ចន ច័ន្ទលក្ខិណា សម្តែងការហួសចិត្ត ក្រោយគេរិះគន់រឿងទម្លាយសារសុំជំនួយអតីតតារាសម្តែងមួយរូប

តារាសម្តែងជើងចាស់ និងជាអតីតប្រធានសមាគមសិល្បករខ្មែរអ្នកស្រី ចន ច័ន្ទលក្ខិណា បានបង្ហាញអារម្មណ៍ហួសចិត្តជាខ្លាំងបន្ទាប់ពីមានការរិះគន់ ជុំវិញរឿងដែលខ្លួនបានបង្ហោះអំពីបញ្ហាអតីតតារាសម្តែងលោក ចាន់រិទ្ធ មេធានី បានឆាតស្នើសុំជំនួយដើម្បីទិញថ្នាំព្យាបាលជំងឺ។

ថ្មីៗនេះ មហាជនអ្នកគាំទ្រ និងអ្នកប្រើប្រាស់បណ្តាញសង្គមហ្វេសប៊ុកគឺបានចែករំលែកដោយក្តីអាណិតអាសូរចំពោះអតីតតារាសម្តែងជើងចាស់ល្បីឈ្មោះលោក ចាន់រិទ្ធ មេធានី ក្រោយមានការទម្លាយថាលោកបានឆាត ដើម្បីសុំជំនួយពីតារាសម្តែងអ្នកស្រី ចន ច័ន្ទលក្ខិណា ដើម្បីទិញថ្នាំព្យាបាលជំងឺទឹកនោមផ្អែមនិងលើសឈាមផងនោះ។

ទោះបីជាយ៉ាងណាស្របពេល ដែលតារាជើងចាស់អ្នកស្រី ចន ច័ន្ទលក្ខិណា បានទម្លាយពីសារសំឡេងរបស់លោក ចាន់រិទ្ធ មេធានី ភ្លាមៗនោះក៏មានសប្បុរសជនមួយចំនួនបានឧបត្ថម្ភថវិកាជួយដល់លោក មេធានី តាមរយ:អ្នកស្រី ចន ច័ន្ទលក្ខិណា។ ប៉ុន្តែរឿងដែលហួសចិត្ត ស្រាប់តែមានមតិខ្លះបានធ្វើការរិះគន់ដោយមិនសំចៃមាត់ថា អ្នកស្រី ចន ច័ន្ទលក្ខិណា មិនទុកមុខឱ្យរៀមច្បងតារាជើងចាស់រូបនេះ។

អ្នកស្រី ចន ច័ន្ទលក្ខិណា បានរៀបរាប់ខ្លឹមសារថា “រឿងខ្ញុំជួយបង ចាន់រិទ្ធ មេធានី គឺមានអ្នកខ្លះរិះគន់ខ្ញុំថាត្រឹម១០មុឺនរៀលសោះក៏បង្ហោះដែរដូចមិនទុកមុខឲ្យគាត់ កន្លងមកខ្ញុំដឹងពីសុខទុក្ខគាត់និងដឹងស្ថានភាពគាត់ច្បាស់ណាស់ទើបខ្ញុំបង្ហោះ“។

តារាស្រីរូបនេះបន្ថែមថា “បើគាត់មិនទ័ល មិនមែនគាត់ព្យាយាមទំនាក់ទំនងមកខ្លួន តាមរយៈមិត្តភ័ក្តិទេហើយ ដោយសារការបង្ហោះរបស់អ្នកនាងគឺគាត់ទទួលបានថវិការ ៦៥៥ដុល្លារ ដូច្នេះការរិះគន់សើចចំអករបស់អ្នកទាំងអស់គ្នាគឺអ្នកនាងអត់ខ្វល់សំខាន់បានជួយសម្រាលបន្ទុកគាត់ (ចាន់រិទ្ធ មេធានី)” ។

គួរបញ្ជាក់ថា តារាម្តែងជើងចាស់ល្បីឈ្មោះលោក ចាន់រិទ្ធ មេធានី គិតមកដល់ពេលនេះ លោកបានឃ្លាតឆ្ងាយពីអាជីពសិល្ប:មានរយ:ពេលយូរ ឆ្នាំមកហើយ ខណ:កន្លងមកធ្លាប់មានដំណឹងថា តារាជើងចាស់រូបនេះកំពុងមានជំងឺប្រចាំកាយទើបធ្វើឱ្យអាជីពសម្តែងត្រូវបានស្ងប់ស្ងាត់។

រឿងដែលកាន់តែចាប់អារម្មណ៍ថែមទៀត ក៏មានប្រភពពីអ្នកសិល្ប:ជិតដិតធ្លាប់បង្ហើបថា ក្រោយអាជីពសិល្ប:ត្រូវបាត់បង់ទាំងស្រុងសព្វថ្ងៃលោក ចាន់រិទ្ធ មេធានី បានប្រករបរចិញ្ចឹមជីវិតដោយការរត់កង់បី។ ម្យ៉ាងទៀតលោកត្រូវចំណាយផងដែរលើការទិញថ្នាំដើម្បីព្យាបាលជំងឺប្រចាំកាយ៕ អត្ថបទ៖ ចាន់រ៉ា