វិទ្យាល័យព្រះសីហនុ ក្នុងខេត្តកំពង់ចាម ត្រូវបានទទួលស្គាល់គុណភាពអប់រំកម្រិតអន្តរជាតិ

វិទ្យាល័យព្រះសីហនុ មានទីតាំងស្ថិតនៅក្នុងខេត្តកំពង់ចាម ដែលបានអនុវត្តកម្មវិធីសិក្សាថ្នាក់ពីរភាសា បារាំង-ខ្មែរ ត្រូវបានប្រកាសទទួលស្គាល់គុណភាពអប់រំកម្រិតបទដ្ឋានអន្តរជាតិ។

លោក សាមឺឌី ស៊ីវឌ្ឍនា រដ្ឋលេខាធិការក្រសួងអប់រំ យុវជន និងកីឡា និងលោក ហ្សាក់ ប៉ឺឡេ (Jacque PELLET) ឯកអគ្គរដ្ឋទូតបារាំងប្រចាំកម្ពុជា អមដំណើរដោយថ្នាក់ដឹកនាំក្រសួងអប់រំ និងមន្ត្រីជាន់ខ្ពស់ស្ថានទូតច្រើនរូប បានអញ្ជើញចូលរួមក្នុងពិធីសម្ពោធបំពាក់ស្លាក ឡាប៊ែលហ្រ្វង់អេឌុយកាស្យុង (LABELFRANCEDUCATION) នៅវិទ្យាល័យព្រះសីហនុ ខេត្តកំពង់ចាម កាលពីថ្ងៃទី២៨ ខែឧសភា ឆ្នាំ២០២៥។

ឡាប៊ែលហ្រ្វង់អេឌុយកាស្យុង គឺស្លាកសញ្ញាទទួលស្គាល់គុណភាពអប់រំកម្រិតបទដ្ឋានអន្តរជាតិដែលត្រូវបានផ្ដល់ជូនគ្រប់គ្រឹះស្ថានសិក្សាសាធារណៈ និងឯកជន ក្នុងការអនុវត្តកម្មវិធីសិក្សាថ្នាក់ពីរភាសា បារាំង-ខ្មែរ និងបានបំពេញគ្រប់លក្ខខណ្ឌតម្រូវតាមនិយាមកំណត់របស់កម្មវិធី។

បន្ថែមពីនេះទៀត កម្មវិធីឡាបែលហ្វ្រង់អេឌុយកាស្យុង មានគ្រឹះស្ថានសិក្សាសមាជិកពេញសិទ្ធិសរុបចំនួន៧១៦ និងអ្នកសិក្សានៅក្នុងក្របខ័ណ្ឌកម្មវិធីចំនួនជាង២០ម៉ឺននាក់ នៃបណ្ដាប្រទេសចំនួន៦៧ នៅទូទាំងពិភពលោក។

ជាក់ស្ដែង វិទ្យាល័យព្រះសីហនុ គឺជាគ្រឹះស្ថានមធ្យមសិក្សាចំណេះទូទៅសាធារណៈឈានមុខគេមួយនៅក្នុងខេត្តកំពង់ចាមដែលកំពុងតែបន្តនិរន្តរភាពកម្មវិធីសិក្សាថ្នាក់ពីរភាសា បារាំង-ខ្មែរ រហូតមកទល់នឹងពេលបច្ចុប្បន្ន និងបានប្រែក្លាយជាសាលាស្តង់ដាកម្រិតអន្តរជាតិក្នុងការផ្ដល់សេវាអប់រំជាភាសាបារាំងតាមប្រកាសទទួលស្គាល់ជាផ្លូវការនៅថ្ងៃទី០២ ខែកញ្ញា ឆ្នាំ២០២៤ របស់ក្រសួងអឺរ៉ុប និងកិច្ចការបរទេសនៃសាធារណរដ្ឋបារាំង៕