ព័ត៌មានអន្ដរជាតិ

លោក ត្រាំ ស្នើឲ្យមានការផ្លាស់ប្ដូររបបនៅអ៊ីរ៉ង់ ផ្ទុយពីការលើកឡើងរបស់មន្ត្រីជាន់ខ្ពស់របស់ខ្លួន

បានផុស

៣២ វិនាទី មុន

នៅ

ថ្ងៃចន្ទ ២៣ មិថុនា ២០២៥

ដោយ

Chheang

ប្រធានាធិបតី ដូណាល់ ត្រាំ បានបង្ហាញថា លោកគាំទ្រឲ្យមានការផ្លាស់ប្តូររបបនៅក្នុងប្រទេសអ៊ីរ៉ង់ ត្រឹមតែប៉ុន្មានម៉ោងបន្ទាប់ពីមន្ត្រីជាន់ខ្ពស់របស់សហរដ្ឋអាមេរិក មានដូចជា រដ្ឋមន្ត្រីការពារជាតិ Pete Hegseth និងអនុប្រធានាធិបតី JD Vance បានទទូចថា ការវាយប្រហាររបស់ក្រុងវ៉ាស៊ីនតោនមិនមានគោលបំណងផ្តួលរំលំរដ្ឋាភិបាលអ៊ីរ៉ង់នោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងការបង្ហោះទៅកាន់បណ្ដាញសង្គម Truth Social នៅថ្ងៃទី២៣ខែមិថុនាឆ្នាំ២០២៥នេះ លោក ត្រាំ បានសរសេរថា៖ «ការប្រើពាក្យថា “ការផ្លាស់ប្តូររបបនយោបាយ” វាមិនត្រឹមត្រូវទេ ប៉ុន្តែបើរបបអ៊ីរ៉ង់បច្ចុប្បន្នមិនអាចធ្វើឲ្យអ៊ីរ៉ង់មានភាពអស្ចារ្យឡើងវិញបាន ហេតុអ្វីមិនមានការផ្លាស់ប្តូររបបនេះ?»។

ប្រតិបត្តិការ «Midnight Hammer» គឺជាការវាយប្រហារដ៏ធំរបស់សហរដ្ឋអាមេរិកលើអ៊ីរ៉ង់ ដែលពាក់ព័ន្ធនឹងការប្រើប្រាស់យន្តហោះទម្លាក់គ្រាប់បែក B-2 មីស៊ីល Tomahawk និងយន្តហោះជាង ១២៥គ្រឿង ដោយតម្រង់គោលដៅទៅលើទីតាំងនុយក្លេអ៊ែរអ៊ីរ៉ង់ចំនួនបីកន្លែងសំខាន់ៗ។

ប៉ុន្មានម៉ោងក្រោយប្រតិបត្តិការនេះ ទាំងលោក Hegseth និងលោក Vance បានសង្កត់ធ្ងន់ថា ការវាយប្រហាររបស់ខ្លួនមិនសំដៅឲ្យមានការផ្លាស់ប្ដូររបបគ្រប់គ្រងនៅអ៊ីរ៉ង់ឡើយ។ លោក Hegseth បានប្រាប់អ្នកសារព័ត៌មានថា «បេសកកម្មនេះមិនមែននិយាយអំពីការផ្លាស់ប្តូររបបនោះទេ» ដោយពណ៌នាអំពីការវាយប្រហារនេះថាជា ប្រតិបត្តិការដ៏ជាក់លាក់មួយដើម្បីរុះរើសមត្ថភាពនុយក្លេអ៊ែររបស់អ៊ីរ៉ង់។ ចំណែកឯអនុប្រធានាធិបតី Vance បាននិយាយថា «យើងមិនចង់បានការផ្លាស់ប្តូររបបទេ … យើងចង់បញ្ចប់កម្មវិធីនុយក្លេអ៊ែររបស់ពួកគេ ហើយបន្ទាប់មក … និយាយជាមួយប្រជាជនអ៊ីរ៉ង់អំពីដំណោះស្រាយរយៈពេលវែង» ដោយបន្ថែមថា មិនមានផែនការសម្រាប់កងទ័ពអាមេរិកនៅលើទឹកដីនោះទេ។

សូមជម្រាបថា ក្រសួងការបរទេសអាមេរិក បានព្រមានឲ្យពលរដ្ឋរបស់ខ្លួននៅទូទាំងពិភពលោក ត្រូវប្រុងប្រយ័ត្ន ចំពោះហេតុការណ៍អាក្រក់ណាមួយដែលអាចកើតឡើងលើពួកគេ ក្រោយពីលោក ដូណាល់ ត្រាំ វាយប្រហាររោងចក្រនុយក្លេអ៊ែររបស់អ៊ីរ៉ង់ និងចំពេលសង្គ្រាមមជ្ឈិមបូព៌ាកាន់តែធំ។ ទន្ទឹមនោះ អាមេរិក ក៏ព្រមានឲ្យកងទ័ពរបស់ខ្លួននៅតំបន់មជ្ឈិមបូព៌ា ត្រូវត្រៀមខ្លួនទប់ទល់នឹងការសងសឹករបស់អ៊ីរ៉ង់ផងដែរ៕

ដោយ៖ ឈាង

ចុចអាន៖ រដ្ឋមន្ត្រីការបរទេសអ៊ីរ៉ង់ ទៅរុស្ស៊ី ជួបពូទីន ចំពេលស្ថានការណ៍កំពុងក្តៅ