រដ្ឋាភិបាលអាមេរិក បិទដំណើរការ ធ្វើឲ្យបុគ្គលិករដ្ឋរាប់សែននាក់ អត់ប្រាក់ខែ

ទីបំផុត រដ្ឋាភិបាលអាមេរិក ត្រូវបិទដំណើរការជាផ្លូវការហើយ បន្ទាប់ពីគណបក្សសាធារណរដ្ឋនិងប្រជាធិបតេយ្យនៅក្នុងព្រឹទ្ធសភា មិនស្រុះស្រួលគ្នាលើកញ្ចប់ចំណាយ ខណៈគេមិនដឹងទេថាតើការបិទនេះនឹងអូសបន្លាយពេលប៉ុន្មានថ្ងៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ BBC នៅថ្ងៃពុធទី១ខែតុលាឆ្នាំ២០២៥ ការបោះឆ្នោតព្រឹទ្ធសភាទ្វេបក្សលើច្បាប់ថវិកាថ្មី គឺទទួល​បាន​​ការ​គាំទ្រត្រឹម ៥៥ ទល់នឹង​ ៤៥ សំឡេងប៉ុណ្ណោះ ខណៈវាត្រូវការរហូតដល់ទៅ ៦០សំឡេងឯណោះដើម្បីបន្តទៅមុខ ចំពេលកញ្ចប់ថវិកាចាស់ផុតកំណត់នៅថ្ងៃទី ៣០ ខែកញ្ញា។

ការបិទដំណើរការនេះមានន័យថា ទីភ្នាក់ងាររដ្ឋាភិបាលសហព័ន្ធដែលមិនសំខាន់ នឹងត្រូវផ្អាកសកម្មភាព ហើយបុគ្គលិករដ្ឋរាប់សែននាក់ នឹងត្រូវឈប់សម្រាកដោយគ្មានប្រាក់ខែ។

យ៉ាងណាក៏ដោយ សេវាសំខាន់ៗដូចជាសន្តិសុខជាតិ, ការត្រួតពិនិត្យចរាចរណ៍ផ្លូវអាកាស និងផ្នែកវេជ្ជសាស្ត្របន្ទាន់ នឹងនៅតែបន្តដំណើរការធម្មតា។

ទោះបែបនេះ បើតាមការអះអាងពីលោកស្រី Kristi Noem ដែលជារដ្ឋមន្ត្រីក្រសួងសន្តិសុខមាតុភូមិសហរដ្ឋអាមេរិក, មន្ត្រីអនុវត្តច្បាប់ទាំងឡាយ នឹងបន្តធ្វើការក្នុងអំឡុងពេលដែលរដ្ឋាភិបាលបិទដំណើរការ។ លោកស្រី សរសេរលើបណ្ដាញសង្គម X ថា៖ «អ្នកស្នេហាជាតិទាំងនេះជាង ២០០ ០០០ នាក់ នឹងបន្តធ្វើការដោយគ្មានប្រាក់ខែ»។

សូជម្រាបថា ចាប់តាំងពីឆ្នាំ១៩៨១មក រដ្ឋាភិបាលអាមេរិក ធ្លាប់បិទដំណើរការចំនួន១៥ដង ដែលភាគច្រើនបិទត្រឹម១ឬ២ថ្ងៃប៉ុណ្ណោះ។

យ៉ាងណាមិញ លើកចុងក្រោយដែលរដ្ឋាភិបាលអាមេរិកត្រូវបិទដំណើរការគឺនៅថ្ងៃទី២២ខែធ្នូឆ្នាំ២០១៨ ដែលកាលនោះអូសបន្លាយពេលចំនួន ៣៥ថ្ងៃ ដែលជារយៈពេលយូរបំផុត៕

អត្ថបទ៖ សុខ សុវណ្ណ

ចុចអាន៖ រដ្ឋាភិបាលអាមេរិកត្រៀមបិទដំណើរការ ខណៈសភាទាស់គ្នាលើ​ច្បាប់ស្ដីពីកញ្ចប់ថវិកាថ្មី