ចូលកាន់តំណែងបាន១០០ថ្ងៃ ត្រាំ ធ្វើរឿង​៦យ៉ាង ផ្អើលពិភពលោក

គិតត្រឹមថ្ងៃទី៣០ខែមេសា តំណែងជាប្រធានាធិបតីអាមេរិកអាណត្តិទី២របស់លោក ដូណាល់ ត្រាំ មានរយៈពេល១០០ ថ្ងៃគត់។ ក្នុងអំឡុងពេលនេះដែរ លោកបានធ្វើរឿងជាច្រើន បង្កភាពភ្ញាក់ផ្អើលទូទាំងពិភពលោក ខណៈក្នុងនោះមានរឿងខ្លះ គ្មាននរណានឹកស្មានដល់ឡើយ ជាពិសេសជុំវិញបញ្ហាពន្ធគយតែម្តង។

ខាងក្រោមនេះគឺជារឿងទាំង ដែលលោកត្រាំ ធ្វើឲ្យផ្អើលពិភពលោក៖

១. ថ្ងៃ២០ខែមករា៖ ការចុះហត្ថលេខាលើបញ្ជាប្រតិបត្តិទ្រង់ទ្រាយធំ

បានតំណែងជាប្រធានាធិបតីអាណត្តិទី២ភ្លាម លោក ត្រាំ បានចុះហត្ថលេខាលើបញ្ជាប្រតិបត្តិចំនួន២៦ ធ្វើឲ្យផ្អើលពិភពលោក ដូចជាការដក​សហរដ្ឋ​អាមេរិក​ចេញ​ពី​អង្គការ​សុខភាព​ពិភពលោក និង​ការ​លើក​លែង​ទោស​ដល់​ក្រុម​កុបកម្ម​ ដែល​ចូល​លុកលុយ​វិមានកាពីតូល ​កាលពី​បួន​ឆ្នាំមុន ជាដើម។

២. ថ្ងៃ៤កុម្ភៈ៖ ត្រាំ បង្ហាញបំណងគ្រប់គ្រងតំបន់ហ្គាហ្សា

ក្នុងអំឡុងកិច្ចប្រជុំជាមួយនាយករដ្ឋមន្ត្រីអ៊ីស្រាអែល Benjamin Netanyahu, លោក ត្រាំ និយាយថា តំបន់ហ្គាហ្សាស្ទ្រីបដែលត្រូវបានបំផ្លិចបំផ្លាញដោយសង្រ្គាមនិងជាជម្រករបស់ជនជាតិប៉ាឡេស្ទីនជាងពីរលាននាក់នោះ អាចក្លាយជា «តំបន់ Riviera of the Middle East»។ លោកបាន​ប្រកាស​ពី​ផែនការដែល​សហរដ្ឋ​អាមេរិក នឹង​គ្រប់គ្រង​ទឹកដីនេះ ហើយ​អភិវឌ្ឍ​វា ថែមទាំងបង្ហើបថា ​ប្រជាជន​ប៉ាឡេស្ទីន​អាចបណ្តេញ​​ចេញ​ពី​តំបន់ ហ្គាហ្សា ផងដែរ ដែលរឿងនេះ​បង្ក​ការ​ខឹងសម្បាយ៉ាងខ្លាំង​ពី​អន្តរជាតិ។

៣. ថ្ងៃទី១២ខែកុម្ភៈ៖ ត្រាំ ចាប់ផ្តើមទំនាក់ទំនងជាមួយពូទីន សាជាថ្មី

លោក ត្រាំ បានធ្វើកិច្ចសន្ទនាតាមទូរស័ព្ទរយៈពេល៩០នាទី ជាមួយមេដឹកនាំរុស្ស៊ី វ្ល៉ាឌីមៀរ ពូទីន ដោយបញ្ចប់ភាពឯកោផ្នែកការទូតជាច្រើនឆ្នាំរបស់រុស្ស៊ី។ ក្រោយមកមានការហៅទូរស័ព្ទបន្តទៀត ហើយមានការរៀបចំជំនួបជាច្រើនរវាងប្រទេសទាំងពីរ ឈានដល់ការ​ចុះ​សម្រុង​គ្នា ឆ្ពោះទៅរក​ការ​ដោះ​ដូរ​អ្នក​ទោស​ពីរ​នាក់​រវាង​ទីក្រុងវ៉ាស៊ីនតោននិងមូស្គូ។

៤. ថ្ងៃទី២៨ខែកុម្ភៈ៖ ត្រាំ ធ្វើឲ្យ ហ្សេលេនស្គី អាម៉ាស់មុខ

នៅចំពោះមុខកាមេរ៉ាអំឡុងកិច្ចប្រជុំនៅសេតវិមាន ប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី ត្រូវអាម៉ាស់មុខ ដោយសារតែរងការស្តីបន្ទោសពីសំណាក់លោក ត្រាំ និងអនុប្រធានាធិបតីអាមេរិក JD Vance ដែលបរិហារគាត់ថា មិនចេះដឹងគុណអាមេរិក ដែលខំជួយក្នុងសង្គ្រាមជាមួយរុស្ស៊ី។

៥. ថ្ងៃទី២៦ខែមីនា៖ ត្រាំ បង្ហាញមហិច្ឆតាកាន់កាប់តំបន់ Greenland

លោក ដូណាល់ ត្រាំ បានបង្ហាញមហិច្ឆតាកាន់កាប់តំបន់ Greenland ឈានដល់ថ្នាក់គំរាមប្រើកម្លាំងយោធាទៀត​ផង​ ដើម្បីយកកោះនេះមកគ្រប់គ្រង ហើយក្រោយមក លោក Vance និងភរិយារបស់គាត់ ក៏ធ្វើដំណើរទស្សនកិច្ចនៅទីនោះ ដោយបង្កជាភាពតានតឹងខ្លាំង។

លោក ត្រាំ និយាយថា៖​«យើងត្រូវការ Greenland សម្រាប់សុវត្ថិភាពនិងសន្តិសុខអន្តរជាតិ។ យើងត្រូវតែមានវា»។

៦. ថ្ងៃទី២ដល់៩ខែមេសា៖ ត្រាំ បញ្ឆេះសង្គ្រាមពន្ធ

នៅថ្ងៃទី២ខែមេសា លោក ត្រាំ បានប្រកាសពីការដាក់ពន្ធទ្រង់ទ្រាយធំប្រឆាំងប្រទេសនានាលើពិភពលោក ដោយចោទប្រកាន់ប្រទេសទាំងនោះថា បានទាញយកផលប្រយោជន៍ពីសហរដ្ឋអាមេរិក។

ដ្បិតថា ប៉ុន្មានថ្ងៃក្រោយ លោកបានបញ្ចុះពន្ធលើការនាំចូលភាគច្រើនរបស់ពិភពលោកមកនៅត្រឹម១០% រយៈពេល​៩០​ថ្ងៃ​ក៏ដោយ​ ប៉ុន្តែលោកបានដំឡើងពន្ធគយរបស់ចិនឯណោះ ដល់១៤៥%។

វិបត្តិ​នេះ​បាន​ធ្វើ​ឲ្យ​ទីផ្សារ​ពិភពលោកដាំក្បាលចុះ ព្រមទាំងនាំឲ្យ​តម្លៃ​មាស​ហក់ឡើងនិង​ប៉ះ​ពាល់​ដល់​តម្លៃ​ប្រាក់​ដុល្លារ៕

ប្រភព៖ VN Express

អត្ថបទ៖ សុខ សុវណ្ណ

ចុចអាន៖ ត្រាំ៖ «ខ្ញុំមិនមែនគ្រប់គ្រងតែអាមេរិកទេ គឺគ្រប់គ្រងពិភពលោកទាំងមូលតែម្តង»