សេដ្ឋកិច្ច

ក្រុមហ៊ុនអាកាសចរណ៍ចំនួន ៣៦ កំពុងដំណើរការហោះហើរនៅកម្ពុជា

បានផុស

៥ ខែ មុន

នៅ

ថ្ងៃអង្គារ ២០ មករា ២០២៦

ដោយ

យោងតាមរដ្ឋលេខាធិការដ្ឋានអាកាសចរណ៍ស៊ីវិល កម្ពុជាមានក្រុមហ៊ុនអាកាសចរណ៍ចំនួន ៣៦ ក្រុមហ៊ុន (ជាតិ ៤ អន្តរជាតិ ៣២) កំពុងតភ្ជាប់ជើងហោះហើរជាមួយ ១៧ ប្រទេស និង ៤៦ ទីក្រុង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងចំណោម ១៧ ប្រទេសនោះ អាកាសចរណ៍កម្ពុជា បានតភ្ជាប់ទៅកាន់ ៨ ប្រទេសក្នុងតំបន់អាស៊ាន និងមានប្រទេសចិន កូរ៉េខាងត្បូង តំបន់រដ្ឋបាលពិសេសហុងកុង កោះតៃវ៉ាន់ ឥណ្ឌា កាតា អេមីរ៉ាតអារ៉ាប់រួម និងជប៉ុន។

វិស័យអាកាសចរណ៍កម្ពុជាកំពុងឈានចូលដល់ដំណាក់កាលផ្លាស់ប្តូរទៅកាន់សករាជថ្មី ជាមួយនឹងការបើកដំណើរការអាកាសយានដ្ឋានអន្តរជាតិតេជោ កាលពីខែកញ្ញា ឆ្នាំ ២០២៥ និងការពង្រីកបណ្តាញផ្លូវអាកាសអន្តរជាតិរបស់កម្ពុជា ហើយយើងមានគោលបំណងដាក់ប្រទេសកម្ពុជាជាមជ្ឈមណ្ឌលអាកាសចរណ៍ក្នុងតំបន់ដែលឆ្លើយតបនឹងស្តង់ដារអន្តរជាតិខាងសុវត្ថិភាព ប្រសិទ្ធភាព និងនិរន្តរភាព។

លោកបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល មានប្រសាសន៍ថា ក្រុមហ៊ុនអាកាសចរណ៍ជាតិកម្ពុជាទើបចុះអនុស្សារណៈនៃការយោគយល់គ្នា (MOU) ដើម្បីទទួលបានអាកាសយានប្រភេទថ្មីៗបន្ថែមទៀត ជាមួយក្រុមហ៊ុនប៊ូអ៊ីងរបស់សហរដ្ឋអាមេរិក (Boeing Company) និងក្រុមហ៊ុកូម៉ាករបស់ប្រទេសចិន (COMAC Company) ព្រមទាំងការពង្រីកជើងហោះហើរថ្មីៗ ទោះបីជាកម្ពុជាកំពុងជួបប្រទះសង្គ្រាមព្រំដែន ដែលបង្កឡើងដោយប្រទេសថៃ និងស្ថានភាពពិភពលោកកំពុងស្ថិតនៅក្នុងភាពប្រទាញប្រទង់ ទីតាំងភូមិសាស្ត្រនយោបាយ សង្គ្រាមរុស្ស៊ី-អ៊ុយក្រែន និងសង្គ្រាមមជ្ឍិមបូព៌ាជាដើម។

លោកបណ្ឌិត ម៉ៅ ហាវណ្ណាល់ បញ្ជាក់ថា៖ «ទោះបីស្ថិតក្នុងកាលៈទេសៈដ៏លំបាកនេះរដ្ឋលេខាធិការដ្ឋានអាកាសចរណ៍ស៊ីវិល នៅតែជាដៃគូយុទ្ធសាស្ត្រជាមួយវិស័យឯកជនក្នុងការខិតខំជំរុញឱ្យមានកំណើនការដឹកជញ្ជូនអ្នកដំណើរ និងទំនិញតាមផ្លូវអាកាស ធានាឱ្យបាននូវសន្តិសុខ និងសុវត្ថិភាពអាកាសចរណ៍ និងការអភិវឌ្ឍហេដ្ឋារចនាសម្ព័ន្ធអាកាសចរណ៍ ដើម្បីចូលរួមចំណែកក្នុងការអនុវត្តផែនការយុទ្ធសាស្ត្រអភិវឌ្ឍជាតិរបស់រាជរដ្ឋាភិបាល»។

យោងតាមអាកាសចរណ៍ស៊ីវិល នៅក្នុងឆ្នាំ ២០២៥ កម្ពុជាទទួលបានជើងហោះហើរចេញ-ចូល (ទ្វេទិស) ចំនួន ៦៤ ៨២១ ជើង កើនឡើង ១១% ធៀបនឹងឆ្នាំ ២០២៤, អ្នកដំណើរចេញ-ចូល (ទ្វេទិស) ចំនួន ៦ ៩៨៨ ២៥៩ នាក់ កើន ១២% និងទំនិញតាមផ្លូវអាកាសមានចំនួន ៩៣ ៨៨៩ តោន កើន ២១%៕

អត្ថបទ៖ ឡេង ដេត