ព័ត៌មានអន្ដរជាតិ

ថៃ ចង់ឲ្យហាងលក់កញ្ឆាទាំងអស់ប្រែក្លាយជាគ្លីនិកពេទ្យ

បានផុស

១២ ខែ មុន

នៅ

ថ្ងៃព្រហស្បតិ៍ ១០ កក្កដា ២០២៥

ដោយ

Chheang

ក្រសួងសុខាភិបាលរបស់ប្រទេសថៃ បានប្រកាសថា កន្លែងលក់កញ្ឆាទាំងអស់ត្រូវតែប្តូរទៅជាគ្លីនិកវេជ្ជសាស្ត្រដែលមានអាជ្ញាប័ណ្ណ នៅត្រឹមដំណាច់ឆ្នាំ២០២៥ ដែលជាផ្នែកមួយនៃបទប្បញ្ញត្តិថ្មីដែលមានបំណងបញ្ចប់ការប្រើប្រាស់កញ្ឆាសម្រាប់ការកម្សាន្ត និងកំណត់យ៉ាងតឹងរ៉ឹងលើការលក់កញ្ឆាសម្រាប់គោលបំណងវេជ្ជសាស្ត្រតែប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយនៅថ្ងៃទី១០ខែកក្កដារបស់សារព័ត៌មាន SCMP នៅក្រោមច្បាប់ថ្មីនេះ ហាងលក់កញ្ឆានឹងត្រូវបានអនុញ្ញាតឲ្យដំណើរការបាន លុះត្រាតែពួកគេត្រូវបានចុះបញ្ជីក្រោមច្បាប់មន្ទីរពេទ្យ ហើយមានបុគ្គលិកជាអ្នកជំនាញផ្នែកវេជ្ជសាស្ត្រដូចជា វេជ្ជបណ្ឌិត គ្រូពេទ្យ ឱសថការី ឬគ្រូបុរាណ។ អ្នកទិញក៏នឹងត្រូវការវេជ្ជបញ្ជាដែលមានសុពលភាពផងដែរ ហើយការទិញនឹងត្រូវបានកំណត់ចំពោះការប្រើប្រាស់មិនឲ្យលើសពី ៣០ថ្ងៃឡើយ។

ថៃ បានក្លាយជាប្រទេសអាស៊ីដំបូងគេ ដែលចេញច្បាប់អនុញ្ញាតឲ្យមានការលក់និងប្រើប្រាស់កញ្ឆានៅឆ្នាំ២០២២ ដែលនាំឲ្យមានកំណើនហាងលក់ និងផលិតផលកញ្ឆាយ៉ាងច្រើនសន្ធឹកសន្ធាប់។ ការប្រើប្រាស់កញ្ឆានៅថៃ បានកើនឡើងច្រើនជាងមុន១០ដង ដោយបច្ចុប្បន្នមានអ្នកប្រើកញ្ឆាសរុប ១,៥លាននាក់។

រដ្ឋាភិបាលនិយាយថា ការផ្លាស់ប្តូរទាំងនេះនឹងការពារសុខភាពសាធារណៈ ប៉ុន្តែម្ចាស់ហាង និងអាជីវកម្មខ្នាតតូចបានព្រមានថា មនុស្សជាច្រើនអាចនឹងត្រូវបង្ខំឲ្យបិទទ្វារអាជីវកម្មពួកគេ ដោយសារតែការចំណាយខ្ពស់នៃការអនុលោមតាមច្បាប់។ ហាងកញ្ឆាជាង ១៨ ០០០កន្លែងបច្ចុប្បន្នកំពុងដំណើរការនៅទូទាំងប្រទេសថៃ៕

ដោយ៖ ឈាង

Related Topics:ប្រទេសថៃ