ព័ត៌មានអន្ដរជាតិ
អ៊ីស្រាអែលប្តេជ្ញាតាមប្រល័យមេដឹកនាំហាម៉ាស បើពួកគេពិតជារួចជីវិតពីការវាយប្រហារនៅដូហា
ឯកអគ្គរដ្ឋទូតអ៊ីស្រាអែលប្រចាំនៅសហរដ្ឋអាមេរិក បានប្រកាសកាលពីថ្ងៃទី១០ខែកញ្ញាថា ប្រទេសរបស់លោកនឹងបន្តតាមសម្លាប់មេដឹកនាំក្រុមហាម៉ាសដោយមិនលែងដៃនោះឡើយ បើពួកគេពិតជារួចជីវិតពីការវាយប្រហារដ៏សាហាវនៅរដ្ឋធានីដូហារបស់ប្រទេសកាតានាពេលថ្មីៗនេះ។
ការវាយប្រហារដែលបានសម្លាប់មនុស្ស៦នាក់នៅកាតា ត្រូវបានថ្កោលទោសយ៉ាងខ្លាំង។ ក្រុមហាម៉ាសបាននិយាយថា អ្នកស្លាប់ចំនួន ៥នាក់គឺជាសមាជិកដែលមានឋានៈទាបប៉ុណ្ណោះ ខណៈដែលប្រទេសកាតាបានបញ្ជាក់ថា អ្នកស្លាប់ទី៦គឺជាសមាជិកនៃកងកម្លាំងសន្តិសុខផ្ទៃក្នុងរបស់ខ្លួន។
បេសកជនអ៊ីស្រាអែលប្រចាំនៅអាមេរិក លោក Yechiel Leiter បានច្រានចោលការរិះគន់អន្តរជាតិនៅក្នុងបទសម្ភាសន៍មួយជាមួយ Fox News។ លោកបានលើកឡើងថា «ឥឡូវនេះ យើងប្រហែលជាទទួលរងនូវការរិះគន់បន្តិចបន្តួច។ ពួកគេនឹងទទួលយកវា។ ហើយអ៊ីស្រាអែលកំពុងត្រូវបានផ្លាស់ប្តូរឲ្យកាន់តែប្រសើរឡើង។ ប្រសិនបើយើងមិនអាចសម្លាប់ពួកគេលើកនេះ យើងនឹងធ្វើវាលើកក្រោយទៀត»។
ការកត់សម្គាល់នេះ បានកើតឡើងនៅពេលដែលនាយករដ្ឋមន្ត្រីកាតា Mohammed bin Abdulrahman bin Jassim Al Thani បានចោទប្រកាន់នាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ ថាបានអូសទាញតំបន់នេះទៅជា«ភាពវឹកវរ» ហើយបាននិយាយថា រដ្ឋាភិបាលដូហាកំពុងវាយតម្លៃឡើងវិញនូវតួនាទីរបស់ខ្លួនជាអ្នកសម្រុះសម្រួល ក្នុងកិច្ចចរចាបទឈប់បាញ់។ លោក ណេតាន់យ៉ាហ៊ូ បានទាមទារឲ្យកាតាបណ្ដេញ ឬកាត់ទោសមេដឹកនាំក្រុមហាម៉ាស ដោយព្រមានថា «បើអ្នកមិនធ្វើទេ យើងនឹងធ្វើវា»។
ប្រតិបត្តិការរបស់អ៊ីស្រាអែលនៅទីក្រុងដូហា គឺជាបញ្ហាដ៏រសើបខ្លាំង ដោយសារតែប្រទេសកាតា គឺជាអ្នកបានរៀបចំកិច្ចពិភាក្សាកម្រិតខ្ពស់ ក្នុងគោលបំណងបង្កើតបទឈប់បាញ់នៅតំបន់ហ្គាហ្សា។ កាតាបានហៅសកម្មភាពរបស់អ៊ីស្រាអែលថា «ក្បត់» និងជា «អំពើភេរវកម្ម» ហើយក៏មានរិះគន់យ៉ាងខ្លាំងផ្សេងទៀតពីរដ្ឋអារ៉ាប់ជាច្រើនផងដែរ។
ទន្ទឹមនោះ ប្រធានគណៈកម្មការអឺរ៉ុប លោកស្រី Ursula von der Leyen បានបង្ហាញពីជំហររបស់សហភាពអឺរ៉ុប ដោយនិយាយថា ប្លុកនេះនឹងស្នើដាក់ទណ្ឌកម្មលើរដ្ឋមន្ត្រីអ៊ីស្រាអែលដែលជ្រុលនិយម និងផ្អាកផ្នែកខ្លះនៃកិច្ចព្រមព្រៀងពាណិជ្ជកម្មជាមួយអ៊ីស្រាអែល។ លោកស្រីបានបន្ថែមថា «អ្វីដែលកំពុងកើតឡើងនៅហ្គាហ្សាបានអង្រួនសតិសម្បជញ្ញៈរបស់ពិភពលោក» ដោយលើកឡើងពីទិដ្ឋភាព«មហន្តរាយ»នៃភាពស្រេកឃ្លាន និងការស្លាប់របស់ជនស៊ីវិល។
សូមរឭកឡើងវិញថា អ៊ីស្រាអែលបានបើកការវាយលុករបស់ខ្លួននៅតំបន់ហ្គាហ្សា បន្ទាប់ពីក្រុមហាម៉ាសកាលពីថ្ងៃទី៧ខែតុលាឆ្នាំ២០២៣បានវាយប្រហារ និងសម្លាប់មនុស្សប្រហែល ១ ២០០នាក់ និងចាប់ចំណាប់ខ្មាំងជាង ២៥០នាក់។ អាជ្ញាធរសុខាភិបាលហ្គាហ្សា បានឲ្យដឹងថា មនុស្សជាង ៦៤ ០០០នាក់ ដែលភាគច្រើនជាជនស៊ីវិល ត្រូវបានសម្លាប់ ចាប់តាំងពីពេលនោះមក ជាមួយនឹងការបំផ្លិចបំផ្លាញយ៉ាងពេញទំហឹង និងបង្កជាគ្រោះទុរ្ភិក្សយ៉ាងធ្ងន់ធ្ងរ៕
ដោយ៖ ឈាង
-
ព័ត៌មានអន្ដរជាតិ១ ថ្ងៃ agoអស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ
-
សេចក្ដីជូនដំណឹង៣ ថ្ងៃ agoក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា
-
សេដ្ឋកិច្ច៣ ថ្ងៃ agoធនាគារ ARDB ចាក់បញ្ចូលទុនលើស្វាយចន្ទី និងដំឡូងមី
-
ព័ត៌មានជាតិ១ សប្តាហ៍ agoរដ្ឋបាលខណ្ឌកំបូល សហការជាមួយក្រុមហ៊ុនមីនេបៀ ប្រើប្រាស់កម្លាំងជាង ៨០០នាក់ សម្អាតអនាម័យនៅតាមដងផ្លូវ
-
កីឡា៤ ថ្ងៃ agoមូលហេតុកីឡាករអាមេរិ Penrose ធ្វើមិនបានល្អជាមួយក្រុមស្នងការខេត្តស្វាយរៀង
-
ព័ត៌មានអន្ដរជាតិ១ សប្តាហ៍ agoអ៊ីរ៉ង់ បើកច្រកចូលរូងភ្នំ ផ្ទុកមីស៊ីលសម្ងាត់របស់ខ្លួនឡើងវិញ ទោះរងការវាយប្រហារយ៉ាងដំណំ
-
ព័ត៌មានអន្ដរជាតិ១ សប្តាហ៍ agoរដ្ឋមន្ត្រីការពារជាតិជប៉ុន បដិសេធការចោទប្រកាន់របស់ចិន អំពីការវិលទៅរកយោធានិយម
-
សេដ្ឋកិច្ច៦ ថ្ងៃ agoតម្លៃប្រេងលក់រាយធ្លាក់ចុះក្រោម ៥០០០ រៀល មួយលីត្រ