ប្រជាជនថៃរត់ប្រសាចគ្នា ខណៈបាក់ទំនប់ទន្លេ Pa Sak ខេត្ត Phetchabun

យោងតាមការចេញផ្សាយរបស់សារព័ត៌មាន Khaosod គ្រោះមហន្តរាយទឹកជំនន់ដ៏ខ្លាំងមួយបានវាយប្រហារស្រុក Lom Sak ក្នុងខេត្ត Phetchabun នៅរសៀលថ្ងៃសៅរ៍ ទី ២០ ខែកញ្ញា បន្ទាប់ពីបាក់ទំនប់ការពារទឹកជំនន់ បណ្ដាលឲ្យទឹកទន្លេ Pa Sak ហូរចេញយ៉ាងគំហុកបង្កការជន់លិចភ្លាមៗក្នុងរយៈពេលតែប៉ុន្មាននាទី។

បើតាមប្រជាពលរដ្ឋ នៅ​ម៉ោង​ប្រហែល ១:០០ រសៀល ទំនប់នៅជិតសួន Dong Tan ក្នុងស្រុក Lom Sak ខេត្ត Phetchabun បានបាក់បង្កជាទឹកជំនន់និងភាពចលាចលដល់ប្រជាជនភ្លាមៗ។ ជាការឆ្លើតតបក្រុមជួយសង្គ្រោះបានប្រញាប់ប្រញាល់ជម្លៀសអ្នកជំងឺដែលដេកលើគ្រែក្នុងមន្ទីពេទ្យក្បែរនោះ និងអ្នកស្រុកទៅកាន់ទីទួលខ្ពស់ ខណៈដែលទឹកជំនន់បានលេបត្របាក់សង្កាត់ទាំងមូលក្នុងរយៈពេលតិចជាង ១០ នាទី។

អាជ្ញាធរថៃមិនទាន់បានផ្តល់ការប៉ាន់ស្មានអំពីការខូចខាត ឬចំនួនគ្រួសារដែលរងផលប៉ះពាល់នៅឡើយទេ ប៉ុន្តែរបាយការណ៍ដំបូងបង្ហាញថា ទឹកជំនន់រីករាលដាល និងការរំខានយ៉ាងខ្លាំងនៅក្នុងតំបន់នេះ។ អាជ្ញាធរ​ថៃកំពុងបន្ត​ជួយ​ប្រជាពលរដ្ឋ និង​តាម​ដាន​ស្ថានការណ៍ ខណៈ​ក្តី​បារម្ភ​នៅ​តែ​មាន​ព្រោះទឹក​ទន្លេ​ Pa Sak នៅតែបន្តហក់ឡើង។ លើសពី វា​ជា​ទឹកជំនន់​ធំ​ទី​ពីរ​ហើយ​ដែល​វាយប្រហារ​តំបន់​នេះ​ក្នុង​រយៈតែពេល​ប៉ុន្មានប៉ុណ្ណោះ​។

គួរបញ្ជាក់ថាគ្រោះមហន្តរាយចុងក្រោយនេះគូសបញ្ជាក់ពីភាពងាយរងគ្រោះទឹកជំនន់សម្រាប់តំបន់នៅតាមដងទន្លេ Pa Sak ដែលមានភ្លៀងធ្លាក់តាមរដូវ និងទំនប់ទឹកមានវ័យចំណាស់ ដែលបានបង្កើតវិបត្តិម្តងហើយម្តងទៀតចំពោះអ្នកស្រុករាប់ពាន់នាក់៕

អត្ថបទ៖ ប៊ុន សុភាព