ត្រាំ គ្រោងប្ដឹង BBC ទារសំណងច្រើនបំផុតដល់ ៥ ប៊ីលាន​ដុល្លារ

ប្រធានាធិបតីសហរដ្ឋអាមេរិក លោក ដូណាល់ ត្រាំ បានឱ្យដឹងកាលពីថ្ងៃសុក្រថា លោកមានគម្រោងប្តឹង BBC នៅសប្តាហ៍ក្រោយ ដើម្បីទាមទារសំណងរហូតដល់ ៥ ​ប៊ីលានដុល្លារ ​បន្ទាប់ពីក្រុមហ៊ុនបណ្ដាញផ្សព្វផ្សាយព័ត៌មាន​មួយ​នេះ បានសារភាពថា ខ្លួនបានកែ​ឱ្យខុសនៃវិដេអូ​សុន្ទរកថារបស់លោក ត្រាំ នៅថ្ងៃទី ៦ ខែមករា ឆ្នាំ ២០២១។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

ឥឡូវនេះ សាជីវកម្មផ្សព្វផ្សាយអង់គ្លេស (BBC) កំពុងប្រឈមមុខនឹងវិបត្តិដ៏អាក្រក់បំផុតរបស់ខ្លួនក្នុងរយៈពេលជាច្រើនទសវត្សរ៍ ដោយមេដឹកនាំជាន់ខ្ពស់ក្រុមហ៊ុន​២រូបបានលាលែងពីតំណែង ចំពេលមានការចោទប្រកាន់ពីបទលំអៀង រួមទាំងភាពចម្រូងចម្រាស់នៃការកែសម្រួលវិដេអូសុន្ទរកថារបស់លោក ត្រាំ នៅថ្ងៃ ៦ មករា ២០២១ ដែលជាថ្ងៃវាយប្រហារលើវិមានកាពីតូលពីអ្នកគាំទ្រ ត្រាំ ដែលមិនទទួលយកលទ្ធផលបោះឆ្នោតប្រធានាធិបតីចុងឆ្នាំ ២០២០។​

កន្លងមក មេធាវីរបស់លោក ​ត្រាំ បាន​ទុក​ពេលឱ្យ BBC ​ដល់ថ្ងៃសុក្រ ដើម្បី​លុបចោលភាពយន្តឯកសាររបស់ខ្លួន ​បើមិនដូច្នោះទេ នឹង​ត្រូវប្រឈមមុខនឹងបណ្តឹង​ទារសំណង «មិនតិចជាង ១ ប៊ីលានដុល្លារ» ខណៈមេធាវីដដែលទាមទារការសុំទោស និងសំណងសម្រាប់ «ការខូចខាតកេរ្តិ៍ឈ្មោះ និងហិរញ្ញវត្ថុដ៏លើសលប់​»។ ​

BBC បានទទួលស្គាល់ «កំហុសនៃការវិនិច្ឆ័យ» ​ផ្នែកការកែសម្រួលវិដេអូរបស់ខ្លួន​ ​ហើយ​បានផ្ញើការសុំទោសផ្ទាល់ខ្លួនទៅលោក ត្រាំ កាលពីថ្ងៃព្រហស្បតិ៍។ ​ក្រុមហ៊ុន​បានបដិសេធមិនចាក់ផ្សាយភាពយន្តឯកសារ​នោះទៀតទេ ប៉ុន្តែ​បានច្រើន​ចោល​ការទាមទារសំណងពីបទបរិហារកេរ្តិ៍។

ជុំវិញបញ្ហានេះ លោក ​ត្រាំ បាននិយាយនៅលើយន្តហោះ Air Force One កាលពីថ្ងៃសុក្រ​ថា៖ «យើងនឹងប្តឹងពួកគេសម្រាប់សំណងចន្លោះពី ១ ​ទៅ ៥ ​ប៊ីលានដុល្លារ ប្រហែលជានៅសប្តាហ៍ក្រោយ»។ លោកបន្តថា៖ «ខ្ញុំគិតថា ខ្ញុំត្រូវតែធ្វើបែបនោះ ​ពួកគេបានសារភាពខ្លួន​ឯងថាពួកគេបានបោកប្រាស់ទៀតផង។ ពួកគេបានផ្លាស់ប្តូរពាក្យសម្ដីដែលចេញពីមាត់របស់ខ្ញុំ»។

លោកបាននិយាយថា លោកមិនទាន់បាននិយាយជាមួយនាយករដ្ឋមន្ត្រីអង់គ្លេស លោក​ Keir Starmer អំពីបញ្ហានេះទេ ប៉ុន្តែមានគម្រោងទូរស័ព្ទទៅលោក ដោយបន្ថែមថា Starmer បានទាក់ទងមកលោក ហើយ​ «មានអារម្មណ៍ខ្មាស់អៀនយ៉ាងខ្លាំង» ចំពោះករណី BBC។

ថ្មីៗដូចគ្នា លោក ត្រាំ បាន​ទទូច​ថា ការ​សុំទោស​របស់ BBC មិន​គ្រប់គ្រាន់​ទេ ដោយថា «ពេល​អ្នក​និយាយ​ថា​ វា​គឺជារឿងអចេតនា ខ្ញុំគិតថា បើវាជារឿងអចេតនា អ្នកមិនសុំទោសទេ»។ លោកបន្តថា BBC បាន​កាត់បញ្ចូលគ្នានូវ២ផ្នែកផ្សេងគ្នានៃវិដេអូសុន្ទរកថារបស់​លោក ដែលថ្លែងឡើងខុសគ្នាជិត១ម៉ោង ដោយ​មួយធ្វើឱ្យ​លោកជាមនុស្សអាក្រក់ និងមួយទៀត ធ្វើឱ្យ​លោកដូចជាស្ងប់ស្ងៀម៕