អភិបាលក្រុង​ញូយ៉ក ប្រកាសរកវិធីចាប់ខ្លួនលោក ណេតាន់យ៉ាហ៊ូ ទៅ​ប្រឈម ICC ដែល​ផ្ទុយពី​នយោបាយ​របស់ លោក ត្រាំ​

អភិបាលក្រុងញូយ៉ក ដែល​ជ​ាអ្នក​គោរព​សាសនា​ឥស្លាម លោក Zohran Mamdani បានថ្លែងថា លោកកំពុងសិក្សាស្វែងរកលទ្ធភាពតាមផ្លូវច្បាប់ ក្នុងការចាប់ខ្លួននាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ ដែល​ជាប់​បណ្តឹង​ដីកាចាប់ខ្លួន​ដោយ​តុលាការ​ឧក្រិដ្ឋកម្ម​​អន្តរជាតិ (ICC) នៅពេលដែលមេដឹកនាំរូបនេះធ្វើដំណើរមកកាន់ទីក្រុងញូយ៉ក ដើម្បីចូលរួមមហាសន្និបាតអង្គការសហប្រជាជាតិ នៅក្នុងខែកញ្ញាខាងមុខ។

​​ការ​ប្រកាស​នេះ​​ ហាក់​ផ្ទុយទាំងស្រុង​ចំពោះជំហរ​​​​ក្រសួង​ការ​បរទេស​អាមេរិក ដែល​កំពុង​ធ្វើយុទ្ធនាការ​​ដាក់​ឲ្យ​តុលាការ ICC ​ឲ្យ​កាន់តែ​​​ឯកោ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Mamdani ដែលបានចាត់ទុកយុទ្ធនាការយោធារបស់អ៊ីស្រាអែលនៅហ្គាហ្សាថា ជា​អំពើ​​ប្រល័យពូជសាសន៍​នោះ បានប្តេជ្ញា​កាលពីអំឡុងពេលយុទ្ធនាការឃោសនាបោះឆ្នោតជាអភិបាលក្រុងរបស់លោកកាលពីឆ្នាំមុនថា នឹងចាប់ខ្លួនលោក ណេតាន់យ៉ាហ៊ូ ប្រសិនបើមេដឹកនាំរូបនេះមក​កាន់ទីក្រុងញូយ៉ក។ នៅក្នុងកម្មវិធីផតខាស «The Interview» របស់កាសែត The New York Times ដែលបានផ្សាយកាលពីថ្ងៃទី១៨ ខែកក្កដា អភិបាលក្រុងរូបនេះត្រូវបានគេសួរថា តើលោកនៅតែមានបំណងបំពេញតាមការសន្យានោះដែរឬទេ។

លោកបានឆ្លើយតប ដោយយោងទៅលើទីស្នាក់ការរបស់តុលាការ ICC ថា «ខ្ញុំជឿជាក់ថា នាយករដ្ឋមន្ត្រី ណេតាន់យ៉ាហ៊ូ  គួរតែទៅស្ថិតនៅតុលាការទីក្រុងឡាអេ។ គាត់គឺជាឧក្រិដ្ឋជនសង្រ្គាមម្នាក់ដែលត្រូវបានចោទប្រកាន់ដោយតុលាការព្រហ្មទណ្ឌអន្តរជាតិ ហើយអ្វីដែលអ្នកនឹងរកឃើញនោះគឺថា វាក៏ជាមតិដែលមនុស្សជាច្រើនយល់ឃើញដូចគ្នាដែរ ដោយសារតែសកម្មភាពដែលគាត់បានធ្វើក្នុងរយៈពេលជាច្រើនឆ្នាំកន្លងមកនេះ»។

ជាទូទៅ តំណាងដែលមានការទទួលស្គាល់ជាផ្លូវការនៃរដ្ឋជាសមាជិក ត្រូវបានផ្តល់អភ័យឯកសិទ្ធិការទូត ក្នុងអំឡុងពេលបំពេញទស្សនកិច្ចផ្លូវការរបស់អង្គការសហប្រជាជាតិ ប៉ុន្តែលោក Mamdani បាននិយាយថា លោកកំពុងស្ថិតក្នុងការពិភាក្សាយ៉ាងសកម្ម ជាមួយនាយកដ្ឋានច្បាប់របស់ទីក្រុង អំពីជម្រើសផ្លូវច្បាប់ដែលអាចធ្វើទៅបាន។ លោកបានបន្ថែមថា «អ្វីក៏ដោយដែលច្បាប់អនុញ្ញាតឲ្យខ្ញុំធ្វើនៅក្នុងទីក្រុងញូយ៉ក នោះហើយជាអ្វីដែលយើងនឹងធ្វើ ប៉ុន្តែយើងនឹងមិនបង្កើតច្បាប់ផ្ទាល់ខ្លួនសម្រាប់គោលបំណងនោះឡើយ»។

ដោយឡែក នៅក្នុងបទសម្ភាសន៍តាមវិទ្យុនាពេលថ្មីៗនេះ លោក ណេតាន់យ៉ាហ៊ូ បាននិយាយថា លោកមិនមានការព្រួយបារម្ភចំពោះការគំរាមកំហែងឃាត់ខ្លួនរបស់លោក Mamdani នោះទេ ដោយបានចោទប្រកាន់អភិបាលក្រុងញូយ៉ករូបនេះថាជា អ្នកគាំទ្រក្រុមហាម៉ាស និងស្អប់អាមេរិក។

សូមបញ្ជាក់ដែរថា កាលពីខែវិច្ឆិកា ឆ្នាំ២០២៤ តុលាការព្រហ្មទណ្ឌអន្តរជាតិ (ICC) បានចេញដីកាចាប់ខ្លួនជាផ្លូវការមួយ ប្រឆាំងនឹងនាយករដ្ឋមន្ត្រីអ៊ីស្រាអែល លោក ណេតាន់យ៉ាហ៊ូ និងអតីតរដ្ឋមន្ត្រីការពារជាតិរបស់លោក។ បទចោទប្រកាន់ចម្បងគឺ ឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិ នៅក្នុងតំបន់ហ្គាហ្សា ដោយតុលាការរកឃើញថា អ៊ីស្រាអែលបានប្រើប្រាស់ការកាត់ផ្តាច់ស្បៀងអាហារ និងធ្វើឲ្យប្រជាជនអត់ឃ្លាន ជាវិធីសាស្ត្រមួយក្នុងការធ្វើសង្រ្គាម៕

អត្ថបទ ៖ សាង ស្រីល័ក្ខ