ព័ត៌មានអន្ដរជាតិ

កូរ៉េខាងជើង បង្ហាញវីដេអូលោក គីម ផ្ដេកផ្តួលលើមឈូសទាហានរបស់ខ្លួនដែលស្លាប់ព្រោះជួយរុស្ស៊ី

បានផុស

១២ ខែ មុន

នៅ

ថ្ងៃពុធ ២ កក្កដា ២០២៥

ដោយ

Chheang

នៅក្នុងវីដេអូដ៏កម្រមួយ មេដឹកនាំកូរ៉េខាងជើង លោក គីម ជុងអ៊ុន ត្រូវគេមើលឃើញថាបានផ្ដេកផ្ដួល និងដាក់ដៃនៅពីលើក្ដារមឈូស ដែលបង្ហាញពីការកាន់ទុក្ខចំពោះទាហានដែលត្រូវបានបញ្ជូនទៅកាន់ប្រទេសរុស្ស៊ី ដើម្បីប្រយុទ្ធនៅអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយកាលពីថ្ងៃទី១ខែកក្កដារបស់សារព័ត៌មាន New York Post វីដេអូដែលបានចាក់ផ្សាយតាមកញ្ចក់ទូរទស្សន៍រដ្ឋក្នុងអំឡុងពិធីរំលឹកខួបមួយឆ្នាំនៃភាពជាដៃគូយោធារវាងទីក្រុងព្យុងយ៉ាង-មូស្គូ បានបង្ហាញថា លោក គីម ហាក់រន្ធត់ចិត្តខ្លាំង ថែមទាំងលុតជង្គង់ និងជូតទឹកភ្នែក។ នៅក្នុងកម្មវិធីនោះ ក៏មានវត្តមានប្អូនស្រីរបស់គាត់គឺលោកស្រី គីម យូជុង និងរដ្ឋមន្ត្រីវប្បធម៌រុស្ស៊ីលោកស្រី Olga Lyubimova ផងដែរ។ លោកស្រី Lyubimova បានធ្វើដំណើរទៅកាន់ទីក្រុងព្យុងយ៉ាង សម្រាប់កម្មវិធីទូរទស្សន៍មួយនេះ ហើយលោកស្រីបានធ្វើសេចក្ដីថ្លែងការណ៍អំពីការលះបង់របស់កងទ័ពកូរ៉េខាងជើងសម្រាប់បុព្វហេតុរុស្ស៊ី។

របាយការណ៍ព័ត៌មានរបស់ទីភ្នាក់ងាររដ្ឋ KCNA របស់កូរ៉េខាងជើង បានហៅទាហានដែលត្រូវបញ្ជូនទៅជួយរុស្ស៊ីថាជា «វីរបុរស» និងរៀបរាប់អំពីបេសកកម្មរបស់ពួកគេថាជា «សមរភូមិដ៏ពិសិដ្ឋ»។ ទន្ទឹមនោះ ព្រឹត្តិការណ៍នេះ ត្រូវគេដឹងថាបានសង្កត់ធ្ងន់ទៅលើចំណងមិត្តភាពយោធាកាន់តែស៊ីជម្រៅខ្លាំងបន្ថែមទៀតរវាងប្រជាជាតិទាំងពីរ។

សូមជម្រាបថា កូរ៉េខាងជើង តាមសេចក្តីរាយការណ៍ បានបញ្ជូនទាហានប្រហែល ១២ ០០០នាក់ ទៅ ១៥ ០០០នាក់ ដើម្បីគាំទ្ររុស្ស៊ី នៅក្នុងតំបន់ Kursk ដោយការប៉ាន់ប្រមាណបង្ហាញថា មានអ្នកស្លាប់ប្រហែល ៦០០នាក់ និងអ្នករងរបួសរាប់ពាន់នាក់។ ជាថ្នូរនឹងការដាក់ពង្រាយនេះ កូរ៉េខាងជើងទទួលបានអាវុធ និងបច្ចេកវិទ្យាយោធាពីទីក្រុងមូស្គូមកវិញ៕