធា​ពិភពលោក កើន​ឡើង​ដល់ ២,៧២​ទ្រីលាន​ដុល្លារ​ក្នុង​ឆ្នាំ​២០២៤

ការចំណាយលើវិស័យយោធាសកល បានឈានដល់ ២,៧២​ទ្រី​លានដុល្លារ ក្នុងឆ្នាំ​២០២៤ ដែលជាការកើនឡើង ៩,៤% បើ​ធៀប​​នឹង​ឆ្នាំ​២០២៣។ នេះ​គឺ​ជា​ការកើនឡើងប្រចាំឆ្នាំយ៉ាងខ្លាំងបំផុត​មិន​ធ្លាប់​​មាន​ គិត​ចាប់តាំងពីការបញ្ចប់​សម័យ​សង្គ្រាមត្រជាក់។

កំណើន​នេះ ត្រូវបានជំរុញដោយការកើនឡើងនូវភាពតានតឹងភូមិសាស្ត្រនយោបាយ ជាពិសេសនៅអឺរ៉ុប និងមជ្ឈិមបូព៌ា ដែលនាំ​ឲ្យ​​ជាង​១០០​ប្រទេស​ បង្កើនថវិកាការពារជាតិរបស់ពួកគេ។

ប្រទេស និង​តំបន់​ដែល​​​ចំណាយ​លើ​វិស័យ​យោធា​ច្រើន​ជាង​គេ៖

• សហរដ្ឋអាមេរិក៖ រក្សាតំណែងរបស់ខ្លួនជាអ្នកចំណាយយោធាកំពូល ដោយបានបែងចែក ៩៩៧​ពាន់លានដុល្លារក្នុងឆ្នាំ​២០២៤ ដែល​កើនឡើង ៥,៧​%។ នេះស្មើនឹង ៦៦% នៃការចំណាយសរុបរបស់អង្គការណាតូ និង ៣៧% នៃការចំណាយលើវិស័យយោធាពិភពលោក។
• អឺរ៉ុប៖ ការចំណាយផ្នែកយោធានៅអឺរ៉ុប រួមទាំងរុស្ស៊ី បានកើនឡើង ១៧% ស្មើ​នឹង​ ៦៩៣​ពាន់លានដុល្លារ ដែលលើសពីកម្រិតនៃសម័យសង្គ្រាមត្រជាក់។ គួរកត់សម្គាល់ថា ប្រទេសអាល្លឺម៉ង់បានបង្កើនថវិកាការពារជាតិរបស់ខ្លួន ២៨% ដល់ ៨៨,៥ពាន់លានដុល្លារ ដែលក្លាយជាប្រទេសចំណាយយោធាធំជាងគេទីបួននៅទូទាំងពិភពលោក។
• រុស្ស៊ី និងអ៊ុយក្រែន៖ ការចំណាយយោធារបស់រុស្ស៊ីបានកើនឡើង ៣៨% ដល់ ១៤៩​ពាន់លានដុល្លារ ដែលស្មើ​នឹង​ ៧,១% នៃផលិតផលក្នុងស្រុកសរុបរបស់ខ្លួន។ ការចំណាយលើវិស័យការពារជាតិរបស់អ៊ុយក្រែន​វិញ​ឈានដល់ ៦៤,៧​ពាន់លានដុល្លារ ស្មើនឹង ៣៤% នៃផលិតផលក្នុងស្រុកសរុបរបស់ខ្លួន ដែលជាបន្ទុកយោធាខ្ពស់បំផុតនៅទូទាំងពិភពលោក។
• មជ្ឈិមបូព៌ា៖ តំបន់នេះបានមើលឃើញការកើនឡើង ១៥% នៃការចំណាយយោធា ដែលសរុបជាទឹកប្រាក់ចំនួន ២៤៣​ពាន់លានដុល្លារ។ ថវិកាការពារជាតិរបស់អ៊ីស្រាអែល បាន​កើនឡើង ៦៥% ដល់ ៤៦,៥​ពាន់លានដុល្លារ ដែលជាការកើនឡើងប្រចាំឆ្នាំដ៏ខ្លាំងបំផុតចាប់តាំងពីឆ្នាំ​១៩៦៧។
• អាស៊ីប៉ាស៊ីហ្វិក៖ ការចំណាយលើវិស័យយោធារបស់ចិនបានកើនឡើង ៧% ដល់ ៣១៤​ពាន់លានដុល្លារ ដែលជា​កំណើន​គួរ​ឲ្យ​កត់​សម្គាល់​​ក្នុង​រយៈពេលបីទសវត្សរ៍ជាប់ៗគ្នា។ ​ចំណែក​ឯ​ថវិកាការពារជាតិរបស់ប្រទេសជប៉ុន បានកើនឡើង ២១% ដល់ ៥៥,៣​ពាន់លានដុល្លារ ដែលជាការកើនឡើងប្រចាំឆ្នាំដ៏ធំបំផុតចាប់តាំងពីឆ្នាំ​១៩៥២​។

វិទ្យាស្ថានស្រាវជ្រាវសន្តិភាពអន្តរជាតិ Stockholm (SIPRI) ព្រមានថា ការផ្តល់អាទិភាពជាសកលនៃសន្តិសុខយោធា​ដ៏​ច្រើន​បែប​នេះ អាចមានផលវិបាក​​លើ​ផ្នែក​សេដ្ឋកិច្ច និងសង្គមយ៉ាងខ្លាំង​​នៅ​ក្នុង​រយៈពេល​ប៉ុន្មានឆ្នាំខាងមុខ៕

ដោយ៖ ឈាង