ព័ត៌មានជាតិ

អាជ្ញាធរក្រុងតាខ្មៅ ប្រកាសបើកដំណើរការឡើងវិញនូវ លំនៅដ្ឋានទីក្រុងរណប សិរីមង្គល

បានផុស

៥ years មុន

នៅ

ថ្ងៃអង្គារ ៦ មេសា ២០២១

ដោយ

មានប្រសាសន៍ទៅកាន់ប្រជាពលរដ្ឋ ដែលមានទីលំនៅស្ថិតក្នុងបុរី លំនៅដ្ឋានទីក្រុងរណប សិរីមង្គល សង្កាត់រការខ្ពស់ ក្រុងតាខ្មៅ ចំនួន២៥៣គ្រួសារ មានសមាជិកចំនួន៧៥០នាក់ ដែលត្រូវដល់ពេលកំណត់ក្នុងការបិទបញ្ចប់ការធ្វើចត្តាឡីស័ក នៅព្រឹកថ្ងៃទី៦ ខែមេសា ឆ្នាំ២០២១នេះ លោក នូ សុវណ្ណារ៉ា អភិបាលក្រុងតាខ្មៅ បានថ្លែងអំណរគុណយ៉ាងជ្រាលជ្រៅបំផុត ដល់ប្រជាពលរដ្ឋទាំងអស់ ដែលបានសហការល្អជាមួយអាជ្ញាធរក្រុង និងមានការខិតខំព្យាយាម អត់ធ្មត់គ្រប់យ៉ាង ក្នុងការធ្វើចត្តាឡីស័ក តាំងពីដើមរហូតដល់ពេលបញ្ចប់ បានយ៉ាងត្រឹមត្រូវតាមវិធានរបស់ក្រសួងសុខាភិបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ថែមពីលើនេះ លោកអភិបាលក្រុងតាខ្មៅ ក៏បានធ្វើការអំពាវនាវដល់ប្រជាពលរដ្ឋទាំងអស់ បើទោះបីបានបញ្ចប់ការធ្វើចត្តាឡីស័ក និងមិនមានផ្ទុកជំងឺកូវីត-១៩ ក៏ដោយ ក៏ត្រូវតែមានការប្រុងប្រយ័ត្នខ្ពស់ ជៀសវាងកុំឲ្យឆ្លងជំងឺដ៏កាចសាហាវនេះ ដោយត្រូវនាំគ្នាបន្តរក្សាអនាម័យឲ្យបានខ្ជាប់ខ្ជួន តាមការណែនាំរបស់ក្រសួងសុខាភិបាល បើមិនមានការចាំបាច់សូមកុំចេញពីផ្ទះ ត្រូវលាងសម្អាតដៃជាមួយសាប៊ូ អាកុល ឬជែល ឲ្យបានញឹកញាប់ ករណីមានបញ្ហាសុខភាពគួរឲ្យសង្ស័យត្រូវរាយការណ៍មកអាជ្ញាធរ និងគ្រូពេទ្យជាបន្ទាន់ ជាពិសេសត្រូវអនុវត្តតាមវិធានការ ការពាររបស់សម្តេចតេជោ គឺ៣កុំ ៣ការពារ ឲ្យបានគ្រប់ៗគ្នា។

នាឱកាសនោះដែរ អាជ្ញាធរក្រុងខ្មៅ និងមន្ត្រីពាក់ព័ន្ធក៏បាននាំយកអំណោយរបស់រដ្ឋបាលខេត្តកណ្តាល ចែកជូនដល់ប្រជាពលរដ្ឋទាំង៧៥០នាក់ ក្នុងម្នាក់ទទួលបាន សារុង១ ទឹកលាងដៃ១ដប ម៉ាស់១០បន្ទះ និងថវិការ៥ម៉ឺនរៀល។

គួរំលឹកដែរថា ការបិទជាបណ្ដោះអាសន្ន និងដាក់ឲ្យប្រជាពលរដ្ឋទាំងអស់ក្នុងបុរីនេះធ្វើចត្តាឡីស័ក គឺបន្ទាប់ពីអជ្ញាធរបានរកឃើញអ្នកវិជ្ជមានមេរោគកូវីដ-១៩ ចំនួន៧នាក់ ដែលរស់នៅក្នុងបុរីខាងលើ កាលពីពេលកន្លងទៅនេះ៕