CIA ប្រាប់​ថា អ៊ីរ៉ង់ អាចទ្រាំទ្រការបិទផ្លូវទឹក ៤ខែ ខណៈអាមេរិក ពិបាកនឹងបង្ខំឲ្យ​សត្រូវចុះចាញ់

ដ្បិត​សហរដ្ឋអាមេរិក បានប្រើប្រាស់វិធានការក្តៅ ដោយការបញ្ជូនកងទ័ពជើងទឹកទៅបិទខ្ទប់កំពង់ផែសំខាន់ៗ របស់អ៊ីរ៉ង់យ៉ាងណាក៏ដោយ ក៏​លទ្ធផលហាក់មិនដូចការរំពឹងទុកនោះឡើយ។ ការវាយតម្លៃចុងក្រោយ​ពីទីភ្នាក់ងារស៊ើបការណ៍សម្ងាត់អាមេរិក CIA បានបង្ហាញឲ្យ​ឃើញនូវការពិតដ៏គួរឲ្យ​ភ្ញាក់ផ្អើលមួយថា របបដឹកនាំនៅទីក្រុងតេហេរ៉ង់ មានសមត្ថភាពសេដ្ឋកិច្ច និងធនធានបម្រុងរឹងមាំគ្រប់គ្រាន់ ដើម្បីទប់ទល់នឹងការបិទខ្ទប់នេះបានរហូតដល់ទៅ ៤ខែទៀតឯណោះ។

India Today បាន​ចុះផ្សាយ​នា​ថ្ងៃទី​៩ ខែ​ឧសភា ឆ្នាំ​២០២៦ នេះ ថា របាយការណ៍ CIA បានធ្វើឲ្យ​មន្ត្រីជាន់ខ្ពស់នៅសេតវិមាន មានការបារម្ភយ៉ាងខ្លាំង ព្រោះវាមានន័យថា សម្ពាធសេដ្ឋកិច្ច ដែលអាមេរិកកំពុងព្យាយាមដាក់ទៅលើអ៊ីរ៉ង់ នឹងមិនអាចផ្តល់ផលភ្លាមៗ ដើម្បីបង្ខំឲ្យ​ភាគីអ៊ីរ៉ង់យល់ព្រមតាមលក្ខខណ្ឌចរចានោះទេ។ បើតាមការវិភាគពីមន្ត្រីអាមេរិក ដែលដឹងច្បាស់ពីរបាយការណ៍សម្ងាត់នេះ អ៊ីរ៉ង់នឹងមិនទាន់ជួបវិបត្តិសេដ្ឋកិច្ចធ្ងន់ធ្ងរ ដែលមិនអាចទ្រាំទ្របានក្នុងពេលឆាប់ៗនេះទេ ដែលនេះគឺជាឧបសគ្គធំមួយ សម្រាប់រដ្ឋបាលលោក ដូណាល់ ត្រាំ ក្នុងការប្រើប្រាស់អំណាចរបស់ខ្លួន ដើម្បីទាញអ៊ីរ៉ង់ឲ្យ​មកអង្គុយតុចរចាលើបញ្ហានុយក្លេអ៊ែរ និងបញ្ហាសន្តិសុខផ្សេងៗទៀត។

ក្នុងអំឡុងពេល ដែលអ៊ីរ៉ង់នៅមានដង្ហើមសេដ្ឋកិច្ចសម្រាប់រយៈពេល ៤ខែខាងមុខ ស្ថានការណ៍នៅតំបន់ឈូងសមុទ្រកាន់តែឡើងកម្ដៅ ដោយសារតែអ៊ីរ៉ង់នៅតែបន្តបង្ហាញជំហររឹងរូស និងមិនទាន់ព្រមឆ្លើយតបទៅនឹងសំណើសន្តិភាពរបស់អាមេរិកនៅឡើយ។ ការណ៍ដែលអ៊ីរ៉ង់អាចមានលទ្ធភាពទ្រាំទ្របានយូរបែបនេះ បានធ្វើឲ្យមានការចោទសួរកាន់តែខ្លាំងពីប្រសិទ្ធភាពនៃយុទ្ធសាស្ត្របិទខ្ទប់សមុទ្រ របស់អាមេរិក ព្រោះខណៈពេលដែលអាមេរិកកំពុងរង់ចាំសត្រូវចុះខ្សោយ តម្លៃប្រេងពិភពលោកបានហក់ឡើងខ្ពស់ខ្លាំង ដែលកំពុងផ្តល់ផលប៉ះពាល់ត្រឡប់មកវិញដល់សេដ្ឋកិច្ចរបស់អាមេរិក និងសម្ព័ន្ធមិត្តទៅវិញ។

ជារួម របាយការណ៍របស់ CIA មួយនេះ បានបញ្ជាក់យ៉ាងច្បាស់ថា សង្គ្រាម និងការដាក់សម្ពាធសេដ្ឋកិច្ចរវាងមហាអំណាចទាំងពីរនេះ នឹងមិនអាចបញ្ចប់ទៅយ៉ាងងាយស្រួលក្នុងរយៈពេលខ្លីនោះឡើយ។ អ៊ីរ៉ង់ហាក់បីដូចជាបានត្រៀមខ្លួនរួចជាស្រេច សម្រាប់ការប្រយុទ្ធគ្នារយៈពេលវែង ហើយដរាបណាដង្ហើមសេដ្ឋកិច្ចរបស់ពួកគេនៅតែអាចដកបានដល់ទៅជិតកន្លះឆ្នាំទៀតនោះ ក្តីសង្ឃឹមក្នុងការឃើញការចុះចាញ់ ឬការយល់ព្រមតាមលក្ខខណ្ឌរបស់អាមេរិក ហាក់នៅឆ្ងាយសន្លឹមនៅឡើយ៕

ប្រែសម្រួល៖ ឈាង