Rith Omega ទម្លាយថា ប៊ុត សីហា សម្រេចដើរចេញពីវិថីសិល្បៈជាថ្មី ព្រោះរងសម្ពាធពីការមាក់ងាយពេក

អ្នកដឹកនាំសម្តែង និងជាអ្នកនិពន្ធវ័យក្មេងលោក ឃុន ធារិទ្ធិ ហៅ Rith Omega បានប្រកាសថា ទំនាក់ទំនងរវាងលោក និងតារាចម្រៀងលោក ប៊ុត សីហា គឺលែងមានអ្វីពាក់ព័ន្ធគ្នាទៀតហើយ។

លោក ឃុន ធារិទ្ធិ ហៅ Rith Omega បានបង្ហោះសំណេរថា “សូមមិននិយាយអ្វីទាំងអស់ ហើយសូមបញ្ជាក់ សីហា​ មិនបានទៅជក់ថ្នាំទៀតទេ​ តែគាត់ប្រាប់ថាគាត់ពិបាករងសម្ពាធនឹងពាក្យគេមើលងាយ​ រើសអើងគាត់​ ពេលគាត់អានមតិរិះគន់គាត់ ជេគាត់​ ហើយពេលនៅហាងមានគេហៅគាត់ អាតារាបែកថ្នាំ​ អាជាប់គុក​ គាត់ខ្មាស់គេ​”។

លោកបន្តទៀតថា សីហា “សុំខ្ញុំឈប់ច្រៀងហើយ សុំរស់នៅតាមសមាជីវោធម្មតាវិញ ខ្ញុំសុខចិត្តខ្មាស់គេ​មួយប្រទេសខ្ញុំសុំទោសផងដែលបានអះអាងជួយ សីហា តែចុងក្រោយនៅតែមិនអាចឱ្យ សីហា​ មានទីផ្សារ​ចូលសិល្បៈវិញបាន​”។

លោក Rith Omega បានបន្ថែមថា លោកពិតជាបានខំអស់ហើយក្នុងការជួយ ​តែផលដែលបានមកវិញ​ មានតែការខកចិត្ត។ លោកថា Album ប៊ុត សីហា​ ៦៦បទ លោកនឹងទុកផ្តល់ឱកាស​ជួយអ្នកផ្សេងដែលគេចង់ច្រៀងចង់ល្បី​ ពិតប្រាកដ។

គួរម្លឹកថា កន្លងមកអតីតផលិតករនិងជាអ្នកដឹកនាំសម្តែងវ័យក្មេងលោក ឃុន ធារិទ្ធិ ហៅ Rith Omega ធ្លាប់បានអង្វរសុំចិត្តមហាជនក៏ដូចជាអ្នកគាំទ្រមេត្តាឈប់រិះគន់ ឬខឹងតាមជាន់ពន្លិតតារាចម្រៀងលោក ប៊ុត​ សីហា បន្តទៀតព្រោះពេលនេះ ប៊ុត សីហា តាំងចិត្តជាថ្មី​ក្នុងការចាប់ផ្តើមឡើងវិញ​។ ប៉ុន្តែចុងក្រោយបែរជាប្រកាសលែងមានអ្វីពាក់ព័ន្ធជាមួយគ្នាវិញ៕ អត្ថបទ៖ ចាន់រ៉ា