សម្តេចតេជោ ហ៊ុន សែន អំពាវនាវឱ្យអ្នកវិភាគប្រុងប្រយ័ត្នចំពោះការលើកឡើងពីបញ្ហាយោធា និងសន្តិសុខជាតិ

ភ្នំពេញ៖ សម្តេចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានបង្ហោះសារអប់រំនិងដាស់តឿនយ៉ាងស៊ីជម្រៅមួយនៅលើបណ្តាញសង្គមហ្វេសប៊ុកផ្លូវការរបស់សម្តេច អមដោយវីដេអូដែលផលិតដោយបច្ចេកវិទ្យាបញ្ញាសិប្បនិម្មិត (AI) ស្តីពី «រឿងបណ្ឌិតនិងអ្នកអុំទូក» ដើម្បីជាការក្រើនរំលឹកដល់អ្នកវិភាគមួយចំនួនតូចដែលកំពុងវក់វីនឹងការបញ្ចេញមតិ រហូតអាចប៉ះពាល់ដល់កិច្ចការសម្ងាត់ជាតិ។

​នៅក្នុងសំណេរនោះ សម្តេចតេជោ ហ៊ុន សែន បានកត់សម្គាល់ពីការប្រែប្រួលនៃនិន្នាការសង្គម ដោយសម្តេចបានលើកឡើងថា កាលពីប៉ុន្មានឆ្នាំមុន នៅក្នុងប្រទេសសំបូរទៅដោយ «គ្រូជោគជ័យ» បន្ទាប់មកក៏សំបូរទៅដោយ «ព្រហ្ម ឥសី គ្រូបារមី និងគ្រូទាយ»។ ដោយឡែក នាពេលបច្ចុប្បន្ននេះ បែរជាសំបូរទៅដោយ «អ្នកវិភាគគ្រប់គ្រឿងនិងគ្រប់រឿង» រហូតដល់មានការវិភាគខ្វែងគំនិតគ្នាឯងថែមទៀតផង។

​ទោះជាយ៉ាងណា សម្តេចតេជោបានគូសបញ្ជាក់ថា ការខុសគ្នាផ្នែកមតិយោបល់ គឺជាដំណើរធម្មតានៃការយល់ដឹងរបស់មនុស្សជាតិ និងជាផ្នែកមួយនៃការតស៊ូមតិនៃដំណើរការលទ្ធិប្រជាធិបតេយ្យ។ ប៉ុន្តែ អ្វីដែលសម្តេចចង់រំលឹកនោះគឺ៖

​«សូមកុំទុកឲ្យការខុសគ្នានូវមតិនេះ បំផ្លាញនូវអង្គឯកភាពនៃស្ថាប័នជាតិ ដែលបំពេញការងារជាប្រចាំជូនជាតិនិងប្រជាជន។»

​សម្តេចតេជោបានប្រៀបធៀបទៀតថា ការខុសគំនិតគ្នាជាមួយក្រុមប្រឆាំង ទោះបីជាត្រូវប្រើពេលរាប់សិប ឬរាប់រយឆ្នាំទៀត ក៏មិនអាចមានឥទ្ធិពលលើកិច្ចការងារអភិវឌ្ឍន៍ប្រទេសនោះឡើយ។

 សម្តេចបានកោតសរសើរដល់បញ្ញាវ័ន្តនៅក្នុងស្ថាប័នជាតិមួយចំនួន ដែលពួកគាត់មិនសូវបញ្ចេញមតិជាពាក្យសម្តីឡើយ ប៉ុន្តែបានបញ្ចេញសកម្មភាពជាក់ស្តែងដើម្បីបម្រើប្រជាជន ដោយសម្តេចបានប្រើល្បះដកស្រង់ដ៏មានន័យថា «ទោះមាន់មិនរងាវ ក៏ព្រះអាទិត្យនៅតែរះដែរ»។

​ទន្ទឹមនឹងនេះ ប្រធានព្រឹទ្ធសភា ក៏បានដាក់ចេញនូវសំណូមពរ និងការហាមឃាត់សំខាន់ៗចំពោះបណ្តាអ្នកវិភាគទាំងឡាយថា គួរជៀសវាងដាច់ខាតនូវការយកបញ្ហាយោធា និងសន្តិសុខជាតិ មកវិភាគដាក់ក្បាលមីក្រូហ្វូនហើយផ្សព្វផ្សាយជាសាធារណៈ ព្រោះវាជារឿងសម្ងាត់របស់ជាតិ។

 សម្តេចបានណែនាំថា ប្រសិនបើមានអនុសាសន៍ល្អៗចង់ជួយដល់ស្ថាប័នជាតិ គួរតែធ្វើឡើងតាមរយៈការប្រជុំបិទទ្វារ ឬផ្ញើលិខិតផ្ទាល់ជូនទៅស្ថាប័ននោះ ទើបជាការប្រសើរ។

​នៅចុងបញ្ចប់នៃសារ សម្តេចតេជោ ហ៊ុន សែន បានបង្វែរអារម្មណ៍អ្នកលេងបណ្តាញសង្គមឱ្យទស្សនាវីដេអូ AI ដែលលោក ប៉ែន ប៊ុនរត្ឋ័ បានផ្ញើជូនសម្តេច ដែលជារឿងគតិលោកអប់រំដ៏មានតម្លៃរវាង «បណ្ឌិត និងអ្នកអុំទូក» ព្រមទាំងបានរំលឹកបែបកំប្លែងលាយឡំស្នាមញញឹម ទៅកាន់អ្នកគាំទ្រកុំឱ្យភ្លេចទស្សនាការប្រកួតបាល់ទាត់នៅម៉ោង ៤ ទៀបភ្លឺ ផងដែរ៕