សេដ្ឋកិច្ច

កម្លាំងពលកម្មកម្ពុជា មានលទ្ធភាពបំពេញតម្រូវការឧស្សាហកម្មទី៤

បានផុស

២ ខែ មុន

នៅ

ថ្ងៃពុធ ៤ មីនា ២០២៦

ដោយ

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍ថា កម្ពុជាបានត្រៀមខ្លួនជាស្រេច ដោយបានផ្ដល់អត្ថប្រយោជន៍ជាយុទ្ធសាស្ត្រសម្រាប់វិនិយោគិន ដោយផ្ដល់កាលានុវត្តភាពសម្រាប់ធុរកិច្ច និងវិនិយោគ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចធិបតី ហ៊ុន ម៉ាណែត មានប្រសាសន៍នៅក្នុងពិធីបើកកិច្ចប្រជុំកំពូលធុរកិច្ចអាស៊ាន-កម្ពុជា ឆ្នាំ២០២៦ ថា ដើម្បីឱ្យប្រតិបត្តិការធុរកិច្ចមានប្រសិទ្ធភាព និងភាពធន់ គឺត្រូវទាមទារឱ្យការធ្វើពិពិធកម្ម ធុរកិច្ច ខណៈកម្ពុជា នឹងបំពេញបន្ថែមដល់មូលដ្ឋានតំបន់អាស៊ាន ដោយផ្ដល់ខ្សែច្រវាក់ផ្គត់ផ្គង់ក្នុងតំបន់ដោយរលូន ចាប់តាំងពីចូលជាសមាជិកអាស៊ាននៅឆ្នាំ ១៩៩៩។

រាជរដ្ឋាភិបាលផ្ដល់កម្មសិទ្ធិ ១០០% ដល់វិនិយោគិន និងធ្វើឌីជីថលូបនីយកម្ម ដោយប្ដេជ្ញាកាត់បន្ថយឧបសគ្គ និងបង្កើនល្បឿនទៅកាន់ទីផ្សារអោយបាអតិបរមា។

សម្ដេចធិបតី ហ៊ុន ម៉ាណែត បានបញ្ជាក់ថា បច្ចេកវិទ្យាគឺជាស្នូលនៃគោលនយោបាយជាតិរបស់កម្ពុជា ដោយសារកំណើនដែលមានតម្លៃខ្ពស់ មិនអាចបំបែកចេញពីភាពចាស់ទុំផ្នែកឌីជីថលបានឡើយ។

សម្ដេចធិបតី ហ៊ុន ម៉ាណែត បញ្ជាក់ថា៖«បច្ចុប្បន្ន យើងកំពុងអនុវត្តគម្រោងបដិវត្តជំនាញដ៏ធំមួយ តាមរយៈកម្មវិធីអប់រំ បណ្ដុះបណ្ដាលបច្ចេកទេស និងវិជ្ជាជីវៈ (TVET) សម្រាប់យុវជន ១,៥ លាននាក់ ដោយសការជាមួយក្រុមហ៊ុនឧស្សាហកម្មឈានមុខ យើងធានាថា កម្លាំងពលកម្មរបស់យើង មិនត្រឹមតែត្រៀមខ្លួន ក្នុងការបំពេញការងារប៉ុណ្ណោះទេ ថែមទាំងអនុលោមទៅតាមតម្រូវការបដិវត្តន៍ឧស្សាហកម្មទី៤»។

អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ាន-កម្ពុជា មានប្រសាសន៍ថា កម្ពុជាកំពុងផ្លាស់ប្តូរយ៉ាងសកម្មឆ្ពោះទៅរកកម្មន្តសាលកម្រិតខ្ពស់ ជាពិសេសនៅក្នុងវិស័យអេឡិចត្រូនិក និងគ្រឿងបន្លាស់រថយន្ត ដោយមានការគាំទ្រពីថវិកាជាតិចំនួន ១០,១ ពាន់លានដុល្លារអាមេរិក ដែលផ្តល់អាទិភាពដល់ការធ្វើទំនើបកម្ម ភាពប្រកួតប្រជែង និងអធិបតេយ្យភាពសេដ្ឋកិច្ច។

អ្នកឧកញ៉ា គិត ម៉េង បន្ថែមថា ដោយផ្អែកលើការអភិវឌ្ឍសមត្ថភាពសេដ្ឋកិច្ច និងធនធានមនុស្សដ៏រឹងមាំរយៈពេលបីទសវត្សរ៍មកនេះ ការផ្តោតរបស់កម្ពុជានាពេលបច្ចុប្បន្ន គឺផ្លាស់ប្តូរទៅរកការកសាងប្រព័ន្ធអេកូឡូស៊ីដែលអាចទ្រទ្រង់ខ្លួនឯងបានរបស់ប្រទេសកម្ពុជានៅទូទាំងវិស័យសំខាន់ៗ៕

អត្ថបទ៖ ឡេង ដេត