ជីវិតកម្សាន្ដ

ជម្លោះរវាង ម៉េង កែវពេជ្ជតា និង ចន ច័ន្ទលក្ខិណា បានឈានដល់ទីបញ្ចប់

បានផុស

២ years មុន

នៅ

ថ្ងៃអង្គារ ២៣ កក្កដា ២០២៤

ដោយ

ទីបំផុតជម្លោះយ៉ាងក្តៅគគុករវាងកំពូលតារាចម្រៀងអ្នកនាង ម៉េង កែវពេជ្ជតា និងអតីតប្រធានសមាគមសិល្បករខ្មែរអ្នកនាង ចន ច័ន្ទលក្ខិណា ដែលអូសបន្លាយអស់រយៈពេលជាច្រើនឆ្នាំ គឺត្រូវបានផ្សះផ្សាគ្នា ១០០ ភាគរយហើយ ក្រោមការសម្របសម្រួលរបស់លោកជំទាវអ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករខ្មែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិតមកទល់នឹងពេលនេះជម្លោះដ៏រ៉ាំរ៉ៃរវាងកំពូលតារាទាំងពីរបានកើតឡើងអស់រយៈពេលជាច្រើនឆ្នាំមកហើយ និងបានឈានដល់ការប្ដឹងផ្ដល់គួរឲ្យភ្ញាក់ផ្អើលកាលពីពេលថ្មីៗ នេះ ដោយភាគីទាំងសងខាងសុទ្ធតែមានការប្ដេជ្ញាតតាំងគ្នាដល់ទីបញ្ចប់។

ដោយមើលឃើញពីស្ថានការណ៍កាន់តែអាក្រក់បែបនេះ និងដើម្បីសាងសាមគ្គីភាពនៅក្នុងសង្គមសិល្បៈ លោកជំទាវអ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករខ្មែរ ក៏បានចូលខ្លួនធ្វើជាអ្នកសម្របសម្រួលប្រកបដោយតម្លាភាព ដោយឈរលើគោលការណ៍ឈ្នះឈ្នះទាំងសងខាង។

ក្រោយបានស្វែងយល់ពីជំហរទាំងសងខាងហើយនោះ លោកជំទាវអ្នកឧកញ៉ា ក៏បានអញ្ជើញពួកគាត់ទាំងពីរមកជួបមុខគ្នាដោយផ្ទាល់ កាលពីរសៀលថ្ងៃទី ២២ ខែកក្កដា ឆ្នាំ ២០២៤ ដើម្បីដោះស្រាយឈានដល់ការបញ្ចប់រឿងតែម្ដង។ យ៉ាងណាមិញ ភាគី នៃតារាសិល្បៈទាំងពីរ ក៏បានព្រមព្រៀងគ្នាចរចាបញ្ចប់ជម្លោះដ៏តានតឹង និងងាកមកចាប់ដៃគ្នាធ្វើការងារជាប្រយោជន៍ ដើម្បីជាតិមាតុភូមិ ពិសេសការងារក្នុងវិស័យសិល្បៈដ៏ល្អផូរផង់របស់កម្ពុជា។

បើយោងទៅតាមកិច្ចព្រមព្រៀងបញ្ចប់រឿងដែលធ្វើឡើងដោយលោកជំទាវមេធាវី ឈីវ ភិរម្យ ភរិយារបស់ លោក លី ច័ន្ទតុលា (ប្រធានគណៈមេធាវី នៃព្រះរាជាណាចក្រកម្ពុជាបច្ចុប្បន្ន) បានបញ្ជាក់ថា ចាប់ពីថ្ងៃនេះតទៅ ភាគីទាំងពីរ យល់ព្រមបញ្ចប់ជម្លោះដោយផ្ទាល់ ឬប្រយោលណាមួយ ទាំងនៅលើបណ្ដាញសង្គម ឬតាមមធ្យោបាយផ្សេងៗ ទៀត។

ចំណែកលោកជំទាវអ្នកឧកញ៉ា ម៉ៅ ចំណាន គិតម៉េង ក្នុងនាមថ្នាក់ដឹកនាំសមាគមសិល្បករខ្មែរ បានថ្លែងការកោតសរសើរចំពោះស្មារតីចូលរួមរបស់សិល្បករទាំងពីររូបនេះ ដោយសង្ឃឹមថា ចាប់តាំងពីពេលនេះតទៅ អនាគតសង្គមសិល្បករពោរពេញដោយភាពស្ងប់ស្ងាត់ក្នុងស្មារតីយោគយល់អធ្យាស្រ័យគ្នាប្រកបដោយការរួបរួមសាមគ្គីជាធ្លុងមួយ ដើម្បីចូលរួមលើកស្ទួយវិស័យសិល្បៈវប្បធម៌ជាតិ៕

អត្ថបទ ៖ ចាន់រ៉ា